யார் என்ன சதி செய்தாலும்?! தமிழகத்தில் எதுவும் நடக்காது! முதல்வர் ஸ்டாலின் சூளுரை!

“யார் என்ன சதி செய்தாலும், எத்தனை அவதூறுகளை நம்மைப் பற்றி பரப்பினாலும், 2026 சட்டமன்றத் தேர்தலில் திமுக தலைமையில் ஆட்சி நிச்சயம் அமையும்” என்று முதல்வர் மு.க. ஸ்டாலின் தெரிவித்துள்ளார். தர்மபுரி மாவட்டத்தில் திமுக எம்.பி. மணி இள்லத்தின் திருமண விழாவில் பேசிய அவர், தேர்தல் கமிஷனின் சீராய்வு திட்டத்தை 'வாக்காளர்களை நீக்கும் சதி' என்று விமர்சித்தார். “திமுக 2.0 ஆட்சி அமைந்ததாக அனைத்து டிவி சேனல்களிலும் செய்திகள் வரும். அதை நீங்கள் பார்க்கத்தான் போகிறோம்” என்று தொண்டர்களை உற்சாகப்படுத்தினார்.

தர்மபுரி மணி இள்லத்தின் திருமண விழா, திமுக தொண்டர்களின் பெரும் கூட்டத்துடன் நடைபெற்றது. இதில் முதல்வர் ஸ்டாலின் சிறப்பு விருந்தினராகக் கலந்துகொண்டு, புதுமணத் தம்பதியினரை வாழ்த்தினார். அவர் பேசியதாவது: “நேற்று (நவம்பர் 2) சென்னையில் நடந்த அனைத்துக்கட்சிக் கூட்டம் மிக முக்கியமானது. 

தேர்தல் கமிஷன், சீராய்வு என்ற பெயரில் வாக்காளர் பட்டியலை திருத்தி, உண்மையான வாக்காளர்களை நீக்கும் தந்திரத்தைச் செய்கிறது. இதைத் தடுக்க அனைத்துக்கட்சிக் கூட்டத்தில் தீர்மானம் நிறைவேற்றினோம். தேர்தல் நேர்மையாக நடக்க வேண்டும். அதற்கு போதுமான அவகாசம் தர வேண்டும். பதற்றமின்றி, அமைதியான சூழலில் மட்டுமே திருத்தம் செய்யலாம்.”

இதையும் படிங்க: குற்றமற்றவர்கள் என நிரூவிப்போம்! என்னால் திமுகவுக்கு கெட்ட பெயர் வராது ; நேரு உறுதி!

ஸ்டாலின் தொடர்ந்து கூறினார்: “தேர்தலுக்கு சில மாதங்களே இருக்கும் போது வாக்காளர் பட்டியல் திருத்தம் என்பது, திமுக ஆதரவாளர்களை நீக்கும் சதி. பீஹாரில் இதைச் செய்தார்கள். இப்போது தமிழகத்திலும் முயல்கின்றனர். அனைத்துக்கட்சிக் கூட்டத்தில் பெரும்பாலான கட்சிகள் பங்கேற்றன. அதிமுக, பாஜக போன்ற இரு கட்சிகள் மட்டும் பங்கேற்கவில்லை. ஆனால், அவர்களும் இந்த நடவடிக்கைக்கு எதிர்ப்பு தெரிவித்துள்ளனர். அதற்கு நான் நன்றி சொல்கிறேன்.”

எதிர்க்கட்சித் தலைவர் எடப்பாடி கே. பழனிச்சாமி (இ.பி.எஸ்.) மீது கடுமையாக விமர்சித்த ஸ்டாலின், “பழனிச்சாமி இரட்டை வேடம் காட்டுகிறார். பாஜகவுக்கு பயந்து தேர்தல் கமிஷனை எதிர்க்க மாட்டார். ஆனால், தனது தொண்டர்களுக்கு ஒரு அறிக்கை வெளியிட்டு, சந்தேகத்தை காட்டுகிறார். வெளிப்படையாக எதிர்க்க முடியாது. அவர் தன்னை பாஜகவின் அடிமையாக நிரூபிக்கிறார். நொடிக்கு ஒருமுறை பாஜக பாதத்தைத் தொடுகிறார்.”

முதல்வர் உறுதியாகக் கூறினார்: “பாஜக எப்படியான சதியைச் செய்தாலும், தமிழகத்தில் எதையும் செய்ய முடியாது. 2026-ல் திமுக தலைமையில் ஆட்சி அமையும். 7-ஆவது முறையாக திமுக ஆட்சி வரும். 2021-ல் அதிமுகவிடமிருந்து தமிழகத்தை மீட்டோம். 2026-ல் பாஜக-அதிமுக கூட்டணியிடமிருந்து பாதுகாக்கிறோம். தமிழக மக்கள் மீதான நம்பிக்கையில் இதைச் சொல்கிறேன்.”

ஸ்டாலின் தமிழ் உணர்வை வலியுறுத்தினார்: “மணமானவர்கள், உங்களுக்கு பிறக்கும் குழந்தைகளுக்கு அழகான தமிழ் பெயர்கள் சூட்டுங்கள். தமிழ் உணர்வை தமிழகத்தில் வளர்க்க வேண்டும். திமுக தொண்டர்கள் அனைவரும் 2026 வெற்றிக்கு உறுதுணையாக இருங்கள்.” இந்தப் பேச்சு, தொண்டர்களிடம் பெரும் உற்சாகத்தை ஏற்படுத்தியது.

தர்மபுரி திமுகவின் வலுவான தொகுதிகளில் ஒன்று. இங்கு நடந்த திருமண விழா, தேர்தல் தயாரிப்புக்கான கூட்டமாகவே மாறியது. ஸ்டாலினின் உறுதிமொழி, திமுகவின் 2026 உத்தியை வலுப்படுத்தியுள்ளது. தேர்தல் கமிஷனின் சீராய்வு திட்டத்துக்கு எதிராக அனைத்துக்கட்சிக் கூட்டம் நடத்தியது, திமுகவின் அரசியல் உத்தியை காட்டுகிறது.

இதையும் படிங்க: விஜய்க்கும், சீமானுக்கும் எப்படி கூட்டம் கூடுது? திமுக அப்செட்! தவெக - நாதக குறித்து உளவுத்துறை ரிப்போர்ட்!