உள்ளடி வேலை கண்டிப்பா நடக்கும்?! தேஜ கூட்டணியில் இணைய ஓபிஎஸ், டிடிவி தயக்கம்!

சென்னை: 2026 சட்டமன்றத் தேர்தலுக்கான தேசிய ஜனநாயகக் கூட்டணியில் (தேஜக) மீண்டும் இணைய முன்னாள் முதல்வர் ஓ. பன்னீர்செல்வமும் (OPS), அமமுக பொதுச்செயலர் டி.டி.வி. தினகரனும் தயக்கம் காட்டுவதாக தகவல்கள் வெளியாகியுள்ளன. 

அதிமுக பொதுச்செயலர் எடப்பாடி பழனிசாமி (EPS) தலைமையிலான கூட்டணியில் இணைந்தால், தங்கள் தரப்பினர் போட்டியிடும் தொகுதிகளில் தேர்தல் பணிகளை செய்யாமல் உள்ளடி வேலைகள் நடத்தி தோற்கடித்துவிடுவார்கள் என்ற அச்சமே இத்தயக்கத்துக்கு காரணம் என்று அவர்களது ஆதரவாளர்கள் தெரிவித்தனர்.

கடந்த மக்களவைத் தேர்தலில் பாஜக தலைமையிலான தேஜக கூட்டணியில் பாமக, அமமுக, OPS அணி உள்ளிட்டவை இடம்பெற்றன. தனித்து போட்டியிட்ட அதிமுகவுடன் தேமுதிக இணைந்திருந்தது. தற்போது அதிமுக-பாஜக கூட்டணி உறுதியான நிலையில், முந்தைய கூட்டணி கட்சிகளை ஒருங்கிணைத்து தமிழகத்தில் தேஜகவை பலப்படுத்த பாஜக முயற்சித்து வருகிறது.

இதையும் படிங்க: தவெக கூட்டணியில் அமமுக?! தமிழகத்தில் 4முனை போட்டி தான்!! டிடிவி ஓபன் டாக்!

ஆனால், அமமுக பொதுச்செயலர் தினகரன், அதிமுகவின் பழனிசாமி முதல்வர் வேட்பாளராக இருக்கும் வரை கூட்டணியில் இணைய மாட்டேன் என்று திட்டவட்டமாக கூறிவிட்டார். அதேபோல், அதிமுகவில் மீண்டும் இணைய OPS எடுத்த முயற்சிகள் பலனளிக்கவில்லை. பாஜக மேலிடம் பழனிசாமியிடம் பேசியும் நிபந்தனைகள் காரணமாக இணைப்பு இழுபறியில் உள்ளது.

சமீபத்தில் டெல்லி சென்று அமித் ஷாவை சந்தித்த OPS, தனது ஆதரவாளர்களுடனான ஆலோசனைக் கூட்டத்தை டிசம்பர் 23க்கு ஒத்திவைத்துள்ளார். அதிமுக பொதுக்குழுவில் 'தமிழக தேஜக கூட்டணியில் கட்சிகளை சேர்க்கும் முடிவை பழனிசாமியே எடுப்பார்' என்ற தீர்மானம் நிறைவேற்றப்பட்டுள்ளது. இதனால், கூட்டணியில் மீண்டும் இணைய OPS தயக்கம் காட்டுவதாக கூறப்படுகிறது.

OPS மற்றும் தினகரன் ஆதரவாளர்கள் கூறுகையில், கூட்டணியில் பழனிசாமி தலைமை வகிப்பதால், பாஜகவுக்கு ஒதுக்கப்படும் தொகுதிகளில் இருந்து சிலவற்றை மட்டுமே தங்களுக்கு வழங்குவார். இரட்டை இலை சின்னத்தில் போட்டியிடவும் முடியாது. மேலும், தங்கள் தரப்பினர் போட்டியிடும் தொகுதிகளில் பழனிசாமி ஆதரவாளர்கள் உள்ளடி வேலை செய்து தோற்கடிப்பார்கள் என்ற அச்சம் உள்ளது. இதனால் இருவரும் தேஜக கூட்டணியில் இணைய தயக்கம் காட்டுகின்றனர்.

இதற்கிடையில், தவெக அல்லது திமுக கூட்டணியில் இணைய பேச்சுவார்த்தை நடத்தி வருகின்றனர். ஆனால், அக்கட்சிகளில் இருந்து நேர்மறையான சமிக்ஞை இல்லை என்று ஆதரவாளர்கள் தெரிவித்தனர்.

திமுகவை எதிர்கொள்ள தேஜக கூட்டணியை பலப்படுத்த வேண்டிய கட்டாயத்தில் பாஜக உள்ள நிலையில், இந்த தயக்கம் கூட்டணிக்கு சவாலாக அமையலாம் என அரசியல் வட்டாரங்கள் கூறுகின்றன.

இதையும் படிங்க: கூட்டணி கட்சிகளுக்கு 100! அதிமுகவுக்கு 134!! எடப்பாடி பழனிசாமி தேர்தல் கணக்கு!