திமுக ஆட்சியை அகற்றும் கூட்டணியில் புதிய தமிழகம் - டாக்டர் கிருஷ்ணசாமி அதிரடி!

திண்டுக்கல் மாவட்டம் நிலக்கோட்டையில் 2026 சட்டமன்றத் தேர்தலை முன்னிட்டுப் புதிய தமிழகம் கட்சியின் செயல்வீரர்கள் மற்றும் வாக்குச்சாவடி முகவர்கள் (BLA-2) கூட்டம் இன்று நடைபெற்றது. இக்கூட்டத்தில் கலந்துகொண்ட அக்கட்சியின் நிறுவனர் டாக்டர் கிருஷ்ணசாமி, வரும் தேர்தலில் கட்சியின் நிலைப்பாடு குறித்துச் செய்தியாளர்களிடம் விளக்கமளித்தார்.

"தமிழகத்தில் கடந்த நான்கே முக்கால் ஆண்டுகளாக நடைபெற்று வரும் திமுக ஆட்சியில் ஊழல் மலிந்துவிட்டது. முக்கியமானத் துறைகளைக் கவனித்து வரும் நான்கு அமைச்சர்கள் மீது அமலாக்கத்துறையினர் (ED) ஊழல் குற்றச்சாட்டுகளைச் சுமத்தியுள்ளனர். எங்களை யாரும் விசாரிக்கக் கூடாது, நாங்கள் கொள்ளையடித்துக் கொண்டேதான் இருப்போம் என்ற ஆணவத்தில் திமுக அரசு செயல்பட்டு வருகிறது.

சமூக நீதி என்று பேசும் திமுக அரசு, உண்மையில் அமைச்சர்களின் உறவினர்களுக்கும் பணக்காரர்களுக்கும் மட்டுமே சேவை செய்து வருகிறது. விளிம்பு நிலை மக்களுக்கும், தேவேந்திர குல வேளாளர் மக்களுக்கும் இந்த ஆட்சியில் எந்த நன்மையும் கிடைக்கவில்லை. ஏழை எளிய மக்களின் உணர்வுகளைத் திமுக அரசு மதிக்கவில்லை.

இதையும் படிங்க: திமுக ஒரு இலக்க இடங்களிலேயே சுருங்கும்!  மதுரையில் அன்புமணி ராமதாஸ் காட்டம்!

"ஊழல் மிகுந்த இந்த ஆட்சியை அகற்ற வேண்டியது காலத்தின் கட்டாயம். சாதாரணப் பொதுமக்களையும், குறிப்பாக தேவேந்திர குல வேளாளர் மக்களையும் சரிசமமாக நடத்தும் மற்றும் ஆட்சி அதிகாரத்தில் உரியப் பங்கு வழங்கும் வலிமைமிக்க ஒரு கூட்டணியில் புதிய தமிழகம் கட்சி அங்கம் வகிக்கும். அத்தகையக் கூட்டணி அரசு அமைவதை நாங்கள் உறுதி செய்வோம்" என டாக்டர் கிருஷ்ணசாமி தெரிவித்தார்.

இந்தக் கூட்டத்தில் திண்டுக்கல் மாவட்டத்தைச் சேர்ந்த ஆயிரக்கணக்கானப் புதிய தமிழகம் கட்சி நிர்வாகிகள் மற்றும் தொண்டர்கள் கலந்துகொண்டனர். 2026 தேர்தலில் யாருடன் கூட்டணி என்பது குறித்த அதிகாரப்பூர்வ அறிவிப்பைச் சரியான நேரத்தில் வெளியிடுவோம் என்றும் அவர் குறிப்பிட்டார்.

இதையும் படிங்க: கலெக்டரும், எஸ்.பி-யும் போன் எடுப்பதில்லை! கரூர் மணல் கொள்ளை குறித்து எம்.ஆர்.விஜயபாஸ்கர் ஆவேசம்!