கரையும் அதிமுக! கவலைப்படும் மு.க.ஸ்டாலின்! பழனிசாமி அக்கறை காட்டவில்லை என நிர்வாகிகள் அதிருப்தி!

சென்னை: சட்டசபை தேர்தலில் பெரும் தோல்வியை சந்தித்த அ.தி.மு.க.வில் அதிருப்தி அதிகரித்துள்ள நிலையில், கட்சி பொதுச்செயலர் எடப்பாடி பழனிசாமி அதிருப்தி நிர்வாகிகளிடம் எந்த சமரச பேச்சும் நடத்தாதது பரபரப்பை ஏற்படுத்தியுள்ளது. இதேவேளையில், தி.மு.க. தலைவர் மு.க.ஸ்டாலின் அதிருப்தி அதிமுகவினரிடம் நேரடியாக தொடர்பு கொண்டு பேசி வருவதாக தகவல் வெளியாகியுள்ளது.

தேர்தல் தோல்விக்குப் பிறகு அ.தி.மு.க.வில் இருந்து நான்கு எம்.எல்.ஏ.க்கள் ராஜினாமா செய்து முதல்வர் விஜய் தலைமையிலான த.வெ.க.வில் இணைந்தனர். முன்னாள் அமைச்சர் வேலுமணி உள்ளிட்டோர் பழனிசாமியுடன் மீண்டும் இணைந்தாலும், கட்சிக்குள் அதிருப்தி தொடர்ந்து நிலவுகிறது. முன்னாள் அமைச்சர்கள், எம்.எல்.ஏ.க்கள், மாவட்ட செயலர்கள் உள்ளிட்ட பலர் த.வெ.க. பக்கம் நகர்வது அதிமுகவை வேகமாக பலவீனப்படுத்தி வருகிறது.

இந்தச் சூழலில் பழனிசாமி அதிருப்தி நிர்வாகிகளை அழைத்துப் பேசாததால், தி.மு.க. தரப்பு செயல்படத் தொடங்கியுள்ளது. ஸ்டாலின், அதிருப்தியில் உள்ள முக்கிய அதிமுக நிர்வாகிகளை நேரடியாக தொடர்பு கொண்டு, “உட்கட்சி பிரச்னைகள் வரும், அது தீர்ந்துவிடும். அதற்காக திராவிட பாரம்பரியத்தை விட்டு புதிய கட்சிக்குச் செல்ல வேண்டாம். அங்கு உரிய மரியாதை கிடைக்காது” என ஆறுதல் கூறி வருவதாகக் கூறப்படுகிறது.

இதையும் படிங்க: மக்கள் பிரச்சனைகளுக்கு எப்போ கால்ஷீட்..? போராடனுமா.? ஸ்டாலின் சரமாரி கேள்வி..!

மேலும், “கட்சி மாறும் எண்ணம் உறுதியாக இருந்தால் தி.மு.க.வுக்கு வரலாம். உங்களை அரவணைக்க நான் தயார். உரிய மரியாதையும், நல்ல பதவியும் கிடைக்கும்” என ஸ்டாலின் உறுதியளிப்பதாக தகவல்கள் தெரிவிக்கின்றன. சென்னையைச் சேர்ந்த முன்னாள் அமைச்சர் ஒருவரை ஸ்டாலின் நேரடியாக பேசி தி.மு.க.வில் இணைத்துக்கொண்டதும் இந்தச் செயல்பாட்டின் ஒரு பகுதியாகும்.

ஒரு அதிருப்தி அதிமுக நிர்வாகி கூறுகையில், “பழனிசாமியை சுற்றியுள்ள ஜால்ராக்கள் கொடுக்கும் பட்டியலை வைத்து நீக்கம், நியமனம் என தவறான முடிவுகள் எடுக்கப்படுகின்றன. அதிமுக மீது எதிர்க்கட்சியான திமுகவுக்கு இருக்கும் அக்கறை கூட பழனிசாமிக்கு இல்லாதது வருத்தமளிக்கிறது” என்றார்.

அ.தி.மு.க.வை அழியாமல் காப்பாற்றவோ அல்லது அதன் நிர்வாகிகளை தாய்க் கழகமான தி.மு.க.வுக்கு இழுக்கவோ ஸ்டாலின் முயற்சி மேற்கொள்வதாக அரசியல் வட்டாரங்கள் பார்க்கின்றன. இந்த நகர்வுகள் தமிழக அரசியலில் புதிய சமன்பாடுகளை உருவாக்கும் என எதிர்பார்க்கப்படுகிறது.

இதையும் படிங்க: "ஸ்டாலின் அப்படி சொல்லல"..! திரித்து வெளியிடுறீங்க... தங்கம் தென்னரசு பகிரங்க குற்றச்சாட்டு..!!