அன்புமணி தலைமையில் அனைத்து கட்சி கூட்டம்... சாதிவாரி கணக்கெடுப்பை வலியுறுத்தும் பாமக..!!

தமிழ்நாட்டில் சமூக நீதியின் தொட்டில் என்று போற்றப்படும் பாரம்பரியத்தைப் பாதுகாக்கவும், 69 சதவீத இட ஒதுக்கீட்டை உறுதி செய்யவும் சாதிவாரி மக்கள் தொகை கணக்கெடுப்பு நடத்த வேண்டும் என்ற வலியுறுத்தலுடன் பாட்டாளி மக்கள் கட்சி சார்பில் ஒரு முக்கிய அனைத்துக் கட்சி மற்றும் சமூக அமைப்புகளின் கலந்தாய்வுக் கூட்டம் இன்று சென்னையில் நடைபெற்றது. பாமக தலைவர் மருத்துவர் அன்புமணி ராமதாஸ் தலைமையில் இந்தக் கூட்டம் ஏற்பாடு செய்யப்பட்டது. 

இந்தக் கூட்டத்திற்கான அறிவிப்பை மே 29 அன்று அன்புமணி ராமதாஸ் ஒரு விரிவான அறிக்கை மூலம் வெளியிட்டார். அதில் தமிழ்நாட்டின் சமூக நீதி வரலாற்றை சுட்டிக்காட்டி, தற்போதைய சவால்களை விளக்கினார். பல ஆண்டுகளாக பாமக தொடர்ந்து சாதிவாரி கணக்கெடுப்புக்காகப் போராடி வருவதாகத் தெரிவித்தார். 

மத்திய அரசு 2027 தேசிய மக்கள் தொகை கணக்கெடுப்பை சாதிவாரியாக நடத்த முடிவு செய்துள்ள நிலையில், அதில் கிடைக்கும் மேக்ரோ தரவுகள் மட்டும் மாநில அளவிலான சமூக நீதி நடவடிக்கைகளுக்கு போதாது என்று அன்புமணி வலியுறுத்தினார். தமிழ்நாட்டில் மனிதவளமோ நிதியோ எந்தத் தடையுமில்லை என்று சுட்டிக்காட்டிய அன்புமணி, 2026 சட்டமன்றத் தேர்தலில் வெற்றி பெற்று முதலமைச்சராகப் பொறுப்பேற்றுள்ள விஜய் தலைமையிலான தமிழக வெற்றிக் கழக அரசு தனது தேர்தல் அறிக்கையில் வாக்குறுதி அளித்தபடி உடனடியாக சாதிவாரி சர்வே நடத்த வேண்டும் என்று வலியுறுத்தினார்.

இதையும் படிங்க: தூக்குல போடுங்க..! கோவையில் சிறுமி கொலை... அன்புமணி ஆவேசம்...!

இந்த நிலையில் இன்று சென்னையில் நடைபெற்ற கூட்டத்துக்கு தமிழ்நாட்டின் அனைத்து அரசியல் கட்சிகள் மற்றும் சமூக அமைப்புகளின் தலைவர்களுக்கு அழைப்பு விடுக்கப்பட்டது. சாதிவாரி கணக்கெடுப்பின் அவசியம் குறித்து விரிவான விவாதம் நடத்தி, அரசுக்கு அழுத்தம் கொடுப்பதே இந்தக் கூட்டத்தின் முக்கிய நோக்கம். தமிழ்நாடு சமூக நீதியில் பின்னடைவைச் சந்திப்பதைத் தடுக்க இது ஒரு முக்கிய முயற்சி என்று பாமக வட்டாரங்கள் கூறின. இருப்பினும் இந்த அனைத்துக் கட்சி கூட்டத்தில் விசிக உள்ளிட்ட கட்சிகள் பங்கேற்கவில்லை. 

இதையும் படிங்க: 4 தொகுதிகளில் பாமக வெற்றி..  மக்களின் தீர்ப்பை ஏற்கிறோம்...! அன்புமணி அறிக்கை!