மேற்காசிய போரை நிறுத்த அமெரிக்கா 15 அம்ச திட்டம்?! முன்மொழியும் பாக்.,! ஏற்குமா ஈரான்?!!

மேற்காசியப் போர் 26-வது நாளை எட்டியுள்ள நிலையில், அமெரிக்கா ஈரானுக்கு 15 அம்ச அமைதித் திட்டத்தை முன்மொழிந்துள்ளதாக பெரும் தகவல் வெளியாகியுள்ளது. அமெரிக்காவின் நியூயார்க் டைம்ஸ் மற்றும் இஸ்ரேலின் சேனல்-12 உள்ளிட்ட முக்கிய ஊடகங்கள் இந்த செய்தியை வெளியிட்டுள்ளன.

இந்த 15 அம்ச திட்டத்தில் முக்கிய நிபந்தனைகள் இவை:

• ஈரான் தனது அணு ஆயுத திட்டத்தை முழுமையாக கைவிட வேண்டும்.
• அணு ஆயுதம் தயாரிக்கும் முயற்சியில் ஒருபோதும் ஈடுபட மாட்டோம் என்று உறுதியளிக்க வேண்டும்.
• ஈரானுக்குள் யுரேனியம் செறிவூட்டல் முழுமையாக நிறுத்தப்பட வேண்டும்.
• தற்போது உள்ள 60% செறிவூட்டப்பட்ட 450 கிலோ யுரேனியத்தை சர்வதேச அணுசக்தி முகமைக்கு ஒப்படைக்க வேண்டும்.
• நடன்ஸ், இஸ்பஹான், போர்டோ உள்ளிட்ட அணு நிலையங்கள் அகற்றப்பட வேண்டும்.
• சர்வதேச அணுசக்தி முகமைக்கு ஈரானுக்குள் முழு அணுகல் வழங்க வேண்டும்.
• ஹார்முஸ் ஜலசந்தியை முழுமையாகத் திறந்து, சுதந்திரமான கடல் பாதையாக வைத்திருக்க வேண்டும்.
• ஈரான் தனது ஏவுகணைத் திட்டத்தின் எண்ணிக்கையை குறைக்க வேண்டும்.
• பிராந்தியத்தில் உள்ள பல்வேறு ஆயுதக் குழுக்களுக்கு ஆதரவு அளிப்பதை நிறுத்த வேண்டும்.

இந்த நிபந்தனைகளை ஈரான் ஏற்றுக்கொண்டால், அமெரிக்கா உள்ளிட்ட சர்வதேச சமூகம் விதித்துள்ள அனைத்து பொருளாதாரத் தடைகளையும் உடனடியாக நீக்குவதாகவும், ஈரானின் சிவில் அணுசக்தித் திட்டங்களுக்கு உதவி செய்வதாகவும் உறுதியளிக்கப்பட்டுள்ளது.

இதையும் படிங்க: மேற்காசிய போர் பதற்றம்! அதிகரிக்கும் எரிபொருள் தட்டுப்பாடு! முதல் நாடாக அவசரநிலையை பிரகடனப்படுத்தியது பிலிப்பைன்ஸ்!

இந்த திட்டம் பாகிஸ்தான் மூலம் மத்தியஸ்தர்களாக செயல்பட்டு ஈரானுக்கு அனுப்பப்பட்டதாகத் தெரிவிக்கப்படுகிறது. அமெரிக்க அதிபர் டொனால்ட் டிரம்ப் ஏற்கெனவே ஈரானுடன் ஆக்கப்பூர்வமான பேச்சுவார்த்தை நடைபெற்று வருவதாகக் கூறியிருந்தார்.

எனினும், ஈரான் தரப்பில் இந்த 15 அம்ச திட்டத்தை முழுமையாக ஏற்க மறுத்து, தங்களது சொந்த நிபந்தனைகளை முன்வைத்துள்ளது. வளைகுடா நாடுகளில் உள்ள அனைத்து அமெரிக்க ராணுவத் தளங்களையும் மூட வேண்டும், போரால் ஏற்பட்ட இழப்புக்கு நிதி இழப்பீடு வழங்க வேண்டும், ஹார்முஸ் ஜலசந்தி வழியாக கப்பல்களிடம் கட்டணம் வசூலிக்க அனுமதிக்க வேண்டும், 

ஹிஸ்புல்லா மீதான இஸ்ரேல் தாக்குதல்களை நிறுத்த வேண்டும், அனைத்து தடைகளையும் நீக்க வேண்டும், ஏவுகணைத் திட்டத்தைத் தக்கவைக்க அனுமதிக்க வேண்டும் என்பன உள்ளிட்ட கோரிக்கைகளை ஈரான் வலியுறுத்தியுள்ளது.

இந்தியா உள்ளிட்ட பல நாடுகள் ஹார்முஸ் ஜலசந்தியை உடனடியாகத் திறக்க வலியுறுத்தி வரும் நிலையில், அமெரிக்காவின் 15 அம்ச திட்டம் போர் முடிவுக்கு வருவதற்கான முக்கியமான வாய்ப்பாகக் கருதப்படுகிறது. ஆனால் இரு தரப்பும் தங்களது நிலைப்பாட்டில் உறுதியாக இருப்பதால், அமைதி எப்போது கிடைக்கும் என்பது இன்னும் தெளிவாக இல்லை.

உலக நாடுகள் அனைத்தும் இந்தப் பேச்சுவார்த்தையின் முடிவை ஆவலுடன் எதிர்பார்த்துள்ளன.

இதையும் படிங்க: பேச்சுவார்த்தையை விரும்பும் ஈரான்? படைகளை அனுப்பும் US?! மேற்காசியாவில் தொடரும் போர் பதற்றம்!!!