கோடிக்கணக்குல ஏமாத்திட்டாருங்க!! துரைமுருகன் மீது புகார் சொன்ன திமுக நிர்வாகி! கட்சியில் இருந்து சஸ்பெண்ட்!

காட்பாடி: தி.மு.க. பொதுச்செயலரும் முன்னாள் அமைச்சருமான துரைமுருகன் மீது மோசடி தொடர்பாக புகார் அளித்த அக்கட்சியின் பொதுக்குழு உறுப்பினர் சிவகுமார், கட்சியில் இருந்து சஸ்பெண்ட் செய்யப்பட்ட சம்பவம் வேலூர் மாவட்ட அரசியல் வட்டாரத்தில் பரபரப்பை ஏற்படுத்தியுள்ளது.

வேலூர் மாவட்டம் கே.வி.குப்பம் தொகுதிக்கு உட்பட்ட காங்குப்பத்தை சேர்ந்த சிவகுமார், வேலூர் வடக்கு மாவட்ட தி.மு.க. பொதுக்குழு உறுப்பினராக இருந்தார். கடந்த ஜூலை மாதம் தி.மு.க. இளைஞரணி செயலர் உதயநிதியிடம் அவர் புகார் ஒன்றை அளித்ததாக கூறப்படுகிறது.

அந்தப் புகாரில், ஒப்பந்தப் பணிகள் பெற்றுத் தருவதாக கூறி தன்னிடம் ரூ.1.50 கோடி வாங்கப்பட்டதாகவும், தனது மனைவிக்கு ஒன்றிய தலைவர் பதவி பெற்றுத் தருவதாக கூறி மேலும் ரூ.75 லட்சம் பெற்றதாகவும் சிவகுமார் குற்றம்சாட்டியிருந்தார். ஆனால், ஒப்பந்தப் பணியும் கிடைக்கவில்லை என்றும், பதவியும் வழங்கப்படவில்லை என்றும் அவர் புகாரில் தெரிவித்திருந்ததாக கூறப்படுகிறது.

இதையும் படிங்க: தைரியமிருந்தால் அந்த பைலை ஓபன் பண்ணுங்கள்! முதல்வர் விஜய்க்கு துரைமுருகன் சவால்!

தான் கொடுத்த பணத்தை திருப்பிக் கேட்டபோதும் உரிய பதில் கிடைக்கவில்லை என்றும் சிவகுமார் புகார் தெரிவித்திருந்தார். கட்சி தலைமையிடம் அளித்த புகாருக்கு நடவடிக்கை எடுக்கப்படவில்லை எனக் கூறி, கடந்த 2-ம் தேதி வேலூர் மாவட்ட காவல் கண்காணிப்பாளர் அலுவலகத்தில் துரைமுருகன் மீது அவர் புகார் அளித்தார்.

இந்த நிலையில், சிவகுமார் தி.மு.க.வில் இருந்து சஸ்பெண்ட் செய்யப்பட்டுள்ளார். இதற்கான காரணம் தொடர்பாக கட்சி தரப்பில் விரிவான தகவல் வெளியாகவில்லை.

இதனிடையே செய்தியாளர்களிடம் பேசிய சிவகுமார், துரைமுருகன் மற்றும் அவரது மகன் கதிர் ஆனந்த் எம்.பி. ஆகியோர் தன்னிடம் கோடிக்கணக்கில் பணம் பெற்றுக் கொண்டு ஏமாற்றியதாக குற்றம்சாட்டினார். மேலும், இந்த விவகாரம் தொடர்பாக லஞ்ச ஒழிப்புத் துறை அலுவலகத்திலும் புகார் அளித்துள்ளதாக அவர் தெரிவித்தார்.

இந்த குற்றச்சாட்டுகள் தொடர்பாக துரைமுருகன் மற்றும் கதிர் ஆனந்த் தரப்பில் விளக்கம் வெளியாகியுள்ளதா என்பது குறித்து அதிகாரப்பூர்வ தகவல் வெளியாகாத நிலையில், புகாரின் உண்மைத் தன்மை குறித்து சம்பந்தப்பட்ட விசாரணை அமைப்புகளின் நடவடிக்கைகளே அடுத்த கட்டத்தை தீர்மானிக்கும்.

புகார் அளித்த கட்சி நிர்வாகி சஸ்பெண்ட் செய்யப்பட்டுள்ள சம்பவம் தற்போது வேலூர் மாவட்ட தி.மு.க. வட்டாரத்தில் அரசியல் விவாதத்தை ஏற்படுத்தியுள்ளது.

இதையும் படிங்க: என்னது.. மாமா, மச்சானா..!! சட்டமன்றத்தில் இதெல்லாம் பேசக்கூடாது.. கடிந்துகொண்ட துரைமுருகன்!!