அதிமுக பிரச்சாரத்தில் தவெக கொடி பறந்த சம்பவம்.. இபிஎஸ் சொன்ன அந்த வார்த்தை.. தொண்டர்கள் ஆரவாரம்..!!

நாமக்கல் மாவட்டம் குமரபாளையம் சட்டமன்றத் தொகுதியில் அதிமுக பொதுச்செயலாளரும், எதிர்க்கட்சித் தலைவருமான எடப்பாடி பழனிசாமி (இபிஎஸ்) நடத்திய பிரச்சாரக் கூட்டத்தில் தமிழக வெற்றிக் கழக (தவெக) கொடி பறந்த சம்பவம் அரசியல் வட்டாரத்தில் பரபரப்பை ஏற்படுத்தியுள்ளது. 2026 சட்டமன்றத் தேர்தலுக்கு முன்னோட்டமாக அதிமுக சார்பில் தொகுதி வாரியாக பிரச்சாரம் நடத்தி வரும் இபிஎஸ், நேற்று குமரபாளையம் பகுதியில் நடந்த பொதுக்கூட்டத்தில் பேசினார்.

அப்போது கூட்டத்தில் அதிமுக, பாஜக உள்ளிட்ட கூட்டணிக் கட்சிகளின் கொடிகள் பறக்க, சில தவெக ஆதரவாளர்கள் தங்கள் கட்சிக் கொடியுடன் பங்கேற்றனர். இபிஎஸ் உரையின்போது, அந்தக் கொடியை சுட்டிக்காட்டி சிரித்தபடி கூறினார்: “பாருங்க… கொடி பறக்குது… கூட்டணிக்கு பிள்ளையார் சுழி போட்டாங்க…” என்று குறிப்பிட்டார். இது கூட்டத்தில் இருந்தவர்களிடையே ஆரவாரத்தை ஏற்படுத்தியது. இந்த சம்பவம், அதிமுக - தவெக கூட்டணி உருவாகும் என்கிற வதந்திகளுக்கு வலு சேர்த்துள்ளது.

இதையும் படிங்க: 41 பேர் உயிரிழப்புக்கு திமுக அரசுதான் காரணம்.. தருமபுரி பிரச்சாரத்தில் விளாசிய எடப்பாடி பழனிசாமி..!!

மேலும் எடப்பாடி பழனிசாமி தனது உரையில், “கூட்டணி தேவைதான், ஆனால் அதிமுக தலைமையிலான கூட்டணிதான் வலுவானது” என்று வலியுறுத்தினார். திமுக தலைமையிலான கூட்டணியை “வெறு கூட்டணி” என விமர்சித்த அவர், முதல்வர் ஸ்டாலினுக்கு நேரடியாக சவால் விடுத்தார். "குமரபாளையத்தின் ஆரவாரம் உங்கள் காதுகளைத் துளைக்கும். உங்கள் கனவுகள் கானல் நீராக மாறும்" என்றார்.

கரூர் கூட்ட நெரிசல் சம்பவத்தில் 41 பேர் உயிரிழந்த சம்பவத்தை குறிப்பிட்டு, “இது சதி” எனக் குற்றம்சாட்டிய இபிஎஸ், சிபிஐ விசாரணை கோரினார். திமுக அரசு நீதியை மறைக்கிறது எனவும், போலீஸ் தவறுகளை சுட்டிக்காட்டினார். மக்களுக்கு நியாயம், உண்மை தெரிய வேண்டும் என்றால் சி.பி.ஐ. விசாரிக்க வேண்டும். அப்போது தான் இந்த சம்பவத்திற்கு யார் பொறுப்பு என்ற உண்மை வெளிவரும் என்ற அவர், அரசின் கடன் சாதனை, சட்டம்-ஒழுங்கு சீர்கேடு, சிறுநீரக மாற்று ஊழல் போன்றவற்றையும் விமர்சித்தார்.

தொடர்ந்து பேசிய அவர், துணை முதல்வர் உதயநிதி ஸ்டாலினின் வெளிநாட்டுப் பயணத்தை கண்டித்து, “பாதிக்கப்பட்டவர்களுக்கு உதவி செய்யாமல் வெளியே சென்றது ஏன்?” எனக் கேள்வி எழுப்பினார். இந்த கூட்டம், அதிமுகவின் தேர்தல் உத்தியை வெளிப்படுத்தியது. தவெக தலைவர் விஜயுடன் இபிஎஸ் தொலைபேசியில் பேசியதாகக் கூறப்படும் நிலையில், இச்சம்பவம் கூட்டணி விவாதங்களை தீவிரப்படுத்தியுள்ளது. திமுக அரசின் திட்டங்களை விமர்சித்த இபிஎஸ், அதிமுக ஆட்சியில் நடைபெற்ற வளர்ச்சிகளை நினைவூட்டினார்.

இந்த பிரச்சாரம், தமிழக அரசியலில் புதிய மாற்றங்களை உருவாக்கலாம் என எதிர்பார்க்கப்படுகிறது. கரூர் சம்பவத்தை தொடர்ந்து தர்மபுரி மாவட்டத்தில் ஏற்கனவே நடைபெற்ற எடப்பாடி பழனிசாமியின் பிரசார பயணத்திலும் த.வெ.க. தொண்டர்கள் சிலர் தங்கள் கட்சிக்கொடியை ஏந்தி வரவேற்பு அளித்தது குறிப்பிடத்தக்கது.

இதையும் படிங்க: பூதாகரமாக வெடிக்கும் இருமல் மருந்து விவகாரம்: கோல்ட்ரிப் நிறுவன உரிமையாளர் அதிரடி கைது..!!