விஜய் மீது எனக்கு பொறாமையா? திமுக - அதிமுக கூட்டணி அமைக்க ட்ரை பண்ணேன்னா? ரஜினிகாந்த் ஓபன் டாக்!

சென்னை: போயஸ் தோட்டத்தில் இன்று செய்தியாளர்களை சந்தித்த நடிகர் ரஜினிகாந்த், தமிழக சட்டசபைத் தேர்தல் முடிவுகளுக்குப் பிறகு தன்மீது எழுந்த விமர்சனங்கள் குறித்து விரிவாக விளக்கமளித்தார்.

தேர்தல் முடிவுகள் அறிவிக்கப்பட்ட உடனேயே முன்னாள் முதல்வர் மு.க. ஸ்டாலினை சந்தித்ததாகவும், அதை அரசியல் ரீதியாக சிலர் தவறாக சித்தரிப்பதாகவும் அவர் குறிப்பிட்டார். “கொள்கை, அரசியலுக்கு அப்பாற்பட்டு எங்களது நட்பு 40 ஆண்டுகளுக்கு மேல் பழையது. வெற்றி, தோல்வி சகஜம். நட்பு ரீதியில்தான் ஸ்டாலினை சந்தித்தேன்” என்றார்.

விஜய் முதல்வராவதைத் தடுக்க அதிமுக-திமுக இடையே கூட்டணி ஆட்சி அமைய ரஜினி பேச்சுவார்த்தை நடத்தியதாக பரவிய வதந்திகளை ரஜினி உறுதியாக மறுத்தார். “விஜய் முதல்வராவதை தடுக்க இரு பெரிய கட்சிகளுடன் பேச்சுவார்த்தை நடத்தும் அளவுக்கு தரங்கெட்ட ஆளு இந்த ரஜினி இல்லை. எனக்கு விஜய் மீது என்ன பொறாமை? அவருக்கும் எனக்கும் 28 வயது வித்தியாசம். அவர் வெற்றி பெற்ற உடனே எக்ஸ் தளத்தில் வாழ்த்து தெரிவித்தேன்” என்று தெளிவாகக் கூறினார்.

இதையும் படிங்க: இக்கட்டான சூழலிலும் உங்களுடன் நான் இருப்பேன்!! மு.க.ஸ்டாலினை நேரில் சந்தித்தார் ரஜினிகாந்த்!

மேலும், “ஒருவேளை கமல்ஹாசன் முதல்வராகியிருந்தால் கூட எனக்கு பொறாமை வந்திருக்குமா எனத் தெரியவில்லை. ஏனென்றால் அவருடன் நடித்துக் கொண்டிருக்கும் படம் போய்விடுமோ என்றுதான் நினைத்திருப்பேன்” என்று நகைச்சுவையுடன் சொன்னார்.

விஜய் தனியாகப் போட்டியிட்டு பெரும் வெற்றி பெற்றதைப் பாராட்டிய ரஜினி, “எம்.ஜி.ஆர்., என்.டி.ஆர். ஆகியோரை விட அதிக இடங்களில் வெற்றி பெற்றுள்ளார். நான் அரசியலுக்கு வந்திருந்தால் 100 சதவீதம் வென்றிருப்பேன். ஏன் வரவில்லை என்பதை 3 பக்க அறிக்கையில் தெளிவுபடுத்தியிருந்தேன்” என்றார்.

கமல்ஹாசனை சந்திக்காதது குறித்தும் ரஜினி விளக்கம் அளித்தார். “விஜய்-கமல் சந்தித்துவிட்டார்கள். நடிகர் சங்கம், தயாரிப்பாளர் சங்கம் எல்லாம் பார்த்துவிட்டார்கள். சம்பிரதாயத்திற்காக மட்டும் சந்திக்க எனக்கு விருப்பமில்லை” என்று தெரிவித்தார்.

தமிழக அரசியலில் முதல் முறையாக அதிமுகவும் திமுகவும் எதிர்க்கட்சி வரிசையில் அமர்ந்துள்ள நிலையில், 108 இடங்களை வென்ற த.வெ.க. தலைவர் விஜய் கூட்டணி ஆதரவுடன் முதல்வராகியுள்ளார் என்பது குறிப்பிடத்தக்கது.

இதையும் படிங்க: மகள்களுடன் ஜனநாயக கடமையாற்றிய ரஜினி, கமல், குஷ்பு... சென்னையில் விறுவிறுப்பாகும் நட்சத்திரங்களின் வாக்குப்பதிவு...!