“தவறு செய்தது என்டிஏ... தண்டனை மாணவர்களுக்கா?” நெட் மறுதேர்வை கண்டித்து ராகுல் ஆவேசம்!

தேசிய தேர்வு முகமை (NTA) நடத்திய யுஜிசி நெட் தேர்வில் ஏற்பட்ட குளறுபடிகளால் ஆங்கிலம், வணிகவியல் மற்றும் சமூகவியல் பாடங்களுக்கு மறுதேர்வு அறிவிக்கப்பட்டுள்ள நிலையில், காங்கிரஸ் எம்.பி.யும் மக்களவை எதிர்க்கட்சித் தலைவருமான ராகுல் காந்தி, என்டிஏவையும் மத்திய அரசையும் கடுமையாக விமர்சித்துள்ளார்.

யுஜிசி நெட் தேர்வுகள் ஜூன் 22 முதல் 30-ம் தேதி வரை நடைபெற்றதாகவும், தேர்வு வினாத்தாளில் ஏற்பட்ட பல்வேறு தவறுகள் தொடர்பான புகார்களைத் தொடர்ந்து தற்போது மூன்று பாடங்களுக்கும் மறுதேர்வு அறிவிக்கப்பட்டுள்ளதாகவும் ராகுல் குறிப்பிட்டுள்ளார். தேர்வு முடிந்து ஏறக்குறைய இரண்டு மாதங்களுக்குப் பிறகு இந்த முடிவு எடுக்கப்பட்டிருப்பது மாணவர்களுக்கு பெரும் சிரமத்தை ஏற்படுத்தும் என்றும் அவர் தெரிவித்துள்ளார்.

பல ஆண்டுகளாக தேர்வுக்கு தயாராகி, விண்ணப்பக் கட்டணம் செலுத்தி, தொலைதூரத்தில் அமைக்கப்பட்ட தேர்வு மையங்களுக்கு சென்று தேர்வு எழுதிய ஆயிரக்கணக்கான மாணவர்கள், தற்போது மீண்டும் செப்டம்பர் மாதத்தில் தேர்வை எதிர்கொள்ள வேண்டிய நிலைக்கு தள்ளப்பட்டுள்ளதாக ராகுல் கூறியுள்ளார்.

இதையும் படிங்க: UGC NET மறுதேர்வு அறிவிப்பு: 3 பாடங்களுக்கு மீண்டும் தேர்வு – வினாத்தாளில் இத்தனை குளறுபடிகளா?

வினாத்தாளில் தவறான தகவல்கள் இடம்பெற்றது, பழைய கேள்விகள் மீண்டும் கேட்கப்பட்டதாக எழுந்த புகார்கள் உள்ளிட்ட காரணங்களால் மறுதேர்வு நடத்தப்படுவதாக கூறப்படும் நிலையில், “தவறு செய்வது என்டிஏ; அதன் விளைவுகளை அனுபவிப்பது மாணவர்கள்” என்ற வகையில் ராகுல் விமர்சித்துள்ளார்.

மேலும், தேர்வு அமைப்பில் ஏற்பட்ட தவறுகளுக்கு உரிய பொறுப்புக்கூறல் இருக்க வேண்டும் என்றும் அவர் வலியுறுத்தியுள்ளார். மத்திய கல்வி அமைச்சர் தர்மேந்திர பிரதான் பதவி விலகுவது மட்டுமே போதாது என்றும், என்டிஏவின் உயர்மட்ட நிர்வாகத்தினரும் பொறுப்பேற்க வேண்டும் என்றும் ராகுல் தெரிவித்துள்ளார்.

செப்டம்பரில் மீண்டும் தேர்வு எழுத உள்ள மாணவர்களுக்கு தனது ஆதரவை தெரிவித்துள்ள ராகுல், பிரச்னை மாணவர்களிடம் இல்லை என்றும், தேர்வை முறையாக நடத்தத் தவறிய அமைப்பின் செயல்பாடுகள்தான் கேள்விக்குறியாகியுள்ளதாகவும் தெரிவித்துள்ளார்.

மாணவர்களின் பல மாத உழைப்பு மற்றும் தயாரிப்புகள் பாதிக்கப்பட்டுள்ளதாகவும், இந்த விவகாரத்தில் பிரதமர் மோடி பதிலளிக்கும் வரை காங்கிரஸ் தொடர்ந்து கேள்வி எழுப்பும் என்றும் ராகுல் கூறியுள்ளார்.

இதற்கிடையே, மூன்று பாடங்களுக்கான மறுதேர்வு அறிவிப்பு மாணவர்களிடையே கலவையான எதிர்வினைகளை ஏற்படுத்தியுள்ளது. தேர்வு முறைகேடுகள் மற்றும் வினாத்தாள் குளறுபடிகளுக்கு நிரந்தர தீர்வு காண வேண்டும் என்றும், எதிர்காலத்தில் இதுபோன்ற பிரச்னைகள் ஏற்படாத வகையில் தேர்வு நடைமுறைகளை வலுப்படுத்த வேண்டும் என்றும் மாணவர்கள் தரப்பில் எதிர்பார்ப்பு எழுந்துள்ளது.

இதையும் படிங்க: UGC NET மறுதேர்வு அறிவிப்பு: 3 பாடங்களுக்கு மீண்டும் தேர்வு – வினாத்தாளில் இத்தனை குளறுபடிகளா?