ஆறாத ரணம்! தீராத வலி! செப்டம்பர் 27-ஐ மறக்க முடியுமா? 41 உயிர்களை பறித்த கரூர் துயரம்! முதல்வர் விஜய் அஞ்சலி!

சென்னை: கரூரில் நடந்த கூட்ட நெரிசல் சம்பவத்தில் 41 பேர் உயிரிழந்த துயர நிகழ்வு நடைபெற்று ஓராண்டு நிறைவடைந்த நிலையில், அந்த நாளை நினைவுகூர்ந்து முதல்வரும் தமிழக வெற்றிக் கழகத் தலைவருமான விஜய் உருக்கமான பதிவை வெளியிட்டுள்ளார். உயிரிழந்தவர்களின் குடும்பத்தினருக்கு ஆறுதலாகவும் ஆதரவாகவும் இருப்போம் என அவர் தெரிவித்துள்ளார்.

கடந்த 2025-ம் ஆண்டு செப்டம்பர் 27-ம் தேதி கரூர் வேலுசாமிபுரத்தில் தமிழக வெற்றிக் கழகத்தின் பிரசாரக் கூட்டம் நடைபெற்றது. விஜய் பங்கேற்ற அந்தக் கூட்டத்தில் ஏற்பட்ட கடும் கூட்ட நெரிசலில் சிக்கி பெண்கள், குழந்தைகள் உள்ளிட்ட பலர் உயிரிழந்தனர். தொடக்கத்தில் உயிரிழப்பு எண்ணிக்கை மாறுபட்ட நிலையில், பின்னர் பலி எண்ணிக்கை 41 ஆக உயர்ந்தது. 100-க்கும் மேற்பட்டோர் காயமடைந்தனர்.

இந்தச் சம்பவம் தமிழகம் மட்டுமின்றி நாடு முழுவதும் பெரும் அதிர்ச்சியை ஏற்படுத்தியது. சம்பவம் தொடர்பாக விசாரணை நடைபெற்று வரும் நிலையில், ஓராண்டு நினைவு நாளையொட்டி உயிரிழந்தவர்களின் குடும்பத்தினர் மற்றும் பல்வேறு தரப்பினரும் அவர்களை நினைவுகூர்ந்து வருகின்றனர்.

இதையும் படிங்க: ஜெகத்ரட்சகன் மகனுக்கு தவெகவில் முக்கிய பதவி.. தூக்கி கொடுத்த விஜய்!! கவனம் ஈர்க்கும் நியமனம்!!

என் நெஞ்சில் குடியிருக்கும் அனைவருக்கும் வணக்கம்.

கடந்த வருடம்.
இதே நாள்.
அதாவது 2025 செப்டம்பர் 27.

என் வாழ்நாளில், நம் கரூர் சொந்தங்களின் வாழ்வில், நம் தமிழ்நாட்டு உறவுகளின் மனத்தில் ஆறாத ரணமாக, தீராத வலியாக, வேதனையான நிகழ்வு நடந்த நாள்.

சொல்ல முடியாத சோகத்தைச் சுமந்து…

— TVK Vijay (@TVKVijayHQ) September 27, 2026

இந்நிலையில், விஜய் தனது சமூக வலைதளப் பதிவில், கடந்த ஆண்டு இதே நாளில் கரூரில் நடைபெற்ற சம்பவம் தன்னுடைய வாழ்விலும், கரூர் மக்களின் வாழ்விலும், தமிழக மக்களின் மனதிலும் ஆறாத காயமாகவும் தீராத வலியாகவும் மாறியுள்ளதாக குறிப்பிட்டுள்ளார்.

மேலும், அந்த துயரத்தை தாங்கிக்கொண்டு இருப்பதாகவும், உயிரிழந்த உறவுகளை இழந்து தவிக்கும் குடும்பங்களுக்கு ஆறுதலாகவும் ஆதரவாகவும் இருக்க வேண்டியது அனைவரின் பொறுப்பு என்றும் தனது பதிவில் தெரிவித்துள்ளார். கரூர் சம்பவத்தில் உயிரிழந்த அனைவருக்கும் அவர் இதய அஞ்சலியையும் செலுத்தியுள்ளார்.

கரூர் துயர சம்பவத்தின் முதலாம் ஆண்டு நினைவு நாளில் விஜய் வெளியிட்டுள்ள இந்தப் பதிவு தற்போது சமூக வலைதளங்களில் கவனம் பெற்றுள்ளது. இதற்கிடையே, சம்பவம் தொடர்பான விசாரணை நடவடிக்கைகளும் தொடர்ந்து நடைபெற்று வருகின்றன.

இதையும் படிங்க: சமூக வலைதள பிரசாரத்திற்கு ரூ.0! வெளியானது தவெக தேர்தல் கணக்கு! திமுகவுடன் ஒப்பிட்டால் ஷாக்!