“இனியாவது இந்த மலிவான அரசியலை விடுங்க...” - தீயாய் பரவிய சர்ச்சை... திமுக மீது பாய்ந்தது அமைச்சர் அருண்ராஜ்...!

கரூர் மற்றும் கோவை அரசு மருத்துவக் கல்லூரி மருத்துவமனைகளில் பயன்படுத்தப்படும் மாத்திரை உறைகளில் இந்தி எழுத்துக்கள் இடம்பெற்ற விவகாரம் சர்ச்சையை ஏற்படுத்திய நிலையில், மருத்துவம் மற்றும் மக்கள் நல்வாழ்வுத்துறை அமைச்சர் அருண்ராஜ் தனது சமூக வலைதளப் பக்கத்தில் விளக்கம் அளித்து அறிக்கை வெளியிட்டுள்ளார்.

எதற்கெடுத்தாலும் மொழியை வைத்து மலிவான அரசியல் நடத்தும் திமுகவினர், தற்போது கரூர் மற்றும் கோவை அரசு மருத்துவக் கல்லூரி மருத்துவமனைகளில் பயன்படுத்தப்படும் மாத்திரை உறைகளை கையில் எடுத்துக்கொண்டு, தாங்கள் செய்த வரலாற்றுப் பிழையை மறைப்பதற்காக முதலைக் கண்ணீர் வடிப்பதாக அமைச்சர் அருண்ராஜ் கடும் கண்டனம் தெரிவித்துள்ளார்.

மேலும், திட்டமிட்டு மக்கள் மத்தியில் பொய்யான குழப்பத்தை ஏற்படுத்த முயலும் திமுகவினருக்கும், தமிழக மக்களுக்கும் இந்த விவகாரத்தின் உண்மை நிலையைத் தெளிவுபடுத்த வேண்டிய அவசியம் ஏற்பட்டுள்ளதாக அவர் குறிப்பிட்டுள்ளார்.

இதையும் படிங்க: “தாய்மொழி காப்பதுபோல முகமூடி”... தமிழ்நாட்டையே உலுக்கிய ‘இந்தி’ சர்ச்சை... திமுக மீது தவெக ஐடி விங்க் பகீர் குற்றச்சாட்டு...!

கடந்த 2025ஆம் ஆண்டு டிசம்பர் 25ஆம் தேதி, மத்திய சிறையில் இருந்து வரும் மருத்துவ உறைகளுக்கு தட்டுப்பாடு ஏற்பட்டதால், 4 லட்சம் உறைகள் அச்சிடப்பட்டதாகவும், இதற்கான அவசர ஆணை திமுக ஆட்சிக் காலத்திலேயே வழங்கப்பட்டதாகவும் அமைச்சர் தெரிவித்துள்ளார்.

அதேபோல், மூன்று ஆண்டுகளுக்கு முன்பே திமுக ஆட்சியில் அலுவலக நடைமுறைகளின்படி அதிகாரப்பூர்வமாக அங்கீகரிக்கப்பட்டு, சிந்தாமணி கூட்டுறவு நிறுவனம் மூலம் இந்த உறைகள் அச்சிடப்பட்டு நடைமுறைக்கு கொண்டு வரப்பட்டதாகவும் அவர் தெரிவித்துள்ளார்.

தங்களது ஆட்சிக் காலத்திலேயே இந்தியை அனுமதித்து, அதற்கான வடிவமைப்பை உருவாக்கி, நோயாளிகளின் பயன்பாட்டுக்கும் கொண்டு வந்துவிட்டு, தற்போது ஆளுங்கட்சி மீது பழிபோடுவது எந்த வகையான அரசியல் என்றும் அமைச்சர் கேள்வி எழுப்பியுள்ளார்.

திமுக ஆட்சிக் காலத்திலேயே இந்த மாத்திரை உறைகள் பயன்பாட்டுக்கு வந்தபோது வாய்மூடி, கைகட்டி மௌனமாக இருந்த திமுகவினர், தற்போது திடீரென மொழிப்போர் காவலர்களைப் போல் வேடமிடுவது ஏன் என்றும் அவர் கேள்வி எழுப்பியுள்ளார்.

தாங்களே இந்தியை அனுமதித்துவிட்டு, தற்போது அதனை பூதாகரமான பிரச்சினையாக மாற்றி அரசியல் ஆதாயம் தேடுவது திமுகவின் அப்பட்டமான பித்தலாட்டம் என்றும் அமைச்சர் அருண்ராஜ் கடுமையாக விமர்சித்துள்ளார்.

மேலும், திமுக ஆட்சியில் கொண்டுவரப்பட்ட அந்த வடிவமைப்பிலோ அல்லது மொழியிலோ தற்போதைய அரசு எந்த மாற்றமும் செய்யவில்லை என்றும், தாங்கள் செய்த தவறை மறைப்பதற்காக தங்கள் மீது அபாண்டமாக பழி போடுவது திமுகவின் கேவலமான அரசியல் தந்திரம் என்றும் தனது அறிக்கையில் குறிப்பிட்டுள்ளார்.

இதனிடையே, இந்த விவகாரம் தொடர்பாக உடனடியாக நடவடிக்கை எடுக்கப்பட்டுள்ளதாகவும் அமைச்சர் தெரிவித்துள்ளார். மத்திய சிறையில் இருந்து பெறப்படும் மருத்துவ உறைகளில் தமிழ் மொழியில் மட்டுமே விவரங்கள் முத்திரையிடப்பட்டு, அவை நோயாளிகளுக்கு வழங்கப்படுவது உறுதி செய்யப்பட்டுள்ளதாகவும் அவர் கூறியுள்ளார்.

அதேபோல், கோவையில் தமிழ் மற்றும் ஆங்கிலம் ஆகிய இரு மொழிகள் மட்டுமே இடம்பெறும் வகையிலான மாத்திரை உறைகளைப் பயன்படுத்த நடவடிக்கை எடுக்கப்பட்டுள்ளதாகவும் அமைச்சர் அருண்ராஜ் தெரிவித்துள்ளார்.

பேரறிஞர் அண்ணாவின் இருமொழிக் கொள்கையை பெயரளவில் இல்லாமல், தன் உயிர்மூச்சாக கடைபிடித்து வரும் ஒரே இயக்கம் தமிழக வெற்றிக் கழகம் என்றும், இதில் எப்போதும் சமரசம் செய்ய மாட்டோம் என்றும் அவர் உறுதியாக தெரிவித்துள்ளார்.

பொய்களை மட்டுமே மூலதனமாகக் கொண்டு அரசியல் செய்து பழகிய திமுகவினர், இனிமேலாவது இதுபோன்ற மலிவான அரசியலை விடுத்து ஆக்கப்பூர்வமான எதிர்க்கட்சியாக செயல்படுவார்களா என்பதைப் பொறுத்திருந்து பார்ப்போம் என்றும் மருத்துவம் மற்றும் மக்கள் நல்வாழ்வுத்துறை அமைச்சர் அருண்ராஜ் தனது சமூக வலைதளப் பக்கத்தில் பதிவிட்டுள்ளார்.

ஏற்கனவே இந்த விவகாரம் நேற்று பூதாகரமாக பேசப்பட்ட நிலையில், இது உண்மையல்ல என்றும், ஏற்கனவே திமுக ஆட்சிக் காலத்திலேயே இந்த நடைமுறை கொண்டுவரப்பட்டது என்றும் அமைச்சர் தனது சமூக வலைதளப் பக்கத்தில் பதிவிட்டிருந்தார். இதன் தொடர்ச்சியாக, இன்று மேற்கொள்ளப்பட்ட நடவடிக்கைகள் குறித்தும் அவர் விரிவான அறிக்கையை வெளியிட்டுள்ளார்.

இதையும் படிங்க: தேர்தல்களை ரத்து செய்யுங்க..! தொடரும் ஞானேஷ் குமார் பிரச்சனை... சீமான் காட்டம்.!!