அம்மாவின் ஆட்சி மீண்டும் வர அனைவரும் ஒன்றிணைய வேண்டும்! டிடிவி தினகரன் அழைப்பு!

அதிமுகவும் அமமுகவும் வெவ்வேறு இயக்கங்கள் அல்ல; இரண்டுமே மறைந்த முன்னாள் முதலமைச்சர் ஜெயலலிதாவின் கொள்கை வழியில் இயங்கும் தாய் இயக்கங்கள் தாம் என்றும், மீண்டும் தமிழகத்தில் 'அம்மாவின் ஆட்சி' மலர அனைவரும் கருத்து வேறுபாடுகளை மறந்து ஒன்றிணைய வேண்டும் என்றும் அம்மா மக்கள் முன்னேற்றக் கழகப் பொதுச்செயலாளர் டிடிவி தினகரன் பகிரங்க அழைப்பு விடுத்துள்ளார்.

செய்தியாளர்களிடம் பேசிய அவர், கழகங்களின் ஒற்றுமை மற்றும் எதிர்கால அரசியல் நகர்வுகள் குறித்து மனம் திறந்து பேசினார். கடந்த தேர்தலிலும் நான் அவர்களுடன் தான் நின்றேன், இப்போதும் அவர்களுடன் தான் இருக்கிறேன்; எப்போதும் அவர்களுக்கு உறுதுணையாகவே களத்தில் நிற்பேன். தேர்தலில் ஆட்சிப் பொறுப்பைப் பிடிக்க முடியவில்லை என்பதற்காக ஒட்டுமொத்தப் பழியையும் எடப்பாடி பழனிசாமி மீது மட்டுமே சுமத்துவதைத் தவிர்க்க வேண்டும். தேர்தல் பின்னடைவில் எல்லோருக்கும் பொறுப்பு இருக்கிறது; எதிர்க்கட்சித் தலைவர் என்ற முறையில் அவருக்குக் கூடுதல் பொறுப்பு இருக்கலாம். ஆனால் அவரை மட்டுமே தனிமைப்படுத்திக் குறை சொல்வது நியாயமல்ல எனக் குறிப்பிட்டார்.

மேலும், இயக்கங்களுக்குள் இருக்கும் கருத்து வேறுபாடுகளைப் பேசித் தீர்த்துக்கொள்ள வேண்டும் என வலியுறுத்திய டிடிவி தினகரன், எங்களுக்குள் இருக்கும் சின்னச் சின்ன மனக்கசப்புகளை எடப்பாடி பழனிசாமியுடன் நேரில் பேசிச் சரிசெய்து கொள்ள வேண்டும். தமிழகத்தில் மீண்டும் அம்மாவின் பொற்கால ஆட்சியை அரியணையில் அமர்த்த வேண்டும் என்ற ஒற்றை இலக்கோடு, எம்ஜிஆர் மற்றும் ஜெயலலிதாவின் உண்மைத் தொண்டர்களும் நண்பர்களும் ஒன்றிணைந்து செயல்பட வேண்டியது காலத்தின் கட்டாயம் எனத் திட்டவட்டமாகத் தெரிவித்தார்.

இதையும் படிங்க: எம்ஜிஆர், ஜெயலலிதாவுடன் இணைந்து கலக்கியவர்! சௌகார் ஜானகி மறைவுக்கு இபிஎஸ் ஆழ்ந்த இரங்கல்!

அதிமுக தொண்டர்கள் மற்றும் கூட்டணிக் கட்சிகள் ஒன்றிணைந்து நின்றால் மட்டுமே மக்கள் விரோத சக்திகளை வீழ்த்தி மீண்டும் அதிகாரத்தைக் கைப்பற்ற முடியும் என்றும், அதற்கான ஒருங்கிணைப்பு முயற்சிகளுக்குத் தான் எப்போதும் முழு ஒத்துழைப்பு அளிக்கத் தயாராக இருப்பதாகவும் அவர் உறுதிபடத் தெரிவித்தார்.

இதையும் படிங்க: சர்கார் பட சர்ச்சை முதல் அம்மா லேப்டாப் வரை! சட்டமன்றத்தில் புஸ்ஸி ஆனந்த் பேச்சுக்கு அதிமுக கண்டனம்!