10 லட்சம் கோடி கடனில் ரூ.1200 கோடியில் தலைமைச் செயலகம் எதற்கு: எடப்பாடி பழனிசாமி கேள்வி!

தமிழ்நாடு அரசு சுமார் ரூ.10 லட்சம் கோடிக்கும் அதிகமான கடும் கடன் சுமையில் தத்தளித்துக் கொண்டிருக்கும் இக்கட்டான சூழலில், ரூ.1200 கோடி மக்கள் வரிப்பணத்தைச் செலவழித்துப் புதிய தலைமைச் செயலகம் கட்ட வேண்டிய அவசியம் என்ன என்று கேள்வி எழுப்பியுள்ள எதிர்க்கட்சித் தலைவரும் அதிமுக பொதுச்செயலாளருமான எடப்பாடி பழனிசாமி, நிதி நிலைமை சரியான பின்னர் புதிய இடத்தை தேர்வு செய்து அங்குத் தலைமைச் செயலகம் கட்டிக் கொள்ளலாம் எனத் திட்டவட்டமாகத் தெரிவித்துள்ளார்.

தலைமைச் செயலகத்தில் இடநெருக்கடி மற்றும் பெண் ஊழியர்களுக்குப் போதிய கழிப்பறை வசதிகள் இல்லை எனக் கூறி, பல நூறு கோடி ரூபாய் செலவில் புதிய தலைமைச் செயலக வளாகம் கட்டப்படும் என ஆளும் தரப்பில் அமைச்சர்கள் தொடர்ந்து கருத்து தெரிவித்து வருகின்றனர். இந்நிலையில், தமிழக அரசின் இந்த நகர்வை மிகக் கடுமையாக விமர்சித்து எதிர்க்கட்சித் தலைவர் எடப்பாடி பழனிசாமி அறிக்கை வெளியிட்டுள்ளார்.

செய்தியாளர்களிடம் பேசிய அவர், "தமிழ்நாடு தற்போது முன்னெப்போதும் இல்லாத வகையில் கடுமையான நிதி நெருக்கடியில் சிக்கியுள்ளது. மாநிலத்தின் ஒட்டுமொத்த கடன் சுமை சுமார் 10 லட்சம் கோடி ரூபாயைத் தாண்டி அச்சுறுத்தும் அளவுக்கு உயர்ந்து நிற்கிறது. எளிய மக்களின் நலத்திட்டங்களைச் செயல்படுத்துவதற்கும், அத்தியாவசியப் பணிகளை மேற்கொள்வதற்கும் கூட நிதிப்பற்றாக்குறை நிலவி வருகிறது. இப்படிப்பட்ட இக்கட்டான நிதி நெருக்கடி காலகட்டத்தில், ரூ.1200 கோடி நிதியை வாரி இறைத்துப் புதிய தலைமைச் செயலகம் கட்டுவதற்கு அரசு ஏன் இத்தனை அவசரம் காட்டுகிறது?" என்று அடுக்கடுக்கான கேள்விகளை எழுப்பினார்.

இதையும் படிங்க: தவெக அரசுக்கு ஆதரவு தொடரும்.. திமுகவுக்கு ஆதரவல்ல: இடைத்தேர்தல் குறித்து சிபிஎம் சண்முகம்!

மேலும் அரசுக்கு ஆலோசனை வழங்கிய அவர், "மக்களின் அன்றாட வாழ்வாதாரப் பிரச்சினைகளைத் தீர்ப்பதும், விலைவாசி உயர்வைக் கட்டுப்படுத்துவதும், நிதிச் சுமையைக் குறைப்பதும்தான் அரசின் உடனடிக் கடமையாக இருக்க வேண்டும். அதைவிடுத்து இதுபோன்ற ஆடம்பரத் திட்டங்களில் மக்கள் வரிப்பணத்தைக் கொட்டுவது எந்த விதத்திலும் நியாயமாகாது. தற்போதுள்ள இடத்திலேயே தேவையான அத்தியாவசியப் பராமரிப்பு மற்றும் சுகாதார வசதிகளை உடனடியாக மேம்படுத்திக் கொள்ள முடியும். எனவே, தற்போதைய அவசரத் திட்டத்தைக் கைவிட்டு, மாநிலத்தின் நிதி நிலைமை முழுமையாகச் சீரடைந்த பிறகு, பொதுமக்களுக்கு வசதியான ஒரு புதிய இடத்தை முறைப்படி தேர்வு செய்து அங்குப் புதிய தலைமைச் செயலகத்தைக் கட்டிக் கொள்ளலாம்" என்று திட்டவட்டமாகத் தெரிவித்தார். கடன் சுமையை முன்வைத்து அதிமுக பொதுச்செயலாளர் எடப்பாடி பழனிசாமி எழுப்பியுள்ள இந்தக் குற்றச்சாட்டு தமிழக அரசியல் களத்தில் புதிய விவாதத்தை ஏற்படுத்தியுள்ளது.

இதையும் படிங்க: “தவெக குதிரை பேரம் செய்ததால் தான் இடைத்தேர்தல்!” மதுராந்தகம், தாராபுரம் குறித்து பழனிசாமி அதிரடி!!