மேகதாது பணிகளை தீவிரமாக்கும் கர்நாடகா.. பிரதமரை சந்தித்து முடிவு கட்ட CPM வலியுறுத்தல்..!

கர்நாடக மாநில அரசு மேகதாட்டுவில் அணை கட்ட தீவிர முயற்சி செய்வதாகவும் தமிழக முதல்வர் அனைத்து கட்சி பிரதிநிதிகளுடன் பிரதமரைச் சந்தித்து தடுத்து நிறுத்த வேண்டும் என்றும் சிபிஎம் வலியுறுத்தி உள்ளது. காவிரி நதியின் குறுக்கே மேகதாட்டுவில் அணை கட்ட அனுமதி வழங்கும்படி மத்திய நீர்ப்பாசன துறை அமைச்சர் சி.ஆர். பாட்டீலிடம் கர்நாடக முதல்வர் டி.கே. சிவக்குமார் நேரில் சந்தித்து கடிதம் கொடுத்துள்ளார் என்றும் அணை கட்டும் திட்டத்திற்கான விரிவான திட்ட அறிக்கையை மத்திய நீர் ஆணையம் விரைவாக ஆய்வு செய்து ஒப்புதல் அளிக்க வேண்டுமென வலியுறுத்தியுள்ளதாக செய்திகள் வந்துள்ளது பெரும் அதிர்ச்சியளிக்கிறது எனவும் தெரிவித்துள்ளது. 

தமிழகத்திற்கு பாதிப்பை ஏற்படுத்தும் மேகதாது அணை கட்டுவதற்கு கர்நாடக அரசிற்கு மத்திய பாஜக அரசு ஒருபோதும் அனுமதி வழங்கிடக் கூடாது என மார்க்சிஸ்ட் கம்யூனிஸ்ட் கட்சியின் மாநில செயற்குழு வலியுறுத்துகிறது என்றும் தெரிவிக்கப்பட்டுள்ளது. நடுவர்மன்ற தீர்ப்பு, உச்சநீதிமன்ற இறுதி தீர்ப்பின் அடிப்படையில் மாதவாரியாக தமிழகத்திற்கு உரிய தண்ணீரை கர்நாடக மாநில அரசு இதுவரை வழங்கியதில்லை.

இதை மத்திய அரசும் கண்டுகொள்வதில்லை. மாறாக, அபரிமிதமான மழை பெய்து உபரி நீரை திறந்து விடும் வடிகாலாகத்தான் தமிழ்நாட்டை பயன்படுத்தி வருகிறது. இந்த நிலையில், மேகதாட்டு அணை கட்டினால், தமிழ்நாட்டிற்குரிய தண்ணீர் கிடைக்காமல் காவிரி டெல்டா பகுதி பாலைவனமாகும். இதனால் குடிதண்ணீர் மற்றும் பாசனத்திற்கு மிகப்பெரிய பாதிப்பை தமிழ்நாடு எதிர்கொள்ள வேண்டிய நிலை உருவாகும் என்று எச்சரித்துள்ளது.

இதையும் படிங்க: கவின் ஆணவக் கொலையில் குற்றப்பத்திரிகை ரத்து..! தவறான முன் உதாரணம்... திருமா. எதிர்ப்பு..!!

எனவே, தமிழக அரசு அனைத்து அரசியல் கட்சி தலைவர்கள் மற்றும் விவசாயிகள் சங்க பிரதிநிதிகள் கூட்டத்தை உடனடியாக நடத்திட வேண்டும் என்றும் முதலமைச்சர் தலைமையில் அனைத்துக் கட்சி தலைவர்கள் மற்றும் விவசாயிகள் சங்க பிரதிநிதிகள் குழு பிரதமர் மற்றும் மத்திய நீர்வளத்துறை அமைச்சரை நேரில் சந்தித்து கர்நாடக அரசின் அணை கட்டும் முயற்சியினை தடுத்து நிறுத்தி தமிழ்நாட்டின் காவிரி மீதான உரிமையை நிலைநாட்டிட உடனடியாக நடவடிக்கை எடுக்க வேண்டுமென மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு தமிழக அரசை வலியுறுத்தி உள்ளது. 

இதையும் படிங்க: சீறிப்பாய்ந்த காரை மடக்கிய சிங்கம்: துணிச்சல் காவலர் வேல்முருகனுக்கு முதல்வர் விஜய் நேரில் பாராட்டு!