தமிழக காங்கிரசில் மீண்டும் கோஷ்டி பூசல்? கார்த்தி சிதம்பரம், செல்வப்பெருந்தகை ஆதரவாளர்களுக்கு ‘செக்’!

சென்னை: தமிழக காங்கிரசில் கட்சியை மறுசீரமைக்கும் நடவடிக்கைகள் தொடங்கியுள்ள நிலையில், புதிதாக அமைக்கப்பட்ட முக்கிய குழுக்களில் குறிப்பிட்ட தலைவர்களின் ஆதரவாளர்களுக்கு போதிய பிரதிநிதித்துவம் கிடைக்கவில்லை என்ற அதிருப்தி கட்சிக்குள் எழுந்துள்ளதாக தகவல் வெளியாகியுள்ளது.

தமிழக காங்கிரஸ் தலைவராக மாணிக்கம் தாகூர் பொறுப்பேற்ற பிறகு, கட்சியின் செயல்பாடுகளை வலுப்படுத்தவும், எதிர்கால அரசியல் நடவடிக்கைகளை ஒருங்கிணைக்கவும் மூன்று முக்கிய குழுக்கள் அமைக்கப்பட்டுள்ளன. காங்கிரஸ் தலைவர் மல்லிகார்ஜுன கார்கே ஒப்புதலுடன், கட்சியின் பொதுச்செயலர் கே.சி.வேணுகோபால் இந்த குழுக்களின் உறுப்பினர்கள் பட்டியலை வெளியிட்டுள்ளார்.

அரசியல் விவகார குழுவில் மாணிக்கம் தாகூர், ப.சிதம்பரம், செல்லக்குமார், தங்கபாலு, திருநாவுக்கரசர், கே.எஸ்.அழகிரி, செல்வப்பெருந்தகை உள்ளிட்ட 31 பேர் இடம்பெற்றுள்ளனர். தற்போதைய மற்றும் முன்னாள் எம்.பி., எம்.எல்.ஏ.க்களுக்கும் இதில் இடம் அளிக்கப்பட்டுள்ளது.

இதையும் படிங்க: ராகுல் Vs விஜய் விவகாரம்! தமிழக காங்கிரஸில் மீண்டும் பரபரப்பு! கோஷ்டி பூசலை முடிவுக்கு கொண்டு வர 3 நாள் ஆலோசனை!

இதுதவிர, 7 பேர் கொண்ட ஒழுங்கு நடவடிக்கை குழுவும், 48 பேர் கொண்ட மாநில அரசியல் ஆலோசனை குழுவும் அமைக்கப்பட்டுள்ளன. இந்த நியமனங்களில் மாணிக்கம் தாகூர் மற்றும் கே.எஸ்.அழகிரி தரப்புக்கு நெருக்கமானவர்கள் அதிகளவில் இடம்பெற்றுள்ளதாக கட்சியின் ஒரு தரப்பினர் கருதுகின்றனர்.

குறிப்பாக, சிவகங்கை எம்.பி. கார்த்தி சிதம்பரத்தின் ஆதரவாளர்களுக்கும், முன்னாள் தமிழக காங்கிரஸ் தலைவர் செல்வப்பெருந்தகையின் ஆதரவாளர்களுக்கும் எதிர்பார்த்த அளவுக்கு பிரதிநிதித்துவம் கிடைக்கவில்லை என்ற அதிருப்தி எழுந்துள்ளதாக கூறப்படுகிறது.

இந்த குழுக்கள் வெறும் பெயரளவிலான அமைப்புகள் அல்ல என்றும், எதிர்கால அரசியல் நடவடிக்கைகள், கூட்டணி தொடர்பான அணுகுமுறை உள்ளிட்ட முக்கிய விவகாரங்களில் ஆலோசனை வழங்கும் வாய்ப்பு இருப்பதாகவும் கட்சி நிர்வாகிகள் தெரிவிக்கின்றனர். தமிழகத்தில் உள்ளாட்சி தேர்தல் உள்ளிட்ட அரசியல் நடவடிக்கைகள் தீவிரமடைய உள்ள நிலையில், குழு நியமனங்கள் கட்சிக்குள் கூடுதல் முக்கியத்துவம் பெற்றுள்ளன.

அதே நேரத்தில், புதிய மாநிலத் தலைவர் கோஷ்டி அரசியலை குறைத்து, அனைத்து தரப்பினருக்கும் வாய்ப்பு அளிக்க முயற்சி செய்து வருவதாக அவரது ஆதரவாளர்கள் கூறுகின்றனர். புதிதாக அமைக்கப்பட்ட குழுக்களில் பல்வேறு தலைவர்களின் ஆதரவாளர்களுக்கும் பிரதிநிதித்துவம் வழங்கப்பட்டுள்ளதாகவும் அவர்கள் தெரிவிக்கின்றனர்.

இதற்கிடையே, நீண்ட காலமாக கட்சிக்காக பணியாற்றி வரும் மாவட்ட, நகர மற்றும் வட்டார நிர்வாகிகளுக்கு போதிய வாய்ப்பு வழங்கப்படவில்லை என்ற விமர்சனமும் சமூக வலைதளங்களில் வெளியாகி வருகிறது. ஒரே சிலருக்கு மீண்டும் மீண்டும் பதவி வழங்கப்படுவதற்கு பதிலாக, உழைக்கும் தொண்டர்களுக்கும் புதியவர்களுக்கும் வாய்ப்பு அளிக்க வேண்டும் என்ற கோரிக்கையும் எழுந்துள்ளது.

இதையும் படிங்க: ராகுல் Vs விஜய் விவகாரம்! தமிழக காங்கிரஸில் மீண்டும் பரபரப்பு! கோஷ்டி பூசலை முடிவுக்கு கொண்டு வர 3 நாள் ஆலோசனை!