மகளிர் திட்டங்களால் மிகப்பெரிய வெற்றியை எதிர்பார்த்த மு.க.ஸ்டாலின்!! மொத்தமாய் கைவிட்ட தமிழகம்!

தமிழக சட்டமன்றத் தேர்தலில் பெண்கள் அதிக அளவில் ஓட்டு பதிவு செய்திருந்தும், தி.மு.க.வுக்கு பெரும் ஏமாற்றத்தை முடிவுகள் தந்துள்ளன. பெண்களுக்கான பல்வேறு நலத்திட்டங்களை செயல்படுத்தியதால் பிரமாண்ட வெற்றியை எதிர்பார்த்த தி.மு.க. தரப்புக்கு, தேர்தல் முடிவுகள் பெரும் அதிர்ச்சியை ஏற்படுத்தியுள்ளன.

2021-ல் ஆட்சிக்கு வந்த உடனேயே அரசு பேருந்துகளில் பெண்களுக்கு இலவசப் பயணம், மகளிர் சுய உதவிக் குழுக்களின் 2,755.99 கோடி ரூபாய் கடன் தள்ளுபடி, புதுமைப் பெண் திட்டம், மாதம் 1,000 ரூபாய் உரிமைத் தொகை, ‘தோழி’ விடுதிகள் உள்ளிட்ட பல திட்டங்களை தி.மு.க. அரசு செயல்படுத்தியது. தேர்தல் அறிவிப்புக்கு முன்பு கோடை நிவாரணமாக 5,000 ரூபாய் பெண்கள் கணக்கில் வரவு வைக்கப்பட்டது. இந்தத் திட்டங்கள் பெண் வாக்குகளை தி.மு.க. பக்கம் திருப்பும் என கட்சி நம்பியது.

இந்தத் தேர்தலில் வரலாறு காணாத அளவுக்கு பெண்கள் ஓட்டு பதிவு செய்தனர். 234 தொகுதிகளில் 222 தொகுதிகளில் ஆண்களை விட பெண்கள் அதிகம் ஓட்டளித்தனர். ‘பெண்கள் மீண்டும் எங்களுக்கு மகுடம் சூட்டுவார்கள்’ என தி.மு.க. தலைமை உறுதியாக நம்பியது.

இதையும் படிங்க: சிறுபான்மையினர் ஓட்டுகளை கொத்தாக அள்ளிய தவெக!! சி.ஜோசப் விஜய் செய்த மேஜிக்!!

ஆனால், எதிர்பார்ப்பு முழுவதும் பொய்த்துப்போனது. தமிழக வெற்றிக் கழகம் (தவெக) பெரும் எண்ணிக்கையில் இடங்களைக் கைப்பற்றி தனிப்பெரும் கட்சியாக உருவெடுத்தது.

பெண்களுக்கான திட்டங்கள் இருந்தபோதிலும், மக்களின் பிரச்னைகள், வேலைவாய்ப்பு, விலைவாசி உயர்வு, இளைஞர்கள் எதிர்கொள்ளும் சவால்கள் உள்ளிட்ட பல காரணங்கள் தவெக-வுக்கு ஆதரவாக அமைந்தன என அரசியல் பார்வையாளர்கள் கருதுகின்றனர். தி.மு.க.வின் பெண் நலத் திட்டங்கள் பாராட்டப்பட்டாலும், அவை மட்டும் போதுமானதாக இல்லை என்பதை தேர்தல் முடிவுகள் காட்டியுள்ளன.

இந்தத் தேர்தல் தி.மு.க.வுக்கு முக்கிய பாடத்தை கற்றுத் தந்துள்ளது. பெண்கள் ஓட்டுகள் மட்டும் ஒரு கட்சியின் வெற்றிக்கு உத்தரவாதம் அல்ல என்பதை இந்த முடிவுகள் நிரூபித்துள்ளன. தவெக-வின் எழுச்சியும், பெண்கள் உட்பட அனைத்து தரப்பினரின் ஆதரவும் தமிழக அரசியலில் புதிய மாற்றத்தை ஏற்படுத்தியுள்ளது.

இதையும் படிங்க: அரசியல் அதிரடி ஆரம்பம்! சினிமாவை விட்டு முழுதாக விலகும் விஜய்!! யூகங்களுக்கு முற்றுப்புள்ளி!!