ராகுல் காந்தியை சந்திக்க மறுக்க இதுதான் காரணம்?! தலைமை நீதிபதி சூர்யகாந்த் சொன்ன காரணம்!

புதுடெல்லி: வாக்காளர் பட்டியல் சிறப்பு தீவிர திருத்தப் பணிகள் (SIR) மற்றும் இந்திய தலைமைத் தேர்தல் ஆணையர் ஞானேஷ் குமாரின் பதவி தொடர்பான கோரிக்கைகளை முன்வைத்து, இண்டி கூட்டணித் தலைவர்கள் உச்ச நீதிமன்ற தலைமை நீதிபதி சூர்யகாந்தைச் சந்திக்க முயன்ற விவகாரம் அரசியல் வட்டாரத்தில் கவனம் பெற்றுள்ளது. இந்தச் சந்திப்புக்கு தலைமை நீதிபதி ஒப்புக்கொள்ளாத நிலையில், அதற்கான காரணம் குறித்து அவர் தற்போது விளக்கம் அளித்துள்ளார்.

SIR பணிகள் தொடர்பாக எதிர்க்கட்சிகள் பல்வேறு ஆட்சேபனைகளை முன்வைத்து வருகின்றன. வாக்காளர் பட்டியல் திருத்த நடவடிக்கைகளில் வெளிப்படைத்தன்மை உறுதி செய்யப்பட வேண்டும் என்றும், தலைமைத் தேர்தல் ஆணையர் ஞானேஷ் குமார் மீது நடவடிக்கை எடுக்க வேண்டும் என்றும் இண்டி கூட்டணி சார்பில் கோரிக்கை முன்வைக்கப்பட்டது. இதுதொடர்பாக உச்ச நீதிமன்ற தலைமை நீதிபதியைச் சந்தித்து மனு அளிக்கத் திட்டமிட்டுள்ளதாக எதிர்க்கட்சித் தலைவர்கள் தெரிவித்திருந்தனர்.

இந்தச் சூழலில், இண்டி கூட்டணித் தலைவர்களிடமிருந்து தனக்குக் கடிதம் வந்ததாக தலைமை நீதிபதி சூர்யகாந்த் தெரிவித்துள்ளார். அந்தக் கடிதத்துக்கு முந்தைய இரவே பதிலளித்துவிட்டதாகவும், சில காரணங்களைக் குறிப்பிட்டு அவர்களைச் சந்திக்க இயலாது எனத் தெரிவித்ததாகவும் அவர் கூறினார்.

இதையும் படிங்க: டெல்லி ஒரு சிறைச்சாலையாக மாறிவிட்டது! ஞானேஷ் குமாரை மோடி ஏன் பாதுகாக்கிறார்? ராகுல் காந்தி ஆவேசம்!

சந்திக்க மறுத்ததன் காரணம் என்ன?

டெல்லியில் நடைபெற்ற நிகழ்ச்சி ஒன்றில் பங்கேற்கச் சென்றபோது செய்தியாளர்கள் எழுப்பிய கேள்விகளுக்குப் பதிலளித்த சூர்யகாந்த், சந்திப்பைத் தவிர்த்ததற்கான காரணங்களைத் தாமே வெளிப்படுத்த விரும்பவில்லை என்றார். அந்த விவரங்களை சம்பந்தப்பட்ட தலைவர்களிடமே கேட்டுத் தெரிந்துகொள்ளலாம் என்றும் அவர் குறிப்பிட்டார்.

“நீதிமன்றத்தை யாரும் அணுகலாம்”

உச்ச நீதிமன்றத்தின் கதவுகள் அனைவருக்கும் திறந்தே இருப்பதாகத் தெரிவித்த தலைமை நீதிபதி, சாதாரண குடிமகனாக இருந்தாலும், தேர்ந்தெடுக்கப்பட்ட மக்கள் பிரதிநிதியாக இருந்தாலும் சட்டப்படி நீதிமன்றத்தை அணுக உரிமை உண்டு என்று கூறினார். உரிய நடைமுறைகளின்படி மனுக்களைத் தாக்கல் செய்யலாம் என்றும், சட்டத்தின் அடிப்படையில் குறைகள் விசாரிக்கப்படும் என்றும் அவர் விளக்கினார்.

மேலும், தகுதியான வழக்குகளில் உரிய நிவாரணம் கிடைப்பதை நீதிமன்றம் உறுதி செய்யும் என்றும் தெரிவித்தார்.

இந்த விவகாரத்தில் தலைமை நீதிபதியை நேரில் சந்திக்க முடியாதது எதிர்க்கட்சித் தலைவர்களுக்கு ஏமாற்றத்தை ஏற்படுத்தியதாகக் கூறப்படுகிறது. இருப்பினும், நீதிமன்றத்தை அணுகுவதற்கான சட்ட நடைமுறைகள் தொடர்ந்து திறந்தே உள்ளன. இண்டி கூட்டணி அடுத்ததாக என்ன நடவடிக்கை எடுக்கிறது என்பதும், SIR தொடர்பான கோரிக்கைகள் நீதிமன்றத்தில் எவ்வாறு முன்வைக்கப்படுகின்றன என்பதும் கவனிக்கப்படுகிறது.

இதையும் படிங்க: ராகுல் காந்தியை சந்திக்க மறுத்த உச்ச நீதிமன்ற தலைமை நீதிபதி! இமெயிலில் அதிரடி பதில்!