தவெகவில் இணைவும் விஜய பாஸ்கர்கள்!!! ஜூலையில் தேதி குறிச்சாச்சு!! அதிமுகவில் தொடரும் அதிருப்தி!

சென்னை: அதிமுகவைச் சேர்ந்த எம்.எல்.ஏ.க்கள் அடுத்தடுத்து தங்கள் பதவியை ராஜினாமா செய்து தமிழக வெற்றிக் கழகத்தில் (தவெக) இணைவது கட்சியின் தொண்டர்கள் மற்றும் எடப்பாடி பழனிசாமியை அதிர்ச்சியில் ஆழ்த்தியுள்ளது.

நடந்து முடிந்த சட்டசபைத் தேர்தலில் தவெக மற்றும் திமுகவுக்கு அடுத்து மூன்றாவது இடத்தைப் பிடித்த அதிமுகவில் பலர் அதிருப்தி அடைந்தனர். இதனைத் தொடர்ந்து எஸ்.பி.வேலுமணி, சி.வி.சண்முகம், சி.விஜயபாஸ்கர் உள்ளிட்டோர் தலைமையில் அதிருப்தி அணி உருவானது.

சிலர் ராஜினாமா கடிதம் கொடுத்தனர். பின்னர் சமாதானப் பேச்சு நடைபெற்று எஸ்.பி.வேலுமணி உள்ளிட்ட சிலர் எடப்பாடி பழனிசாமி தரப்புக்கு திரும்பினர். ஆனால் சி.வி.சண்முகம் மற்றும் சி.விஜயபாஸ்கர் தரப்பினர் தொடர்ந்து அதிருப்தியில் இருந்தனர்.

இதையும் படிங்க: அதிமுகவில் அடுத்த மேஜர் விக்கெட்! தவெக தாவ தயாராகும் கே.சி.பழனிசாமி! ஆதரவாளர்களுடன் ஆலோசனை!

இந்நிலையில், அதிமுக எம்.எல்.ஏ.க்களான மரகதம் குமரவேல், ஜெயக்குமார், சத்யபாமா, இசக்கி சுப்பையா ஆகியோர் தங்கள் பதவியை ராஜினாமா செய்து தவெகவில் இணைந்தனர். இதைத் தொடர்ந்து சி.விஜயபாஸ்கர் மற்றும் எம்.ஆர்.விஜயபாஸ்கர் ஆகிய இருவரும் தங்கள் எம்.எல்.ஏ. பதவியை ராஜினாமா செய்துள்ளனர்.

சி.விஜயபாஸ்கர் தனது ஆதரவாளர்களுடன் நேற்று தவெகவில் இணைய இருந்த நிகழ்ச்சி, இயக்குநர் பாக்யராஜ் மறைவு காரணமாக ரத்து செய்யப்பட்டது. இப்போது இருவரும் வரும் ஜூலை 2ஆம் தேதி தவெகவில் இணைய உள்ளதாக தகவல் வெளியாகியுள்ளது. 

சுமார் 15 ஆயிரத்துக்கும் மேற்பட்ட ஆதரவாளர்களுடன் முதலமைச்சர் விஜய் முன்னிலையில் இணைய இருப்பதாகக் கூறப்படுகிறது. மாமல்லபுரம் அருகே உள்ள தனியார் விடுதியில் பிரம்மாண்ட வரவேற்பு நிகழ்ச்சிக்கு ஏற்பாடுகள் நடைபெற்று வருகின்றன.

முன்னாள் அமைச்சர் எம்.எஸ்.எம். ஆனந்தன் மற்றும் திருச்சி வளர்மதி ஆகியோரும் விரைவில் தவெகவில் இணைய உள்ளதாக தகவல்கள் தெரிவிக்கின்றன. தவெகவில் இணையும் சி.விஜயபாஸ்கர் மற்றும் எம்.ஆர்.விஜயபாஸ்கர் இருவருக்கும் முக்கிய பொறுப்புகள் வழங்கப்படலாம் என எதிர்பார்க்கப்படுகிறது.

அதிமுகவில் இருந்து தொடர்ந்து நடைபெறும் ராஜினாமா அலைகள் கட்சியின் எதிர்காலம் குறித்து பல கேள்விகளை எழுப்பியுள்ளன. தவெகவின் வளர்ச்சி அதிமுகவுக்கு பெரும் சவாலாக மாறியுள்ளது.

இதையும் படிங்க: MLA பதவியை ராஜினாமா செய்கிறார் எம்.ஆர்.விஜயபாஸ்கர்? அதிமுகவில் அடுத்த விக்கெட்! அடித்து ஆடும் CM விஜய்!