செந்தில் பாலாஜி சகோதரர் மீதான நடவடிக்கையில் ஏன் தாமதம்? 3 வருஷமா நிலுவையில் உள்ள வழக்கு? ஐகோர்ட் காட்டம்!

கரூரில் 2023 மே 26ஆம் தேதி முன்னாள் அமைச்சர் செந்தில் பாலாஜி தொடர்புடைய இடங்களில் வருமான வரித்துறை அதிகாரிகள் சோதனை நடத்தியபோது ஏற்பட்ட பதற்றம் தொடர்பான வழக்கில், அவரது சகோதரர் அசோக்குமார் தாக்கல் செய்த முன்ஜாமீன் மனு மதுரை உயர் நீதிமன்றக் கிளையில் விசாரணைக்கு வந்தது.

சம்பவத்தன்று அதிகாரிகளைத் தடுத்து, தவறான வார்த்தைகளால் திட்டி, லேப்டாப் மற்றும் பென்டிரைவ் ஆகியவற்றைப் பறித்துச் சென்றதாக கரூர் டவுன் போலீசார் வழக்குப் பதிவு செய்திருந்தனர். இந்த வழக்கில் தனது பெயர் தாமதமாகச் சேர்க்கப்பட்டதாகவும், ஆட்சி மாற்றத்திற்குப் பின் அரசியல் உள்நோக்கத்துடன் இணைக்கப்பட்டதாகவும் அசோக்குமார் கூறியுள்ளார். 

மதுரை உயர் நீதிமன்றக் கிளையில் நீதிபதி பி.தனபால் முன்பு இன்று மனு விசாரணைக்கு வந்தது. அசோக்குமார் தரப்பில் ஆஜரான வழக்கறிஞர், “சம்பவம் நடைபெற்ற நேரத்தில் மனுதாரர் அங்கு இல்லை. பிரச்னையைத் தூண்டினார் என்கிற குற்றச்சாட்டின் அடிப்படையில் மட்டுமே பெயர் சேர்க்கப்பட்டுள்ளது. இது அரசியல் பழிவாங்கல்” என்று வாதிட்டார்.

இதையும் படிங்க: செந்தில்பாலாஜிக்கு தூது விட்ட எடப்பாடி பழனிசாமி! மீண்டும் அதிமுகவுக்கு அழைப்பு?! வேலுமணிக்கு செக்

அரசுத் தரப்பு வழக்கறிஞர் பதில் மனு தாக்கல் செய்ய அவகாசம் கோரினார். இதை விசாரித்த நீதிபதி, “வழக்கு ஏற்கெனவே மூன்று ஆண்டுகளாக நிலுவையில் உள்ளது. இப்போது தான் போலீசார் தீவிரம் காட்டுவது ஏன்? கொலை வழக்குகளில் கூட மறுநாளே பதில் மனு தாக்கல் செய்யப்படுகிறது. இந்த வழக்கில் மட்டும் அவகாசம் கேட்பது ஏன்?” எனக் கேள்வி எழுப்பினார். 

இறுதியில் விசாரணையை இன்று ஒத்திவைத்து உத்தரவிட்ட நீதிபதி, விரைவில் வழக்கை முடித்து வைக்க நடவடிக்கை எடுக்க வேண்டும் என்பதை உணர்த்தினார்.

2023இல் நடைபெற்ற வருமான வரி சோதனை தமிழ்நாட்டு அரசியலில் பெரும் பரபரப்பை ஏற்படுத்தியது. அதிகாரிகள் மீது தாக்குதல், பொருட்களைப் பறித்தல் உள்ளிட்ட குற்றச்சாட்டுகள் உள்ள இந்த வழக்கு, தற்போது நீதிமன்ற கவனத்தை ஈர்த்துள்ளது. அசோக்குமார் முன்ஜாமீன் கோரியுள்ள நிலையில், வழக்கின் அடுத்தகட்ட விசாரணை இன்று நடைபெற உள்ளது. 

இந்த வழக்கு தொடர்பாக இரு தரப்பினரும் தங்கள் நிலைப்பாட்டை உறுதியாக முன்வைத்து வருகின்றனர். அரசியல் பின்னணி இருப்பதாக எதிர்க்கட்சிகள் குற்றம்சாட்டும் நிலையில், சட்டத்தின் பார்வையில் வழக்கு எப்படி முன்னேறும் என்பதை நீதிமன்றமே தீர்மானிக்கும். இந்தச் சம்பவம் தமிழ்நாட்டில் அரசியல் - அதிகாரிகள் உறவு குறித்த விவாதங்களையும் எழுப்பியுள்ளது. 

இதையும் படிங்க: செந்தில்பாலாஜி சிக்க காரணமே அந்த ஹார்டு டிஸ்க் தான்! பற்ற வைத்தார் சவுக்கு சங்கர்!