10 மீட்டர் ஏர் ரைபிள்..! இந்தியாவுக்கு தங்கம்.! தூள் கிளப்பிய வீராங்கனைகள்..!!

ஆசிய பாரா விளையாட்டுப் போட்டிகள் 2026 ஜப்பானின் அய்ச்சி-நகோயாவில் தொடங்கியுள்ள நிலையில், இந்தியாவின் பாரா ஷூட்டிங் வீராங்கனைகள் முதல் நாளிலேயே வரலாற்றுச் சாதனை படைத்துள்ளனர். மகளிர் 10 மீட்டர் ஏர் ரைபிள் ஸ்டாண்டிங் எஸ்ஹெச்1 பிரிவில் மோனா அகர்வால் தங்கப் பதக்கத்தை வென்று ஆசிய பாரா விளையாட்டு சாதனையைப் படைத்தார். அதே போட்டியில் இந்தியாவின் மற்றொரு முன்னணி வீராங்கனையான அவனி லெகரா வெள்ளிப் பதக்கத்தை கைப்பற்றி, இந்தியாவுக்கு முதல் இரண்டு பதக்கங்களை வழங்கினர். அய்ச்சி மாகாண பொது ஷூட்டிங் கேலரியில் நடைபெற்ற இந்த இறுதிப் போட்டியில் மோனா அகர்வால் 250 புள்ளிகளைப் பெற்று தங்கம் வென்றார்.

இது ஆசிய பாரா விளையாட்டுகளின் புதிய சாதனையாகும். முந்தைய சாதனையான 249.6 புள்ளிகளை அவனி லெகராவே ஹாங்சூ போட்டியில் பதிவு செய்திருந்தார். இப்போது அந்த சாதனையை மோனா முறியடித்துள்ளார். அவனி 249.6 புள்ளிகளுடன் இரண்டாவது இடத்தைப் பிடித்து வெள்ளிப் பதக்கத்தைப் பெற்றார். தென் கொரியாவின் யுன்ரி லீ 227.9 புள்ளிகளுடன் வெண்கலப் பதக்கத்தை வென்றார். போட்டி ஆரம்பத்திலேயே இந்திய வீராங்கனைகள் ஆதிக்கம் செலுத்தினர். தகுதிச் சுற்றில் மோனா 629.1 புள்ளிகளைப் பெற்று முதலிடம் பிடித்தார்.

இதுவும் ஆசிய பாரா விளையாட்டுகளின் புதிய தகுதிச் சுற்று சாதனையாக அமைந்தது. சீனாவின் ஜாங் குய்பிங் வைத்திருந்த முந்தைய சாதனையை அவர் முறியடித்தார். உலக சாதனையான 629.4 புள்ளிகளுக்கு வெறும் 0.3 புள்ளிகள் குறைவாகவே இருந்தது. அவனி 626.4 புள்ளிகளுடன் இரண்டாவதாகத் தகுதி பெற்றார். இறுதிப் போட்டியில் ஆரம்பத்தில் அவனி முன்னிலையில் இருந்தார். ஆனால் மோனா படிப்படியாக முன்னேறி வந்தார். போட்டியின் இறுதிக் கட்டத்தில் இருவரும் மிக நெருக்கமான புள்ளிகளுடன் போட்டியிட்டனர். கடைசி சில ஷாட்களுக்கு முன் மோனா 239.2 புள்ளிகளுடன் சிறிய முன்னிலையில் இருந்தார். அவனி 239.1 புள்ளிகளுடன் அடுத்தபடியாக இருந்தார்.

இதையும் படிங்க: திருச்சி விமான நிலையத்தில் ரூ.1.20 கோடி மதிப்பிலான தங்கம் மற்றும் வெளிநாட்டு பணம் பறிமுதல்!

இறுதி ஷாட்டில் மோனா 10.8 புள்ளிகளைப் பெற்று மொத்தம் 250 புள்ளிகளை எட்டினார். அவனி 10.5 புள்ளிகளைப் பெற்று 249.6 புள்ளிகளுடன் முடித்தார். வெறும் 0.4 புள்ளிகள் வித்தியாசத்தில் தங்கம் மோனாவுக்குக் கிடைத்தது. இந்த வெற்றி இந்தியாவின் பாரா ஷூட்டிங் துறைக்கு பெருமை சேர்க்கும் ஒன்றாகும். மோனா அகர்வால் ராஜஸ்தானின் சிகார் பகுதியைச் சேர்ந்தவர். பாரிஸ் 2024 பாராலிம்பிக்ஸ் போட்டியில் வெண்கலப் பதக்கம் வென்ற அனுபவம் கொண்டவர். இரண்டு குழந்தைகளின் தாயான இவர், தனது வாழ்க்கையில் பல சவால்களை எதிர்கொண்டு விளையாட்டில் உயர்ந்துள்ளார். அவனி லெகரா இரண்டு முறை பாராலிம்பிக் தங்கப் பதக்கம் வென்ற முன்னணி வீராங்கனை. ஹாங்சூ ஆசிய பாரா விளையாட்டுகளில் தங்கம் வென்ற அனுபவம் கொண்டவர். இருவரும் ஒரே மாநிலத்தைச் சேர்ந்தவர்கள் என்பதும் குறிப்பிடத்தக்கது. 

இதையும் படிங்க: சவுதியில் உள்ள இந்தியர்களுக்கு மத்திய அரசு பாதுகாப்பு எச்சரிக்கை! ரியாத் விமான நிலையத் தாக்குதலால் புதிய வழிகாட்டுதல்!