ரூ.3 கோடிக்கு தங்க நெக்லஸா? ஒரு ரூபாய் கூட லஞ்சம் வாங்கவில்லை! அமைச்சர் கீர்த்தனா ஆதங்கம்!

தமிழக தொழில்துறை அமைச்சர் எஸ். கீர்த்தனா, ரயில்வே மேம்பாலத் திட்டத்தில் ரூ.3 கோடி கமிஷன் பெறப்பட்டதாகக் கூறப்படும் உள்ளிட்ட ஊழல் குற்றச்சாட்டுகளை மறுத்துள்ளார். ஆதாரமற்ற குற்றச்சாட்டுகளைப் பரப்புபவர்கள் மீது சட்ட நடவடிக்கை எடுக்கப்படும் என எச்சரித்துள்ளார்.

அவர் வெளியிட்டுள்ள அறிக்கையில், “ஊழல் குற்றச்சாட்டை முன்வைப்பவர்கள் மீது சட்ட நடவடிக்கை எடுக்கப்படும். நான் லஞ்சம் கேட்கவும் இல்லை, வாங்கவும் இல்லை. ஆதாரமின்றி மீண்டும் மீண்டும் கூறப்படும் குற்றச்சாட்டுகளை உண்மைகளாகக் காட்ட முடியாது. நான் ஒரு ரூபாய் கூட லஞ்சம் வாங்கவில்லை. 

எந்தவிதமான நிதி முறைகேடு செயலிலும் ஈடுபடவில்லை. பதவியேற்ற நாள் முதல் கேள்விக்குள்ளாக்கப்பட்டு, கேலி செய்யப்பட்டு, சந்தேகிக்கப்பட்டு வருகிறேன்” எனத் தெரிவித்துள்ளார்.

இதையும் படிங்க: கேட்டது 12,000 கோடி! கிடைத்தது 6,000 தான்! மகளிர் இலவச பயண திட்டத்திற்கு புது நெருக்கடி? சமாளிக்குமா தவெக?

பொது வாழ்வில் உன்னிப்பான கண்காணிப்பு இருக்கும் என்பதை ஏற்றுக்கொள்வதாகக் குறிப்பிட்ட அமைச்சர், ஊழல் குற்றச்சாட்டு என்பது சாதாரண விமர்சனம் அல்ல என்றும், அது தனது நேர்மையையும் மக்கள் வைத்துள்ள நம்பிக்கையையும் கேள்விக்குள்ளாக்குவதாகவும் கூறியுள்ளார். 

சமீபத்திய வாரங்களில் தனக்கு ரூ.4 கோடி மதிப்பிலான வீடு இருப்பதாகக் கூறப்பட்டது. பின்னர் அது ரூ.10 கோடியாக மாற்றப்பட்டது. திருப்பதி பயணத்தின்போது அணிந்திருந்த பேஷன் நெக்லஸ் தங்க நாணயச் சங்கிலியாக சித்தரிக்கப்பட்டது என அவர் சுட்டிக்காட்டியுள்ளார்.

மதிப்புகள் மாறிக்கொண்டே இருப்பதாகவும், கதைகளும் மாறிக்கொண்டே இருப்பதாகவும், சான்றுகள் ஏதும் இல்லாததால் இந்தக் குற்றச்சாட்டுகள் தீய நோக்கத்தால் புனையப்பட்டவை என்றும் அமைச்சர் தெரிவித்துள்ளார். 

நியாயமான கேள்விகளுக்குப் பதிலளிக்கத் தயாராக இருப்பதாகவும், தவறு நடந்ததற்கான ஆதாரம் சமர்ப்பிக்கப்பட்டால் அதிகாரிகளுக்கு முழு ஒத்துழைப்பு அளிப்பதாகவும் அறிவித்துள்ளார். கடுமையான குற்றச்சாட்டுகளை முன்வைப்பவர்கள் அவற்றை உண்மைகள் மற்றும் ஆதாரங்களுடன் நிரூபிக்கத் தயாராக இருக்க வேண்டும் என வலியுறுத்தியுள்ளார்.

தமிழக மக்களுக்குச் சேவை செய்வதற்காகவே பொது வாழ்வில் நுழைந்ததாகக் கூறிய கீர்த்தனா, வேண்டுமென்று சொல்லப்படும் பொய்யான குற்றச்சாட்டுகளுக்கும் சர்ச்சைகளுக்கும் பதிலளிப்பதில் தனது நேரத்தைச் செலவிட விரும்பவில்லை எனத் தெரிவித்துள்ளார். 

பணியைக் கடுமையாக விமர்சிக்கலாம் என்றாலும், வேண்டுமென்றே கூறப்படும் பொய்களும் புனையப்பட்ட ஊழல் குற்றச்சாட்டுகளும் பொறுத்துக்கொள்ளப்படாது என்றும், தகுந்த சட்ட வழிமுறைகள் அனைத்தின் மூலமும் தனது நேர்மையைப் பாதுகாப்பதாகவும் அறிவித்துள்ளார். இந்தக் குற்றச்சாட்டுகள் சிவகாசி பகுதியில் உள்ள திருத்தங்கல் ரயில்வே மேம்பாலத் திட்டம் தொடர்பாக எழுந்ததாகத் தெரிகிறது.

இதையும் படிங்க: திமுக ஆட்சியின் கடைசி டெண்டர்களுக்கு செக்? மாமல்லபுரம் டெண்டரை ரத்து செய்த தவெக அரசு!