தவெக எம்எல்ஏ வி.எஸ்.பாபு உடல்நிலை என்ன? அமைச்சர் அருண்ராஜ் வெளியிட்ட முக்கிய தகவல்!

சென்னையில் பருவமழையை முன்னிட்டு டெங்கு உள்ளிட்ட காய்ச்சல் பாதிப்புகளை கட்டுப்படுத்தும் வகையில் தடுப்பு நடவடிக்கைகள் தீவிரப்படுத்தப்பட்டுள்ளன. இதன் ஒரு பகுதியாக வடபழனியில் நடைபெற்ற காய்ச்சல் தடுப்பு மருத்துவ முகாமை அமைச்சர் அருண்ராஜ் நேரில் பார்வையிட்டார். தொடர்ந்து, வீடு வீடாக சென்று கொசு ஒழிப்பு பணிகள் மற்றும் டெங்கு தடுப்பு நடவடிக்கைகளையும் அவர் ஆய்வு செய்தார்.

பின்னர் செய்தியாளர்களிடம் பேசிய அமைச்சர் அருண்ராஜ், பருவமழை தொடங்க உள்ளதால் முன்னெச்சரிக்கை நடவடிக்கைகள் தீவிரமாக மேற்கொள்ளப்பட்டு வருவதாக தெரிவித்தார். டெங்கு காய்ச்சலை கட்டுப்படுத்த அரசு நடவடிக்கை எடுத்தாலும், பொதுமக்களின் ஒத்துழைப்பு மிகவும் அவசியம் என்றும் அவர் கூறினார்.

தமிழகத்தில் இந்த ஆண்டு ஜனவரி 1-ம் தேதி முதல் நேற்று வரை 21,655 பேருக்கு டெங்கு பாதிப்பு உறுதி செய்யப்பட்டுள்ளதாக அமைச்சர் தெரிவித்தார். டெங்கு பாதிப்பால் இதுவரை 10 பேர் உயிரிழந்துள்ளதாகவும் அவர் கூறினார்.

இதையும் படிங்க: பாக்., நெட்வொர்க் தமிழகத்தில் தாக்குதல் நடத்த சதி? தஞ்சாவூர், கோவையில் 7 பேர் கைது! NIA விசாரணையில் திடுக் தகவல்கள்!

குறிப்பாக மழைக்காலம் தொடங்க உள்ள நிலையில், கொசுக்கள் உற்பத்தியாகும் இடங்களை கண்டறிந்து அவற்றை உடனடியாக அகற்றுவதில் அதிகாரிகள் கவனம் செலுத்தி வருவதாகவும் தெரிவித்தார்.

வீடுகளின் மொட்டை மாடிகள், காலி இடங்கள் உள்ளிட்ட பகுதிகளில் மழைநீர் தேங்காமல் பொதுமக்கள் பார்த்துக்கொள்ள வேண்டும் என அமைச்சர் அறிவுறுத்தினார். தண்ணீர் தேங்கி, அதன் மூலம் டெங்கு கொசுக்கள் உற்பத்தியாகும் சூழல் ஏற்பட்டால், சம்பந்தப்பட்டவர்களுக்கு ரூ.10 ஆயிரம் வரை அபராதம் விதிக்கப்படும் என்றும் அவர் எச்சரித்தார்.

சென்னையில் நடைபெற்று வரும் கால்வாய் பணிகளை விரைந்து முடிக்க முதல்வர் விஜய் அறிவுறுத்தியுள்ளதாகவும் அமைச்சர் தெரிவித்தார். மழைக்காலத்தில் தண்ணீர் தேங்குவதை தடுக்கும் வகையில் பணிகள் வேகப்படுத்தப்பட்டுள்ளதாகவும் அவர் கூறினார்.

இதனிடையே, நீண்ட காலமாக மருத்துவமனையில் சிகிச்சை பெற்று வரும் தவெக எம்எல்ஏ வி.எஸ்.பாபுவின் உடல்நிலை குறித்த கேள்வியும் அமைச்சரிடம் எழுப்பப்பட்டது. அதற்கு பதிலளித்த அமைச்சர், வி.எஸ்.பாபுவின் உடல்நிலை தொடர்பாக மருத்துவமனை தரப்பில் ஏற்கனவே அறிக்கைகள் வெளியிடப்பட்டு வருவதாக தெரிவித்தார். தற்போது அவரது உடல்நிலை குறித்து புதிய மருத்துவ அறிக்கை வெளியிட வேண்டும் என கேட்டுக்கொண்டுள்ளதாகவும் அவர் கூறினார்.

பருவமழை நெருங்கும் நிலையில் டெங்கு தடுப்பு நடவடிக்கைகளில் பொதுமக்களும் அரசு நிர்வாகத்துடன் இணைந்து செயல்பட வேண்டும் என அமைச்சர் வலியுறுத்தியுள்ளார்.

இதையும் படிங்க: முதல்வர் விஜய் கலந்து கொண்ட ஆவின் ஆய்வக திறப்பு விழாவில் எழுத்துப்பிழை!! பலகையை பார்த்து அதிர்ந்த மக்கள்!