₹1000 கோடி செலவு செஞ்சாரு ஸ்டாலின் சார்.. நானும் AI வீடியோ போடுறேன்!! ஆதவ் அர்ஜுனா விளாசல்..!!

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தலில் வாக்குப்பதிவு நடைபெற்ற நிலையில், தமிழக வெற்றிக் கழக (தவெக) வேட்பாளர் சத்தியபாமா தொடர்பான ஒரு வீடியோ சமூக வலைதளங்களில் வைரலாகி பெரும் பரபரப்பை ஏற்படுத்தியுள்ளது. இதற்கு தவெக அமைச்சர் ஆதவ் அர்ஜுனா பதிலளித்துள்ளார்.

கடந்த சட்டப்பேரவைத் தேர்தலில் அதிமுக சார்பில் தாராபுரம் தொகுதியில் போட்டியிட்டு சுமார் 81 ஆயிரம் வாக்குகள் பெற்று வெற்றி பெற்ற சத்தியபாமா, பின்னர் தனது எம்எல்ஏ பதவியை ராஜினாமா செய்து அதிமுகவிலிருந்து விலகி தவெகவில் இணைந்தார். இதையடுத்து நடைபெற்ற இடைத்தேர்தலில் தவெக சார்பில் மீண்டும் அதே தொகுதியில் வேட்பாளராகக் களமிறங்கினார். 

கட்சி மாற்றம் காரணமாக மக்களிடையே எதிர்ப்பு எழுந்ததாகவும், பிரசாரத்தின் போது சில இடங்களில் மோதல்கள் ஏற்பட்டதாகவும் செய்திகள் வெளியாகின. முதலமைச்சர் விஜய் பிரசாரக் கூட்டத்தில் சத்தியபாமா உணர்ச்சிவசப்பட்டு பேசிய போது அவரை ஆறுதல்படுத்தியதும் குறிப்பிடத்தக்கது.

இதையும் படிங்க: "சத்தியபாமா வீடியோ AI"..! குழப்பத்தை ஏற்படுத்தும் முயற்சி..! அமைச்சர் ஆதவ் அர்ஜுனா விளக்கம்..!!

இந்நிலையில், சத்தியபாமா தவெகவில் இணைந்ததை நினைத்து வேதனையுடன் பேசுவதாகக் கூறப்படும் வீடியோ ஒன்று நேற்று முதல் சமூக ஊடகங்களில் பரவியது. அதில், “கடந்த தேர்தலில் ரூ.31 கோடி செலவு செய்தேன். ஒரு பைசாவும் திரும்பி வரவில்லை. இந்த முறை அமைச்சர்கள் தங்குவதற்கு ரூ.14 லட்சம் வரை செலவு செய்துள்ளேன்” என்று தவெகவை விமர்சிக்கும் வகையில் அவர் பேசியதாகச் சித்தரிக்கப்பட்டிருந்தது. இது வாக்குப்பதிவு நாளில் வெளியானதால் அரசியல் வட்டாரத்தில் பெரும் விவாதத்தை ஏற்படுத்தியது.

சத்தியபாமா தரப்பில் இந்த வீடியோ முழுக்க முழுக்க சித்தரிக்கப்பட்டது என்றும், தொழில்நுட்ப ரீதியாக எடிட் செய்யப்பட்ட போலி வீடியோ என்றும் விளக்கம் அளிக்கப்பட்டது. வெற்றி வாய்ப்பு அதிகமாக இருப்பதால் எதிரிகள் இத்தகைய சதியில் ஈடுபடுவதாகவும் அவர் குற்றம்சாட்டினார். இதற்கிடையே, இந்த வீடியோ தொடர்பாக நடவடிக்கை எடுக்க வேண்டும் என திமுக எம்எல்ஏ ஆஸ்டின், சென்னை தலைமைத் தேர்தல் அதிகாரி அலுவலகத்தில் புகார் அளித்தார்.

இது குறித்து செய்தியாளர்கள் தவெக அமைச்சர் ஆதவ் அர்ஜுனாவிடம் கேள்வி எழுப்பியபோது, அவர் உறுதியாகப் பதிலளித்தார். “எல்லாம் AI தான். திமுக காலை 10 மணிக்கு வெளியிடும் போதே இது AI வீடியோ என்பது தெரிந்திருக்கும். நானும் நாளை காலையில் ‘ஸ்டாலின் சார் 1000 கோடி செலவு பண்ணாரு’ என்று AI வீடியோ போடுவேன். பார்க்கிறீர்களா?” என சவால் விடுத்தார். 

வாக்குப்பதிவுக்கு முன் மக்களிடம் குழப்பத்தை ஏற்படுத்தவே திமுக இத்தகைய சதியில் ஈடுபட்டுள்ளது என்றும் அவர் கூறினார். இந்த சம்பவம் தேர்தல் முடிவுகளில் எவ்வாறு தாக்கத்தை ஏற்படுத்தும் என்பது இன்னும் கவனிக்கத்தக்கதாக உள்ளது. தாராபுரம் தொகுதியில் தவெக, திமுக, அதிமுக உள்ளிட்ட கட்சிகள் கடும் போட்டியில் ஈடுபட்டுள்ளன.

இதையும் படிங்க: வாய்க்கு வந்ததை பேசக் கூடாது... இதோடு நிறுத்திக்கணும்..! அமைச்சர் ஆதவிற்கு பிரேமலதா வார்னிங்..!!