பறிபோகும் ராஜ்யசபா எம்.பி சீட்! பரிதாப நிலையில் மாநில கட்சிகள்!! வளைத்துபோடும் பாஜக!!

புது டெல்லி: இந்திய நாடாளுமன்றத்தின் மேலவையான ராஜ்யசபாவில் மாநிலக் கட்சிகளின் (பிராந்தியக் கட்சிகள்) உறுப்பினர்கள் எண்ணிக்கை தொடர்ந்து குறைந்து வருவது அரசியல் வட்டாரத்தில் பெரும் கவலையை ஏற்படுத்தியுள்ளது.

அடுத்த இரு ஆண்டுகளில் பல மாநிலக் கட்சிகளுக்கு ராஜ்யசபாவில் உறுப்பினர்களைத் தேர்ந்தெடுப்பது கூட கடினமாகிவிடும் நிலை உருவாகியுள்ளது. ராஜ்யசபா உறுப்பினர்கள் மாநில சட்டமன்ற உறுப்பினர்களால் தேர்ந்தெடுக்கப்படுவதால், சட்டமன்றத்தில் போதிய பலம் இல்லாத கட்சிகளால் ராஜ்யசபாவுக்கு உறுப்பினர்களை அனுப்ப முடியாது என்பதே இதற்குக் காரணம்.

உத்தவ் தாக்கரே தலைமையிலான சிவசேனா (யுபிடி) கட்சிக்கு தற்போது ராஜ்யசபாவில் இரண்டு உறுப்பினர்கள் உள்ளனர். இதில் பிரியங்கா சதுர்வேதியின் பதவிக்காலம் 2026 ஏப்ரலிலும், சஞ்சய் ராவத்தின் பதவிக்காலம் 2028 ஜூலையிலும் முடிவடைகிறது. 

இதையும் படிங்க: கமல் கேள்விக்கு கட்காரி பதில்! ராஜ்யசபாவில் சுவாரஸ்யம்! எத்தனால் கலப்பு பெட்ரோலால் பாதிப்பு?

இவர்களுக்குப் பிறகு இந்தக் கட்சியில் இருந்து ராஜ்யசபாவுக்கு உறுப்பினர்களை அனுப்புவது சிரமமாகும். ஏனெனில் மகாராஷ்டிரா சட்டமன்றத்தில் இந்தக் கட்சிக்கு போதிய எம்.எல்.ஏ.க்கள் இல்லை.

அதேபோல, மாயாவதி தலைமையிலான பகுஜன் சமாஜ் கட்சிக்கு (பிஎஸ்பி) தற்போது ராஜ்யசபாவில் ஒரே ஒரு உறுப்பினர் மட்டுமே உள்ளார். அவரது பதவிக்காலம் 2026 நவம்பரில் முடிவடைகிறது. உத்தரப் பிரதேச சட்டமன்றத்தில் போதிய எம்.எல்.ஏ.க்கள் இல்லாததால், இவருக்குப் பிறகு பிஎஸ்பி உறுப்பினரை ராஜ்யசபாவுக்கு அனுப்ப முடியாது.

ஜம்மு-காஷ்மீர் முன்னாள் முதல்வர் மெஹபூபா முப்தி தலைமையிலான மக்கள் ஜனநாயகக் கட்சிக்கு (பிடிபி) ராஜ்யசபாவில் ஒரு உறுப்பினர் கூட இல்லை. அதிமுகவுக்கு தற்போது நான்கு ராஜ்யசபா உறுப்பினர்கள் உள்ளனர். ஆனால் 2026 தமிழக சட்டமன்றத் தேர்தலில் வெற்றி பெற்றால் மட்டுமே அக்கட்சி ராஜ்யசபாவுக்கு உறுப்பினர்களை மீண்டும் அனுப்ப முடியும்.

லாலு பிரசாத் யாதவின் ராஷ்ட்ரீய ஜனதா தளம் (ஆர்ஜேடி), அகிலேஷ் யாதவின் சமாஜ்வாதி கட்சி (எஸ்பி), இடதுசாரிக் கட்சிகள் உள்ளிட்ட பல மாநிலக் கட்சிகளும் இதே நிலையை எதிர்கொண்டுள்ளன. இண்டியா கூட்டணிக்கு ராஜ்யசபாவில் 80 உறுப்பினர்கள் உள்ளனர். இதில் காங்கிரசுக்கு 27 உறுப்பினர்கள் உள்ளனர். ஆனால் வரும் ஆண்டுகளில் காங்கிரஸ் உறுப்பினர்களின் எண்ணிக்கையும் குறையும் என எதிர்பார்க்கப்படுகிறது.

மறுபக்கம், பாஜக தலைமையிலான தேசிய ஜனநாயக கூட்டணிக்கு (என்டிஏ) ராஜ்யசபாவில் 133 உறுப்பினர்கள் உள்ளனர். இதில் பாஜகவுக்கு மட்டும் 103 உறுப்பினர்களும், நியமன உறுப்பினர்கள் 7 பேரும் அடங்குவர். பல மாநிலங்களில் பாஜக ஆட்சியில் உள்ளதால், வரும் ஆண்டுகளில் என்டிஏவின் எண்ணிக்கை மேலும் அதிகரிக்கும் என கூறப்படுகிறது.

பிரதமர் மோடி 'காங்கிரஸ் இல்லாத பாரதம்' என்று கூறி வரும் நிலையில், தற்போதைய போக்கைப் பார்க்கும்போது 'மாநிலக் கட்சிகள் இல்லாத பாரதம்' என்ற நிலை உருவாகிவிடும் அபாயம் உள்ளது. இருப்பினும், துணை ஜனாதிபதியும் ராஜ்யசபா தலைவருமான சி.பி. ராதாகிருஷ்ணன், மாநிலக் கட்சி உறுப்பினர்கள் பேச அதிக நேரம் ஒதுக்குவது போன்ற நடவடிக்கைகள் அக்கட்சிகளுக்கு சற்று ஆறுதல் அளிப்பதாக உள்ளது.

இந்த மாற்றங்கள் இந்திய அரசியலின் கூட்டாட்சித் தன்மையை பாதிக்கும் என்பதால், அரசியல் நிபுணர்கள் கவலை தெரிவித்துள்ளனர். ராஜ்யசபா மாநிலங்களின் பிரதிநிதித்துவத்தை உறுதி செய்யும் அவையாக இருப்பதால், மாநிலக் கட்சிகளின் பலவீனம் தேசிய அரசியலில் பெரும் தாக்கத்தை ஏற்படுத்தும் என்பது உறுதி.

இதையும் படிங்க: அன்றும், இன்றும், என்றும் எங்கள் வாத்தியார்! எம்.ஜி.ஆர். நினைவு நாளில் எடப்பாடி பழனிசாமி உருக்கம்!