தி.மு.க.,வில் மாவட்டச் செயலர் பதவி விவகாரம்: ஸ்டாலின் கடும் எச்சரிக்கை! நிர்வாகிகளுக்குப் புதிய கட்டுப்பாடுகள்!

சென்னை: தி.மு.க.,வில் கட்சி அமைப்புகளை மறுசீரமைக்கும் பணியில், நிர்வாகப் பதவிகளைத் தங்களுக்கு நெருக்கமானவர்களுக்குப் பெற்றுத் தர முயற்சிப்பதாகப் புகார்கள் எழுந்துள்ளன. இதையடுத்து, கட்சித் தலைவர் மு.க.ஸ்டாலின் நிர்வாகிகளுக்குக் கடும் எச்சரிக்கை விடுத்துள்ளதாகத் தகவல் வெளியாகியுள்ளது. கட்சி அமைப்புகளைப் பிரிப்பதில் புதிய விதிமுறைகளைப் பின்பற்றவும் அவர் உத்தரவிட்டுள்ளதாகக் கூறப்படுகிறது.

சட்டசபைத் தேர்தல் தோல்விக்குப் பிறகு, கட்சியின் செயல்பாடுகளை வலுப்படுத்தவும் நிர்வாக அமைப்புகளைச் சீரமைக்கவும் ஸ்டாலின் 19 குழுக்களை அமைத்தார். இந்தக் குழுக்கள் அளித்த பரிந்துரைகளின் அடிப்படையில், தமிழகம் முழுவதும் மாவட்டம், பகுதி, நகரம், ஒன்றியம், பேரூர், வட்டம் உள்ளிட்ட கட்சி அமைப்புகளை ஒரே சீரான நடைமுறையில் உருவாக்கத் திட்டமிடப்பட்டது.

ஆனால், சில முன்னாள் அமைச்சர்களும் மூத்த மாவட்டச் செயலர்களும் பரிந்துரைகளுக்கு ஏற்ப கட்சி அமைப்புகளைப் பிரிக்காமல் செயல்படுவதாகப் புகார்கள் எழுந்துள்ளன. தங்களுக்கு ஆதரவானவர்கள் மற்றும் உறவினர்களுக்குப் புதிய பொறுப்புகள் கிடைக்கும் வகையில் அமைப்புகளைப் பிரிப்பதாகவும் குற்றச்சாட்டுகள் முன்வைக்கப்பட்டுள்ளன.

இதையும் படிங்க: திரைத்துறையில் தவெக - திமுக மோதல் உச்சம்?! கமல், தனுஷ், வடிவேலு படங்களில் நடிக்க தடை! பேச்சுவார்த்தை தோல்வி!

இதற்கு சில மாவட்டப் பொறுப்பாளர்கள் ஒத்துழைப்பதாகவும், மற்றவர்கள் இதற்கு எதிர்ப்பு தெரிவித்து கட்சித் தலைமையிடம் புகார் அளித்துள்ளதாகவும் கூறப்படுகிறது.

இந்த விவகாரம் கட்சித் தலைமையின் கவனத்துக்குச் சென்றதைத் தொடர்ந்து, அறிவாலயத்தில் மறுசீரமைப்புக் குழுவில் இடம்பெற்ற சில முன்னாள் அமைச்சர்களை அழைத்து ஸ்டாலின் எச்சரித்ததாகத் தகவல்கள் தெரிவிக்கின்றன. மேலும், மறுசீரமைப்புக் குழு அளித்த பரிந்துரைகளுடன் ஒப்பிட்டுப் பார்த்த பின்னரே, மாவட்டங்களில் மேற்கொள்ளப்படும் மாற்றங்களுக்கு ஒப்புதல் அளிக்க வேண்டும் என்று மாவட்டச் செயலர்களுக்கு அறிவுறுத்தப்பட்டுள்ளதாகக் கூறப்படுகிறது.

இதற்காக, கட்சியின் ஒவ்வொரு நிர்வாக அமைப்புக்கும் வாக்காளர் எண்ணிக்கை அடிப்படையில் வரம்புகள் நிர்ணயிக்கப்பட்டுள்ளதாகக் கட்சி நிர்வாகிகள் தெரிவித்துள்ளனர். அதன்படி, ஒன்றிய அமைப்பில் 30 ஆயிரம் வாக்காளர்கள் இருக்குமாறு பிரிக்க வேண்டும் எனக் கூறப்படுகிறது.

சென்னையில் மாநகரப் பகுதிகளுக்கு 40 ஆயிரம் வாக்காளர்களும், பிற மாநகரப் பகுதிகளுக்கு 30 ஆயிரம் வாக்காளர்களும், நகர அமைப்புகளுக்கு 40 ஆயிரம் வாக்காளர்களும் என்ற அளவுகள் முன்வைக்கப்பட்டுள்ளன.

சென்னை மாநகராட்சி வட்டங்களுக்கு 10 ஆயிரம் வாக்காளர்களும், பிற மாநகராட்சிகளின் வட்டங்களுக்கு 5 ஆயிரம் வாக்காளர்களும் என்ற வரம்புகள் நிர்ணயிக்கப்பட்டுள்ளதாகத் தகவல் தெரிவிக்கிறது.

இந்த விதிமுறைகளை மீறி அமைப்புகளைப் பிரித்தால் நடவடிக்கை எடுக்கப்படும் எனக் கட்சித் தலைமை எச்சரித்துள்ளதாகக் கூறப்படுகிறது. மறுசீரமைப்புப் பணிகளில் தனிப்பட்ட விருப்பங்களுக்கு இடமளிக்காமல், ஒரே சீரான நிர்வாக அமைப்பை உருவாக்குவதே தலைமையின் நோக்கமாக இருப்பதாகக் கட்சி வட்டாரங்கள் தெரிவிக்கின்றன.

இதையும் படிங்க: ஊழல் டீல் முடிக்கவா பக்கத்து ஸ்டேட்டுக்கு பறந்தீங்க? முதல்வர் விஜய்யை நோக்கி பாய்ந்த உதயநிதி!