அமித் ஷா வருகையால் தமிழகம்–புதுச்சேரியில் உச்சக்கட்ட பாதுகாப்பு! 3 நகரங்களில் பரபரப்பு! முழு விவரம்!
போக்குவரத்து மாற்றங்கள் மற்றும் பாதுகாப்பு நடைமுறைகள் குறித்து சம்பந்தப்பட்ட துறைகள் தீவிர ஆலோசனையில் ஈடுபட்டு வருகின்றன.
by
மத்திய உள்துறை அமைச்சர் அமித் ஷா ஆகஸ்ட் 8 மற்றும் 9 ஆகிய தேதிகளில் தமிழகம் மற்றும் புதுச்சேரிக்கு முக்கிய பயணம் மேற்கொள்ள உள்ளார். புதுச்சேரி காவல்துறைக்கு அறிவிக்கப்பட்டுள்ள ஜனாதிபதி விருதை வழங்குவதற்காக அவர் வருவது அரசியல் மற்றும் நிர்வாக வட்டாரங்களில் கவனத்தை ஈர்த்துள்ளது.
டெல்லியில் இருந்து விமானம் மூலம் சென்னை வரும் அமித் ஷா, அங்கிருந்து ஹெலிகாப்டர் மூலம் ஆகஸ்ட் 8 மாலை 4.55 மணியளவில் புதுச்சேரி செல்கிறார். அன்றைய தினம் கடற்கரையையொட்டியுள்ள நீதிபதிகள் விருந்தினர் மாளிகையில் இரவு தங்க உள்ளதாக அதிகாரப்பூர்வ தகவல்கள் தெரிவிக்கின்றன.
அடுத்த நாள் ஆகஸ்ட் 9 காலை 8.10 மணிக்கு, புதுச்சேரி கோரிமேடு காவல்துறை மைதானத்தில் நடைபெறும் சிறப்பு விழாவில் அவர் பங்கேற்கிறார். அந்த நிகழ்ச்சியில், புதுச்சேரி காவல்துறைக்கு அறிவிக்கப்பட்டுள்ள மதிப்புமிக்க ஜனாதிபதி விருதை அதிகாரப்பூர்வமாக வழங்குகிறார். இந்த விழாவில் மாநில அரசு உயரதிகாரிகள், காவல்துறை அதிகாரிகள் மற்றும் பல்வேறு துறைகளைச் சேர்ந்த முக்கிய பிரமுகர்கள் கலந்து கொள்வார்கள் என எதிர்பார்க்கப்படுகிறது.
இதையும் படிங்க: வினாத்தாள் கசிவுக்கு கடிவாளம்! தேர்வு முறைகேடு தடுப்பு மசோதா வரலாற்றில் புதிய மைல்கல்: அமித்ஷா புகழாரம்!
விருது வழங்கும் நிகழ்ச்சிக்குப் பிறகு, காலை 10.50 மணியளவில் அமித் ஷா ஹெலிகாப்டர் மூலம் திருவண்ணாமலை செல்கிறார். அங்கு புகழ்பெற்ற அருணாசலேஸ்வரர் கோவிலில் சுவாமி தரிசனம் மேற்கொள்வதுடன், ஆன்மிக முக்கியத்துவம் வாய்ந்த ரமணர் ஆசிரமத்திற்கும் செல்ல உள்ளார். இந்த பயணத்திற்காக திருவண்ணாமலையிலும் பாதுகாப்பு ஏற்பாடுகள் தீவிரப்படுத்தப்பட்டுள்ளன.
பின்னர், திருவண்ணாமலையிலிருந்து ஹெலிகாப்டர் மூலம் சென்னை திரும்பும் அமித் ஷா, அங்கிருந்து விமானம் மூலம் டெல்லி புறப்படுகிறார். அவரது வருகையை முன்னிட்டு சென்னை, புதுச்சேரி மற்றும் திருவண்ணாமலை ஆகிய பகுதிகளில் பலத்த பாதுகாப்பு ஏற்பாடுகள் செய்யப்பட்டுள்ளன. போக்குவரத்து மாற்றங்கள் மற்றும் பாதுகாப்பு நடைமுறைகள் குறித்து சம்பந்தப்பட்ட துறைகள் தீவிர ஆலோசனையில் ஈடுபட்டு வருகின்றன. மத்திய உள்துறை அமைச்சரின் இந்த இருநாள் பயணம் நிர்வாக ரீதியிலும், அரசியல் ரீதியிலும் முக்கியத்துவம் வாய்ந்ததாக பார்க்கப்படுகிறது.
இதையும் படிங்க: 9வது நாளாக முடங்கிய லோக்சபா... அமித் ஷா பதில் சொல்ல வேண்டும்! எதிர்க்கட்சி எம்.பி.க்கள் கடும் அமளி!
