பெட்டியின் மாயாஜாலத்தில் மயங்கிய சத்யபாமா: டெபாசிட் இழக்கச் செய்யுங்கள் - எடப்பாடி பழனிசாமி ஆவேசம்!

ஆளும்கட்சியினர் வீசிய கரன்சிப் பெட்டியின் மாயாஜாலத்தில் மயங்கித் தன்னை வளர்த்து ஆளாக்கிய இயக்கத்திற்கும், தனக்கு வாக்களித்த தொகுதி மக்களுக்கும் பச்சைத் துரோகம் இழைத்துள்ள முன்னாள் எம்.பி சத்யபாமாவுக்கு வரும் இடைத்தேர்தலில் பொதுமக்கள் தங்களது வாக்குகள் மூலம் மிகச் சரியான பாடத்தைப் புகட்ட வேண்டும் என்றும், மக்களின் வாக்குகளைச் சுயநலத்திற்காகப் பேரம் பேசி விற்ற அவரை இந்தத் தேர்தலில் டெபாசிட் இழக்கச் செய்து விரட்டியடிக்க வேண்டும் என்றும் அனைத்திந்திய அண்ணா திராவிட முன்னேற்றக் கழகத்தின் பொதுச்செயலாளரும் எதிர்க்கட்சித் தலைவருமான எடப்பாடி கே. பழனிசாமி மிக ஆவேசமாக முழங்கியுள்ளார்.

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தலை முன்னிட்டு, அதிமுக மற்றும் கூட்டணிக் கட்சி வேட்பாளரை ஆதரித்துப் பிரம்மாண்ட தேர்தல் பிரச்சாரப் பொதுக்கூட்டத்தில் கலந்துகொண்டு உரையாற்றிய எடப்பாடி பழனிசாமி, ஆளும்கட்சியின் தூண்டுதலால் கட்சி தாவிய நிர்வாகிகளைக் கடுமையாகத் தோலுரித்துப் பேசினார். 

அதிமுக என்ற மாபெரும் மக்கள் இயக்கம் ஒரு சாதாரணத் தொண்டராக இருந்த சத்யபாமாவை அடையாளம் கண்டு, நாடாளுமன்ற உறுப்பினர் என்ற உச்சபட்ச பதவியை வழங்கி அழகு பார்த்தது. ஆனால், பதவி சுகத்தையும் பணப் பெட்டியின் மாயாஜால கவர்ச்சியையும் மட்டுமே நம்பி வாழும் சுயநலவாதிகள், ஆளும்கட்சியினர் காட்டிய பெட்டியின் மாயாஜாலத்தில் மயங்கி ஒட்டுமொத்தமாகச் சரணடைந்து விட்டார்கள். மக்கள் தங்களுக்கு அளித்த வாக்குகளை, தங்களது சுயலாபத்திற்காக ஆளும்கட்சியிடம் விற்றுவிட்டு இன்று வாக்குக் கேட்டு வரும் துரோகிகளுக்கு மக்கள் தகுந்த பாடம் புகட்ட வேண்டும்" என்று சாட்டையடி கொடுத்தார்.

இதையும் படிங்க: சபாநாயகர் இருக்கையில் அமர்ந்த முதல் பெண் சத்யபாமா? வரலாறு சொல்லும் உண்மை என்ன?

தொடர்ந்து தவெக மற்றும் திமுகவின் சந்தர்ப்பவாத அரசியல் கூட்டணிகளைச் சாடிய அவர், "தேர்தலில் வாக்களித்த வாக்காளர்களின் விரல் நகத்தில் உள்ள மை காய்வதற்குள், மக்கள் பிரதிநிதிகளை விலைபேசி இழுக்கும் இழிவான குதிரை பேர அரசியலைத் தமிழ்நாட்டில் அரங்கேற்றி வருகிறார்கள். மக்கள் பிரச்சனைகளைத் தீர்க்கத் திராணியற்ற இந்த அரசு, மாற்றுக்கட்சித் தலைவர்களை விலைக்கு வாங்குவதிலேயே குறியாக இருக்கிறது. 

தாராபுரம் தொகுதியின் வளர்ச்சியைப் புறக்கணித்து, மக்களின் நம்பிக்கையைக் காலில் போட்டு மிதித்த துரோகிகளுக்கு இந்த இடைத்தேர்தலில் மக்கள் சம்மட்டி அடி கொடுக்க வேண்டும். மக்கள் விரோத ஆட்சியாளர்களுக்கும், பணத்திற்கு விலைபோன துரோகிகளுக்கும் முற்றுப்புள்ளி வைக்கும் வகையில் சத்யபாமாவை டெபாசிட் இழக்கச் செய்து, அதிமுக வேட்பாளரைப் பெருவாரியான வாக்குகள் வித்தியாசத்தில் வெற்றி பெற வைக்க வேண்டும்" என்று பொதுமக்களிடம் உணர்ச்சிபொங்க வேண்டுகோள் விடுத்தார்.

இதையும் படிங்க: இடைத்தேர்தலில் திமுக வெற்றி பெற்றால்.. இது நிச்சயம் நடக்கும்!! ஆர்.எஸ் பாரதி பரபரப்பு கருத்து!!