களையெடுக்கும் ராமதாஸ்! புதுச்சேரி நிர்வாகிகள் கலக்கம்! வேறு கட்சிகளுக்கு தாவ திட்டம்!!

பாட்டாளி மக்கள் கழகம் (பா.ம.க.) நிறுவனர் டாக்டர் ராமதாஸ், கட்சியின் ஐந்து முக்கிய நிர்வாகிகளை உடனடியாக நீக்கியுள்ளார். இதில் புதுச்சேரி மாநில அமைப்பாளர் கணபதியும் ஒருவர்.

ராமதாஸ் வெளியிட்ட அறிக்கையில், “தொடர்ந்து கட்சிக்கு அவப்பெயர் ஏற்படுத்தும் வகையில் செயல்பட்டு வருவதால்” செங்கல்பட்டு மத்திய மாவட்ட செயலர் ஜனார்த்தனம், கள்ளக்குறிச்சி மேற்கு மாவட்ட செயலர் பப்லு, கள்ளக்குறிச்சி கிழக்கு மாவட்ட செயலர் ஜெகன், ஒருங்கிணைந்த வேலூர் மாவட்ட அமைப்பு செயலர் கிருஷ்ணன், புதுச்சேரி மாநில அமைப்பாளர் கணபதி ஆகிய ஐந்து பேரும் கட்சியின் அடிப்படை உறுப்பினர் உள்ளிட்ட அனைத்து பொறுப்புகளிலிருந்தும் நீக்கப்படுவதாக அறிவித்தார்.

ராமதாஸ் சமீபத்தில் சசிகலா தொடங்கிய அனைத்திந்திய புரட்சித் தலைவர் மக்கள் முன்னேற்றக் கழகத்துடன் கூட்டணி அமைத்துள்ளார். தி.மு.க. மற்றும் அ.தி.மு.க. போன்ற பெரிய கட்சிகளின் கூட்டணியில் இடம் கிடைக்காததால் எடுக்கப்பட்ட இந்த முடிவு, பா.ம.க.வுக்குள் பெரும் அதிருப்தியை ஏற்படுத்தியுள்ளது.

இதையும் படிங்க: பூரண மதுவிலக்கு... ஒரு கோடி இளைஞர்களுக்கு வேலைவாய்ப்பு..!! தேர்தல் அறிக்கையை வெளியிட்ட அன்புமணி..!!

இந்தக் கூட்டணிக்கு எதிர்ப்பு தெரிவித்து பல நிர்வாகிகள் கட்சியை விட்டு வெளியேறும் நிலை ஏற்பட்டுள்ளது. ஜி.கே.மணியின் மகன் தமிழ்க்குமரன் ஏற்கனவே காங்கிரஸில் இணைந்துவிட்டார். புதுச்சேரி மாநில அமைப்பாளர் கணபதி உள்ளிட்டோர் சமீபத்தில் அன்புமணியை சந்தித்து ஆதரவு தெரிவித்திருந்தனர். இந்த சந்திப்பு ராமதாஸ் அணியில் பெரும் பரபரப்பை ஏற்படுத்தியது.

இந்த நிலையில் தான் ராமதாஸ், ஐந்து நிர்வாகிகளையும் ஒரே நேரத்தில் கட்சியிலிருந்து நீக்கும் கடும் நடவடிக்கையை எடுத்துள்ளார். இந்த நீக்கம் பா.ம.க.வின் உள் பிரச்சனைகளை மேலும் வெளிச்சத்துக்கு கொண்டு வந்துள்ளது.

தேர்தல் நெருங்கும் நேரத்தில் பா.ம.க.வில் ஏற்பட்டுள்ள இந்த உள் கலகம் மற்றும் நீக்கங்கள், கட்சியின் ஒற்றுமையை பாதிக்கும் என அரசியல் வட்டாரங்கள் கருதுகின்றன. ராமதாஸின் இந்த திடீர் நடவடிக்கை மீதும், அவரது கூட்டணி முடிவு மீதும் பா.ம.க. தொண்டர்கள் மத்தியில் பல்வேறு கருத்துகள் எழுந்துள்ளன.

வரும் சட்டமன்றத் தேர்தலில் பா.ம.க. எப்படி செயல்படப் போகிறது என்பது இப்போது பெரும் கேள்வியாக உள்ளது.

இதையும் படிங்க: சூடுபிடிக்கும் எலக்ஷன்..! களமாடும் அன்புமணி... பாமக தேர்தல் அறிக்கை நாளை வெளியீடு..!!