இதெல்லாம் சரியில்ல - உதயநிதி கைது குறித்து சி.எம்.விஜய்க்கு திருமா கொடுத்த அட்வைஸ்...!

தமிழ்நாடு சட்டப்பேரவை கூட்டத்தொடர் இன்று தொடங்கவுள்ள நிலையில், எதிர்க்கட்சித் தலைவர் உதயநிதி ஸ்டாலின் கைது செய்யப்பட்ட விவகாரத்தில் விடுதலை சிறுத்தைகள் கட்சிக்கு உடன்பாடு இல்லை என்று அக்கட்சியின் தலைவர் தொல். திருமாவளவன் தெரிவித்துள்ளார்.

டெல்லியில் செய்தியாளர்களைச் சந்தித்துப் பேசிய அவர், உதயநிதி ஸ்டாலின் கைது நடவடிக்கையில் காவல்துறை தேவையற்ற அவசரம் காட்டியதாகவும், அந்த அணுகுமுறை ஏற்றுக்கொள்ளத்தக்கது அல்ல என்றும் விமர்சித்தார்.

இதுகுறித்து அவர் கூறுகையில், "காவல்துறை இந்த நடவடிக்கையில் ஏன் இவ்வளவு அவசரம் காட்டியது என்பது புரியவில்லை. காவல்துறை தன்னிச்சையாக இவ்வாறு செயல்பட்டதா அல்லது மேலிடத்தின் உத்தரவின்படி செயல்பட்டதா என்பது தெரியவில்லை. எந்த காரணமாக இருந்தாலும், அந்த அணுகுமுறை ஏற்புடையது அல்ல. இதுகுறித்து பல்வேறு அரசியல் கட்சித் தலைவர்களும், ஜனநாயக அமைப்புகளும் தங்களது விமர்சனங்களை முன்வைத்துள்ளனர். விடுதலை சிறுத்தைகள் கட்சிக்கும் இந்த கைது நடவடிக்கையில் உடன்பாடு இல்லை என்பதை மீண்டும் வலியுறுத்த விரும்புகிறேன்" என்றார்.

இதையும் படிங்க: டபுள் மீனிங் பேச்சு..! இதெல்லாம் வேணாம் உதய்..!! திருமாவளவன் அறிவுரை..!!

மேலும், ஜனநாயக நாட்டில் கருத்து வேறுபாடுகளை சட்டரீதியாகவும், அரசியல் ரீதியாகவும் எதிர்கொள்ள வேண்டுமே தவிர, அவசர கைது நடவடிக்கைகள் தேவையற்ற சர்ச்சைகளுக்கும் அரசியல் பதற்றத்திற்கும் வழிவகுக்கும் என்ற கருத்தையும் அவர் மறைமுகமாக வெளிப்படுத்தினார்.

தமிழ்நாடு சட்டப்பேரவை கூட்டத்தொடர் தொடங்கும் நாளிலேயே இந்தக் கைது விவகாரம் அரசியல் வட்டாரங்களில் பெரும் பரபரப்பை ஏற்படுத்தியுள்ளது. இந்த விவகாரம் சட்டப்பேரவையிலும் எதிரொலிக்கும் என எதிர்பார்க்கப்படுகிறது.

இதையும் படிங்க: கர்நாடகாவை நம்புறது WASTE..! அனைத்து கட்சி கூட்டம்..! தமிழக அரசுக்கு திருமா. கோரிக்கை..!!