TNSTC-க்கு புதிதாக 2,000 மின்சார ஏசி பஸ்கள்.. விரைவில் டெண்டர்..!!
ஒருமுறை பேட்டரி சார்ஜ் ஏற்றினால் சுமார் 300 கிலோ மீட்டர் வரை பயணம் செய்யும் வசதி கொண்ட பேருந்துகளை தமிழக போக்குவரத்து துறை வாங்க இருப்பதாக அதிகாரிகள் தெரிவித்தனர்.
- Mon, 06 Jul 2026 13:51:30 IST
by
Shanthi M.
- #
பொதுமக்களின் பயண வசதியை மேம்படுத்துவதோடு, அரசு போக்குவரத்துக் கழகங்களின் வருவாயை அதிகரிக்கும் நோக்கில் தமிழ்நாடு அரசு தொடர்ச்சியான அதிரடி நடவடிக்கைகளை மேற்கொண்டு வருகிறது. இந்த முயற்சியின் ஒரு முக்கிய அங்கமாக, சாதாரண ஏழை மற்றும் நடுத்தர வர்க்க மக்களும் குளிரூட்டப்பட்ட (ஏசி) பேருந்துகளில் சொகுசாகப் பயணிக்கும் வாய்ப்பை உருவாக்கும் புதிய தொலைநோக்குத் திட்டம் தயாராகியுள்ளது.
இதன் கீழ், தமிழ்நாடு அரசு போக்குவரத்துக் கழகம் அடுத்த மூன்று மாதங்களுக்குள் 2,000 புதிய மின்சார ஏசி பேருந்துகளை வாங்க முடிவு செய்துள்ளது. இதற்கான அதிகாரப்பூர்வ டெண்டர் விரைவில் வெளியிடப்பட உள்ளதாக போக்குவரத்துத் துறை வட்டாரங்கள் தெரிவித்துள்ளன. இந்த திட்டம் நடைமுறைக்கு வந்தால், மாநிலம் முழுவதும் பொதுப் போக்குவரத்து அமைப்பில் பெரும் மாற்றம் ஏற்படும் என எதிர்பார்க்கப்படுகிறது.
புதிய மின்சார பேருந்துகள் ஒரு முறை முழுமையாக சார்ஜ் செய்யப்பட்டால் சுமார் 300 கிலோமீட்டர் தொலைவு வரை பயணம் செய்யும் திறன் கொண்டவையாக இருக்கும். முழுக்க பேட்டரி மூலம் இயங்கும் இந்த பேருந்துகளில் பயணிகளின் வசதிக்காக பல்வேறு நவீன வசதிகள் இணைக்கப்பட உள்ளன. குறிப்பாக, சீட் பெல்ட், USB சார்ஜிங் போர்ட்கள், LED விளக்குகள், சரியான காற்றோட்டம் மற்றும் பாதுகாப்பு கேமராக்கள் போன்ற அம்சங்கள் இடம்பெறும் என அதிகாரிகள் கூறுகின்றனர்.
இதையும் படிங்க: தமிழகம் நோக்கி ராகுல்... விஜயுடன் முக்கிய அரசியல் பேச்சுவார்த்தையா..? எகிறும் எதிர்ப்பார்ப்புகள்..!!
மின்சார பேருந்துகள் அறிமுகப்படுத்தப்படுவதன் மூலம் பெட்ரோல் மற்றும் டீசல் பயன்பாடு கணிசமாகக் குறையும். இதனால் காற்று மாசுபாடு பெருமளவில் கட்டுப்படுத்தப்படும். மேலும், இயந்திர சத்தம் இல்லாத அமைதியான பயணத்தைப் பொதுமக்கள் அனுபவிக்க முடியும். இந்த திட்டம் சுற்றுச்சூழல் பாதுகாப்பு மற்றும் நிலையான வளர்ச்சி இலக்குகளை நோக்கிய முக்கிய அடியாகவும் பார்க்கப்படுகிறது.
தமிழ்நாடு அரசு ஏற்கெனவே பல்வேறு மாவட்டங்களில் மின்சார பேருந்துகளை சோதனை அடிப்படையில் இயக்கி வருகிறது. புதிய பேருந்துகள் வருகையால், நகர்ப்புற மற்றும் கிராமப்புற இணைப்பு மேலும் வலுப்பெறும். மக்களின் அன்றாட பயணச் செலவு குறையும் என எதிர்பார்க்கப்படுகிறது. இந்த திட்டத்தின் மூலம் அரசு போக்குவரத்துக் கழகங்கள் நவீன தொழில்நுட்பத்தை ஏற்று, சிறந்த சேவையை வழங்கும் நிலை உருவாகும்.
இந்த முயற்சி தமிழ்நாட்டை மின்சாரப் போக்குவரத்தில் முன்னோடி மாநிலமாக மாற்றும் என போக்குவரத்துத் துறை அதிகாரிகள் நம்பிக்கை தெரிவித்துள்ளனர்.
இதையும் படிங்க: “தவெக தவிர மத்தவங்க கிளம்பு...” - அரிவாளைக் காட்டி பெண்களை மிரட்டிய தவெக பிரமுகர்... ஃபுல் மப்பில் அட்ராசிட்டி...!
