2026 தேர்தலுக்கு தயாராகும் திமுக! சாட்டையை சுழற்றும் ஸ்டாலின்! கலக்கத்தில் மா.செக்கள்!
திமுகவில் தொகுதி வாரியாக மாவட்ட, நகர, ஒன்றிய, வட்டச் செயலாளர்கள் என அனைத்து நிர்வாகிகளையும் ஒன் டு ஒன் சந்திக்கும் ஸ்டாலின், சரியாக செயல்படாதோர், அதிருப்திக்கு ஆளோவோரின் பதவிகளை பறித்து வருகிறார்.
by
தமிழகத்தில் 2026 சட்டமன்றத் தேர்தலுக்கு இன்னும் ஆறு மாதங்களே உள்ள நிலையில், திமுக தலைவரும் முதலமைச்சருமான மு.க. ஸ்டாலின், தொடர்ந்து இரண்டாவது முறையாக முதல்வர் பதவியை தக்கவைக்கும் முனைப்புடன் தேர்தல் பணிகளில் தீவிரமாக இறங்கியுள்ளார்.
இதற்காக, கட்சி அமைப்பை மறுசீரமைப்பு செய்யும் பணிகளை அவர் துரிதப்படுத்தியுள்ளார். அதிமுக-பாஜக கூட்டணி அறிவிக்கப்பட்டு, தவெக உள்ளிட்ட புதிய கட்சிகளை இழுக்கும் முயற்சிகள் நடைபெறும் சூழலில், ஸ்டாலின் தனது கட்சியை வலுப்படுத்துவதோடு, எதிர்க்கட்சிகளின் செல்வாக்கு மிக்க நிர்வாகிகளை திமுகவுக்கு இழுக்கும் உத்தியையும் முன்னெடுத்துள்ளார்.
திமுகவின் தேர்தல் உத்தியின் முதற்கட்டமாக, “உடன்பிறப்பே வா” என்ற பெயரில் ஒவ்வொரு தொகுதியிலும் மாவட்ட, நகர, ஒன்றிய மற்றும் வட்டச் செயலாளர்களை ஸ்டாலின் ‘ஒன் டு ஒன்’ சந்திப்பு மூலம் நேரடியாக சந்தித்து வருகிறார். இந்த சந்திப்புகளில், தொகுதி நிலவரம், வாக்காளர் மனநிலை, நலத்திட்டங்களின் தாக்கம் மற்றும் எதிர்க்கட்சிகளின் பலம்-பலவீனம் குறித்து விரிவாக ஆலோசிக்கப்படுகிறது.
இதையும் படிங்க: 41 உயிருக்கு யார் பொறுப்பு? விஜய் - செந்தில்பாலாஜி?! சிபிஐ வசம் செல்லும் கரூர் துயரம்?! வெளிவருமா உண்மை?
இதில், செயல்பாடு சரியில்லாதவர்கள், கட்சிக்கு எதிராக செயல்படுவோர் அல்லது அதிருப்திக்கு ஆளானவர்களின் பதவிகள் பறிக்கப்பட்டு, மூத்த மற்றும் திறமையான நிர்வாகிகள் அல்லது நம்பிக்கைக்கு பாத்திரமான புதிய முகங்கள் பொறுப்புக்கு நியமிக்கப்படுகின்றனர்.
உதாரணமாக, கோவை மாநகர மாவட்ட செயலாளராக இருந்த கார்த்திக் நீக்கப்பட்டு, செந்தமிழ் செல்வன் புதிய பொறுப்பாளராக நியமிக்கப்பட்டார். விருதுநகரில் உள்ள சிவகாசி தொகுதியில் ஏழு வட்டச் செயலாளர்கள் மாற்றப்பட்டனர். திருநெல்வேலி மாவட்ட திமுக நிர்வாகம் கிழக்கு மற்றும் மேற்கு என இரண்டாகப் பிரிக்கப்பட்டு, மேற்கு மாவட்டத்துக்கு முன்னாள் சபாநாயகர் ஆவுடையப்பனும், கிழக்கு மாவட்டத்துக்கு கிரஹாம்பெல்லும் நியமிக்கப்பட்டனர்.
தருமபுரியில், மேற்கு மாவட்ட பொறுப்பாளர் பழனியப்பன் மீது உறுப்பினர் சேர்க்கையில் முறைகேடு புகார்கள் எழுந்தன. இதையடுத்து, அவரது கட்டுப்பாட்டில் இருந்த அரூர் தொகுதி, கிழக்கு மாவட்ட பொறுப்பாளர் மணிக்கு மாற்றப்பட்டது. தற்போது, தென்காசி மற்றும் விளாத்திகுளம் தொகுதி நிர்வாகிகளை ஸ்டாலின் சந்தித்து, அங்கும் மாற்றங்கள் விரைவில் நிகழலாம் என எதிர்பார்க்கப்படுகிறது.
இந்த அதிரடி மாற்றங்கள், திமுகவின் மாசெக்கள் உள்ளிட்ட முக்கிய நிர்வாகிகளை கலக்கத்தில் ஆழ்த்தியுள்ளன. 200 தொகுதிகளில் வெற்றி என்ற இலக்குடன் களமிறங்கியுள்ள ஸ்டாலின், கட்சியை மறுசீரமைப்பு செய்வதன் மூலம், எம்ஜிஆர் மற்றும் ஜெயலலிதாவைப் போல தொடர்ந்து இரண்டு முறை முதல்வர் பதவி வகித்தவர் என்ற பெருமையைப் பெற விரும்புகிறார். இதற்காக, கட்சி உறுப்பினர் சேர்க்கையை மேம்படுத்தவும், தொகுதி வாரியாக பலத்தை வலுப்படுத்தவும் அவர் முயற்சிக்கிறார்.
இதனிடையே, கரூர் கூட்ட நெரிசல் சம்பவத்திற்குப் பின், தவெகவை அதிமுக-பாஜக கூட்டணிக்கு இழுக்கும் முயற்சிகள் தீவிரமடைந்துள்ளன. இதற்கு செக் வைக்க, ஸ்டாலின் தவெக, பாஜக, அதிமுகவில் அதிருப்தியில் உள்ள முக்கிய நிர்வாகிகளை திமுகவுக்கு இழுக்கும் உத்தியை முன்னெடுத்துள்ளார்.
“தவெகவில் செல்வாக்கு மிக்கவர்கள், கட்சி பதவிகளை எதிர்பார்ப்பவர்களை எங்கள் பக்கம் இழுப்போம். இது தேர்தலில் பெரிய தாக்கத்தை ஏற்படுத்தும்” என்று திமுக நிர்வாகிகள் தெரிவித்தனர். இந்த உத்தி, திமுகவின் கூட்டணி பலத்தையும், ஆளுங்கட்சியின் நலத்திட்டங்களையும் முன்னிறுத்தி, 2026 தேர்தலில் மீண்டும் ஆட்சியைத் தக்கவைக்கும் என்ற நம்பிக்கையை வெளிப்படுத்துகிறது.
ஆனால், எதிர்க்கட்சிகளின் கூட்டணி முயற்சிகள், தவெகவின் இளைஞர் ஆதரவு, மற்றும் திமுகவின் உள் கட்சி மாற்றங்களால் ஏற்படும் அதிருப்திகள் ஆகியவை, ஸ்டாலினின் இலக்கை சவாலாக்கலாம். உச்ச நீதிமன்றத்தில் நிலுவையில் உள்ள கரூர் சம்பவம் குறித்த விசாரணையும், திமுக ஆட்சியின் சட்டம்-ஒழுங்கு நிலைமை குறித்த விமர்சனங்களும், தேர்தல் களத்தில் தாக்கத்தை ஏற்படுத்தலாம். இருப்பினும், ஸ்டாலினின் இந்த அதிரடி நடவடிக்கைகள், திமுகவை தேர்தல் களத்தில் வலுவாக வைத்திருக்க முயல்கின்றன.
இதையும் படிங்க: கூட்டணிக்குள்ளே குழி வெட்டும் திமுக! பொறுமை இழந்த காங்கிரஸ்! மீண்டும் சலசலப்பு!
