பொய் சொல்றதை நிறுத்துங்க! பொறுப்பா இருந்துக்குங்க!! முதல்வர் ஸ்டாலினுக்கு பாஜக வார்னிங்!

தமிழ்நாட்டின் வேகமாக வளரும் நகரங்களான கோவை மற்றும் மதுரையில் மெட்ரோ ரயில் திட்டங்களை மத்திய அரசு நிராகரித்ததாக தமிழ்நாடு முதல்வர் மு.க. ஸ்டாலின் கடுமையாக விமர்சித்துள்ளார். இது தமிழக மக்கள் பாஜகவை நிராகரித்ததற்கான பழிவாங்கல் என்று அவர் குற்றம் சாட்டியுள்ளார். இதற்கு தமிழக பாஜக தரப்பு, "தவறான தகவல்களைப் பரப்பி மக்களை ஏமாற்றாதீர்கள்; மாநில அரசுதான் இதற்கு காரணம்" என்று பதிலடி கொடுத்துள்ளது. இந்தப் பரபரப்பு தமிழக அரசியலில் புதிய சர்ச்சையை ஏற்படுத்தியுள்ளது.

மத்திய அரசின் நிராகரிப்பு: கடந்த நவம்பர் 14 அன்று மத்திய வீட்டுவசதி மற்றும் நகர்புற வளர்ச்சித் துறை அமைச்சகம் (MoHUA) தமிழக அரசுக்கு அனுப்பிய கடிதத்தில், கோவை மற்றும் மதுரை மெட்ரோ திட்டங்களின் விரிவான திட்ட அறிக்கைகளை (DPR) திருப்பி அனுப்பியது. 

காரணம், 2017 மெட்ரோ ரயில் கொள்கைப்படி, நகர்ப்புற மக்கள் தொகை 20 லட்சத்துக்கு மேல் இருக்க வேண்டும். 2011 மக்கள் தொகை கணக்கெடுப்பின்படி, கோவையில் 15.84 லட்சம் மற்றும் மதுரையில் 15 லட்சம் மக்கள் தான் உள்ளனர் என்று அமைச்சகம் கூறியுள்ளது. 

இதையும் படிங்க: கோவை, மதுரைக்கு மெட்ரோ கிடையாதா? கைவிரிக்கும் மத்திய அரசு!! மெட்ரோ நிர்வாகம் விளக்கம்!

இதோடு, பொது போக்குவரத்து பயண நேரமும் மெட்ரோ பயண நேரமும் கிட்டத்தட்ட சமமாக இருப்பதால், மக்கள் மெட்ரோவுக்கு மாற மாட்டார்கள் என்றும், போதிய இடவசதி இல்லாததால் தனியார் கட்டடங்களை அதிகம் இடிக்க வேண்டி வரும்; அதனால் செலவு அதிகரிக்கும் என்றும் குறிப்பிட்டுள்ளது.

அதற்கு மாற்றாக, இரு நகரங்களிலும் தனி பாதையில் பஸ்கள் மட்டும் இயக்கப்படும் பஸ் ரேபிட் டிரான்சிட் சிஸ்டம் (BRTS) திட்டத்தை செயல்படுத்தலாம் என்று அமைச்சகம் பரிந்துரைத்துள்ளது. கோவைக்கான திட்டத்தில் 44 கி.மீ. நீளம் கொண்ட இரு முக்கிய வழிதடங்கள் (அவினாசி ரோடு, சத்தியமங்கலம் ரோடு) அடங்கியிருந்தது. 

அதன் செலவு 9,424 கோடி ரூபாய் என 2024 டிசம்பர் வரை தமிழகம் அனுப்பியிருந்தது. மதுரைக்கு 32 கி.மீ. நீளம் கொண்ட திருமங்கலம்-ஒத்தக்கடை கொள்கோரிடார், 27 நிலையங்கள் (ஏழு நிலையங்கள் நிலத்தடி) என திட்டமிடப்பட்டிருந்தது. 

முதல்வர் ஸ்டாலினின் விமர்சனம்: இந்த முடிவுக்கு எக்ஸ் (பழைய டிவிட்டர்) இல் பதிவிட்ட முதல்வர் ஸ்டாலின், "கோவைக்கு 'தென்னிந்தியாவின் மான்செஸ்டர்', மதுரைக்கு 'கோயில் நகர்' என்று அழைக்கப்படும். இந்த இரு நகரங்களுக்கும் மெட்ரோ ரயில் தேவை. 

ஆனால் மத்திய பாஜக அரசு சிறிய காரணங்களால் நிராகரித்துள்ளது. பாஜக ஆளும் சிறிய 2-ஆம் நிலை நகரங்களுக்கு (ஆக்ரா, பட்னா, பூபால் போன்றவை) மெட்ரோ ஒப்புதல் அளித்துள்ளனர். ஆனால் எதிர்க்கட்சி ஆளும் மாநிலங்களை புறக்கணிப்பது பழிவாங்கல் அரசியல்" என்று குற்றம் சாட்டினார்.  "இது ஃபெடரல் கொள்கைகளை மீறும் செயல். சென்னை மெட்ரோவைத் தடுக்க முயன்றார்கள்; நாங்கள் வென்றோம். அதே உறுதியுடன் கோவை, மதுரைக்கு மெட்ரோ கொண்டு வருவோம்" என்று அவர் தெரிவித்தார்.

தமிழக பாஜகவின் பதில்: இதற்கு தமிழக பாஜக பொதுச் செயலர் ஏ. கே. சேகர் தலைமையிலான கட்சி உயர்மட்டக் குழு கடுமையான பதிலடி கொடுத்துள்ளது. "முதல்வர் ஸ்டாலின் தவறான கதைகளைப் பரப்பி மக்களை ஏமாற்ற வேண்டாம். 

மெட்ரோ திட்டங்களை திருப்பிய அனுப்பியதற்கு 100% மாநில அரசுதான் காரணம்" என்று அவர்கள் கூறினர். விரிவான திட்ட அறிக்கையில், தற்போதைய போக்குவரத்து நேரத்துடன் ஒப்பிடுகையில் மெட்ரோ பயண நேரம் பெரிய மாற்றம் இல்லை என்று மக்களுக்கு ஏன் தெரிவிக்கவில்லை? என்று கேள்வி எழுப்பினர். 

மேலும், கோவை மெட்ரோவுக்கு பெரிய அளவிலான தனியார் சொத்துகளை இடிக்க வேண்டியிருக்கும் என்பதை மக்களுக்கு ஏன் சொல்லவில்லை? என்று குற்றம் சாட்டினர். திட்ட அறிக்கையில் 2011 மக்கள் தொகை கணக்கெடுப்பை மட்டும் குறிப்பிட்டு, தற்போதைய அல்லது எதிர்கால மக்கள் தொகையை கணக்கில் கொள்ளாமல் நியாயப்படுத்தியது தவறு என்று சுட்டிக்காட்டினர். மதுரைக்கு பொருத்தமாக BRTS திட்டமே சரி என்று மக்களுக்கு ஏன் தெரிவிக்கவில்லை? என்று கேட்டனர்.

தமிழகம் அனுப்பிய அறிக்கைகள் தொழில்நுட்ப ரீதியாக யதார்த்தமானதல்ல; அவசரகதியிலும் அரசியல் பிளவை ஏற்படுத்தும் நோக்கத்துடனும் உருவாக்கப்பட்டவை என்று பாஜக கூறியுள்ளது. "பொய் சொல்லுவதை நிறுத்துங்கள் முதல்வரே. பதவியின் கடைசி நாட்களிலாவது பொறுப்பான முதல்வராக இருங்கள்" என்று அவர்கள் வலியுறுத்தினர். கோவை தெற்கு எம்எல்ஏ வானதி சீனிவாசன் (பாஜக) கூட, மக்கள் தொகை விவரங்களை தெளிவுபடுத்தி மீண்டும் மனு அனுப்பலாம் என்று பரிந்துரைத்துள்ளார். 

இந்த விவகாரம் தமிழக-மத்திய உறவுகளில் புதிய பதற்றத்தை ஏற்படுத்தியுள்ளது. விரைவில் மாநில அரசு மீண்டும் மனு அனுப்பலாம் என்று எதிர்பார்க்கப்படுகிறது.

இதையும் படிங்க: இந்தியாவை சிதைக்க மாபெரும் சதி? நிதி திரட்டும் பாக்., பயங்கரவாதிகள்! ஆன்லைனில் கசிந்த தகவல்!