ஐயுஎம்எல் தலைவர் காதர் மொகிதீனுடன் அமைச்சர் நிர்மல்குமார் சந்திப்பு: தவெக கூட்டத்திற்கு அழைப்பு!

சென்னையில் நாளை நடைபெறவுள்ள தமிழக வெற்றிக் கழக ஆதரவுக் கட்சிகளின் முக்கிய ஆலோசனைக் கூட்டத்தில் பங்கேற்குமாறு இந்திய யூனியன் முஸ்லிம் லீக் (ஐயுஎம்எல்) தேசியத் தலைவர் பேராசிரியர் கே.எம்.காதர் மொகிதீனை, தமிழ்நாடு அமைச்சர் நிர்மல்குமார் இன்று நேரில் சந்தித்து அதிகாரப்பூர்வமாக அழைப்பு விடுத்த சம்பவம் தமிழக அரசியல் வட்டாரங்களில் மிகுந்த கவனத்தை ஈர்த்துள்ளது.

தமிழ்நாடு சட்டப்பேரவையின் பட்ஜெட் கூட்டத்தொடர் நிறைவடைந்துள்ள சூழலிலும், காலியாக உள்ள மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் தேதிகள் அறிவிக்கப்பட்டுள்ள நிலையிலும், அரசியல் களம் அடுத்தடுத்துப் பல்வேறு முக்கியத் திருப்பங்களை நோக்கி நகர்ந்து வருகிறது. ஆளுங்கட்சியான தமிழக வெற்றிக் கழகம் தனது அரசியல் நிலைப்பாட்டை மேலும் வலுப்படுத்தவும், இடைத்தேர்தல் கள வியூகங்கள் மற்றும் நடப்பு அரசியல் நிலவரங்கள் குறித்து விரிவாக விவாதிக்கவும் தங்களுக்கு ஆதரவளிக்கும் கட்சிகளின் முக்கிய ஆலோசனைக் கூட்டத்தை நாளை சென்னையில் கூட்டத் திட்டமிட்டுள்ளது.

இதன் தொடர்ச்சியாக, சென்னை மண்ணடி மரக்காயர் லெப்பை தெருவில் அமைந்துள்ள இந்திய யூனியன் முஸ்லிம் லீக் கட்சியின் மாநிலத் தலைமை அலுவலகமான காயிதே மில்லத் மன்சிலுக்கு அமைச்சர் நிர்மல்குமார் இன்று நேரில் வருகை தந்தார். அங்கு அக்கட்சியின் தேசியத் தலைவர் பேராசிரியர் கே.எம்.காதர் மொகிதீனை நேரில் சந்தித்துச் சால்வை அணிவித்து மரியாதை செலுத்திய அவர், நாளை நடைபெறவுள்ள தவெக ஆதரவுக் கட்சிகளின் ஆலோசனைக் கூட்டத்தில் ஐயுஎம்எல் சார்பில் பங்கேற்குமாறு முதலமைச்சர் மற்றும் கட்சித் தலைமையின் சார்பிலான அழைப்பை முறைப்படி வழங்கினார்.

இதையும் படிங்க: தவெக கூட்டத்தில் பங்கேற்க மாட்டோம்.. வெளியில் இருந்தே ஆதரவு: சிபிஐ வீரபாண்டியன் அதிரடி!

சுமார் அரை மணி நேரத்திற்கும் மேலாக நடைபெற்ற இந்தச் சந்திப்பின் போது, தமிழகத்தின் நடப்பு அரசியல் சூழ்நிலைகள், சிறுபான்மையினர் நலன் சார்ந்த திட்டங்கள் மற்றும் வரவிருக்கும் சட்டமன்ற இடைத்தேர்தல் பணிகள் குறித்து இரு தலைவர்களும் சுமுகமான கருத்துப் பரிமாற்றங்களை மேற்கொண்டதாகக் கூறப்படுகிறது. எதிர்க்கட்சிகள் பல்வேறு அரசியல் விமர்சனங்களை முன்வைத்து வரும் காலகட்டத்தில், ஆளும் தவெகவின் அமைச்சர் ஒருவர் முஸ்லிம் லீக் தலைவரை நேரடியாகச் சந்தித்து அழைப்பு விடுத்திருப்பது தமிழகக் கூட்டணி அரசியல் சதுரங்கத்தில் புதிய பரபரப்பை ஏற்படுத்தியுள்ளது.

இதையும் படிங்க: பேரவையில் வைரலான உடல்மொழி... விளக்கம் வெளியிட்ட முதல்வர் விஜய்..! சர்ச்சைக்கு டாட்..!!