“விஜய் முதல்ல களத்துக்கு வரட்டும்!” – எங்களுக்கு கவலையே இல்ல: அமைச்சர் ஐ.பெரியசாமி சவால்

தமிழக ஊரக வளர்ச்சித்துறை அமைச்சர் ஐ.பெரியசாமி அவர்கள் இன்று திண்டுக்கல் மாவட்ட ஆட்சியர் அலுவலகத்தில் செய்தியாளர்களைச் சந்தித்தார். அப்போது, வரைவு வாக்காளர் பட்டியல் வெளியீடு, தமிழக வெற்றிக் கழகத் தலைவர் விஜய் குறித்த விமர்சனங்கள் மற்றும் முதலமைச்சரின் வருகை குறித்துப் பல்வேறு கருத்துகளைப் பகிர்ந்து கொண்டார்.

சினிமாப் பயணத்திலிருந்து அரசியலுக்கு வந்துள்ள நடிகர் விஜய் மற்றும் அவரது கட்சி குறித்துச் செய்தியாளர்கள் கேள்வி எழுப்பினர். அதற்குப் பதிலளித்த அமைச்சர், “விஜய்க்கு முழுமையான அரசியல் கட்சியே கிடையாது. அவரைப் பற்றி எங்களுக்கு எந்தக் கவலையும் இல்லை. விஜய் முதலில் தேர்தல் களத்திற்கு வரட்டும், மக்கள் அவரை எப்படி ஏற்றுக்கொள்கிறார்கள் என்று பார்ப்போம். அதற்குப் பிறகு அவரைப் பற்றிப் பேசலாம். 75 ஆண்டுகள் பாரம்பரியம் கொண்ட பேரியக்கம் திமுக. அவர் இப்போதுதான் அரசியலுக்கு வந்துள்ளார்; அவரிடம் கருத்துச் சொல்ல ஏதுமில்லை” என்று பதிலளித்தார்.

இன்று தமிழகம் முழுவதும் வெளியிடப்பட்டுள்ள வரைவு வாக்காளர் பட்டியல் குறித்த கேள்விக்கு, “வாக்காளர் பட்டியல் வெளியீடு குறித்து முதலமைச்சர் மு.க. ஸ்டாலின் மற்றும் திமுக தலைமை முறைப்படி பதிலளிப்பார்கள். இருப்பினும், திண்டுக்கல் மாவட்டத்தில் வாக்காளர் பட்டியலில் பெயர் விடுபட்டவர்கள் யாராவது இருந்தால், அவர்கள் மீண்டும் சேர்க்கப்படுவது உறுதி செய்யப்படும். தேர்தல் ஆணையத்தின் விதிமுறைகளின்படி, தகுதியான ஒவ்வொரு வாக்காளரும் பட்டியலில் இடம்பெற நடவடிக்கை எடுக்கப்படும்” என்று விளக்கம்  கொடுத்தார்.

இதையும் படிங்க: திண்டுகல்லில் 144 தடை உத்தரவு! இரு தரப்பினர் மோதலைத் தடுக்க 200க்கும் மேற்பட்ட போலீசார் குவிப்பு!

திண்டுக்கல் மாவட்டத்தின் வளர்ச்சித் திட்டங்கள் மற்றும் அரசு விழாக்கள் குறித்துப் பேசிய அமைச்சர் ஐ.பெரியசாமி, “தமிழக முதலமைச்சர் மு.க. ஸ்டாலின் அவர்கள் வரும் ஜனவரி 7-ஆம் தேதி திண்டுக்கல் மாவட்டத்திற்கு வருகை தரவுள்ளார். அவரது வருகை குறித்த ஆலோசனைக் கூட்டம் மற்றும் ஆய்வுக்கூட்டம் நாளை நடைபெற உள்ளது. அந்தச் சந்திப்பின்போது திண்டுக்கல் மாவட்டத்திற்கு என்னென்ன புதிய திட்டங்கள் அறிவிக்கப்படும் என்பது குறித்த முழு விவரங்களும் வெளியிடப்படும்” என்று தெரிவித்தார்.

திண்டுக்கல் மாவட்டத்தில் நிலவும் குடிநீர் மற்றும் அடிப்படை வசதிகள் குறித்த கோரிக்கைகள் முதலமைச்சரின் கவனத்திற்கு எடுத்துச் செல்லப்பட்டு, அதற்கான தீர்வுகள் எட்டப்படும் என்றும் அவர் உறுதி அளித்தார்.

இதையும் படிங்க: எத்தனை தடைகள் வந்தாலும் முறியடிப்போம்! - ஈரோடு அன்புக்கு விஜய் நெகிழ்ச்சியுடன் நன்றி மடல்!