காங்கிரஸ் இல்லாத தூத்துக்குடி மாவட்டமாக மாற்றிக் காட்டுவேன்!! முன்னாள் அமைச்சர் அனிதா ராதாகிருஷ்ணன் சபதம்!

தூத்துக்குடி: தி.மு.க. முன்னாள் அமைச்சரும், தூத்துக்குடி தெற்கு மாவட்ட செயலருமான அனிதா ராதாகிருஷ்ணன், காங்கிரஸ் கட்சியை தூத்துக்குடி மாவட்டத்திலிருந்து முழுமையாக விரட்டியடிப்பதாக சபதம் எடுத்துள்ளார். இந்த அறிவிப்பு தமிழக அரசியல் களத்தில் பெரும் பரபரப்பை ஏற்படுத்தியுள்ளது.

சட்டசபை தேர்தலில் தி.மு.க. கூட்டணியில் காங்கிரஸ் ஐந்து தொகுதிகளில் வெற்றி பெற்ற நிலையில், தமிழக வெற்றிக் கழக ஆட்சிக்கு ஆதரவு அளித்து கூட்டணியை முறித்துக் கொண்டது காங்கிரஸ். இதனால் ஆத்திரமடைந்துள்ள அனிதா ராதாகிருஷ்ணன், தி.மு.க. நிர்வாகிகள் கூட்டத்தில் பேசும்போது காங்கிரஸ் தலைவர்களை கடுமையாக விமர்சித்தார்.

“காங்கிரஸ் தலைவர்கள் தனியாக நின்றால் தமிழகத்தில் ஒரு தொகுதியில்கூட வெற்றி பெற முடியாது. எங்களுடன் கூட்டணி இல்லாவிட்டால் டெபாசிட் கூட வாங்க முடியாது” என அவர் கூறினார். இதற்கு காங்கிரஸ் எம்.பி. மாணிக்கம் தாகூர் கடும் கண்டனம் தெரிவித்து, அனிதா ராதாகிருஷ்ணன் மன்னிப்பு கேட்க வேண்டும் என வலியுறுத்தினார். இதைத் தொடர்ந்து தூத்துக்குடியில் காங்கிரஸ் தொண்டர்கள் அனிதாவுக்கு எதிராக ஆர்ப்பாட்டமும் நடத்தினர்.

இதையும் படிங்க: அமிர்தராஜ் தோத்தா? அனிதா ராதாகிருஷ்ணனே பொறுப்பு?! முதல்வர் ஸ்டாலினுக்கு பறந்த முக்கிய கடிதம்!!

இந்த நிலையில் ஆத்திரமடைந்த அனிதா ராதாகிருஷ்ணன், தூத்துக்குடி மாவட்ட முன்னாள் காங்கிரஸ் தலைவர் முரளிதரன், முன்னாள் ஒன்றியத் தலைவர் பிச்சுவிளை சுதாகர் உள்ளிட்ட 10க்கும் மேற்பட்ட முக்கிய நிர்வாகிகளை தி.மு.க.வுக்கு இழுத்துள்ளார். அப்போது பேசிய அவர், “தூத்துக்குடி மாவட்டத்தை காங்கிரஸ் கட்சியே இல்லாத மாவட்டமாக மாற்றிக் காட்டுவேன்” என உறுதியாகக் கூறினார்.

தி.மு.க. நிர்வாகிகள் கூறுகையில், “லோக்சபா தேர்தலில் திருநெல்வேலியில் காங்கிரஸ் வேட்பாளரை வெற்றி பெற வைக்க அனிதா 8 கோடி ரூபாய் வரை செலவழித்தார். சட்டசபை தேர்தலிலும் காங்கிரஸ் செலவை ஏற்றுக் கொண்டார். ஆனால் காங்கிரஸ் தி.மு.க.வின் முதுகில் குத்தியதால் இந்த நடவடிக்கை” எனத் தெரிவித்தனர்.

இதனிடையே, பா.ஜ.க. தரப்பில் தமிழக துணைத் தலைவர் டால்பின் ஸ்ரீதரன், “காங்கிரஸ் முக்த் பாரத் என்ற முழக்கத்தைப் போலவே அனிதா ‘காங்கிரஸ் முக்த் தூத்துக்குடி’ என்று சொல்கிறார். காங்கிரஸ் கட்சியின் உண்மை முகத்தை மக்கள் புரிந்துகொள்ள வேண்டும்” என விளக்கம் அளித்தார்.

இந்த சம்பவம் தி.மு.க. - காங்கிரஸ் இடையேயான பழைய கூட்டணி உறவில் விரிசலை அதிகப்படுத்தியுள்ளது. தூத்துக்குடி மாவட்ட அரசியல் சமன்பாடு மாறும் என அரசியல் பார்வையாளர்கள் கருதுகின்றனர்.

இதையும் படிங்க: தூத்துக்குடி துப்பாக்கி சூடு சம்பவம்: 8ம் ஆண்டு நினைவு தினம்..!! கண்ணீர் மல்க மக்கள் அஞ்சலி..!!