மலேசிய நாடாளுமன்றத்தில் திருக்குறள் முழக்கம்! இணையத்தில் கவனம் ஈர்க்கும் பிரதமர் அன்வர் இப்ராஹிமின் பேச்சு!

கோலாலம்பூர்: மலேசிய நாடாளுமன்றத்தில் 2027ஆம் ஆண்டுக்கான பட்ஜெட்டைத் தாக்கல் செய்தபோது, பிரதமர் அன்வர் இப்ராஹிம் திருவள்ளுவரின் திருக்குறளை மேற்கோள் காட்டிப் பேசியது கவனம் ஈர்த்துள்ளது. தமிழின் தொன்மையான இலக்கியமான திருக்குறளை அவர் மேற்கோள் காட்டிய காணொளி இணையத்தில் பரவலாகப் பகிரப்பட்டு வருகிறது. 

சிறந்த நாட்டுக்கு என்ன தேவை?

அக்டோபர் 9ஆம் தேதி நாடாளுமன்றத்தில் 2027ஆம் ஆண்டுக்கான பட்ஜெட் உரையை நிகழ்த்திய அன்வர் இப்ராஹிம், திருக்குறளின் 731ஆவது குறளை மேற்கோள் காட்டினார்.

“தள்ளா விளையுளும் தக்காரும் தாழ்விலாச்
செல்வரும் சேர்வது நாடு”

என்ற குறளை அவர் தனது உரையில் குறிப்பிட்டார். திருக்குறளின் பொருட்பாலில், ‘நாடு’ என்ற அதிகாரத்தில் இடம்பெறும் இந்தக் குறள், ஒரு நாடு சிறந்து விளங்குவதற்குத் தேவையான அடிப்படை அம்சங்களை எடுத்துரைக்கிறது. 

இதையும் படிங்க: ரஷ்ய மொழியில் மொழிபெயர்க்கப்பட்ட திருக்குறள்! அதிபர் புதினுக்கு அன்பளிப்பாக வழங்கி பிரதமர் மோடி பெருமிதம்!

குறளின் பொருள் என்ன?

குறையாத விளைச்சல், தகுதியும் அறிவும் கொண்ட நல்ல மக்கள், குறைவில்லாத செல்வ வளம் ஆகியவை ஒன்றிணைந்து அமைந்திருப்பதே சிறந்த நாடு என்பதுதான் இந்தக் குறளின் பொருள்.

நாட்டின் வளர்ச்சி என்பது பொருளாதார வளத்தையும் கட்டடங்களையும் மட்டும் சார்ந்ததல்ல; அறிவு, நீதி, அறம், மனித கண்ணியம் ஆகியவையும் ஒரு நாட்டின் உண்மையான மேன்மைக்கு அடிப்படை என்பதை அன்வர் இப்ராஹிம் தனது உரையில் வலியுறுத்தினார். 

திருக்குறளைத் தொடர்ந்து மேற்கோள் காட்டும் பிரதமர்

திருக்குறளை மலேசியப் பட்ஜெட் உரையில் மேற்கோள் காட்டுவது அன்வர் இப்ராஹிமுக்கு இது முதல் முறையல்ல. கடந்த கால பட்ஜெட் உரைகளிலும் திருவள்ளுவரின் கருத்துகளை அவர் பயன்படுத்தியதாகச் செய்திகள் வெளியாகியுள்ளன.

2027ஆம் ஆண்டு பட்ஜெட் உரையில் இடம்பெற்ற இந்தக் குறள், தமிழின் இலக்கியச் செழுமையையும் அதன் கருத்துகள் உலகளாவிய அளவில் பொருந்தக்கூடியவை என்பதையும் மீண்டும் கவனத்துக்குக் கொண்டுவந்துள்ளது.

இனம், மொழி, நாடு ஆகிய எல்லைகளைக் கடந்து மனித சமுதாயத்துக்குத் தேவையான அறம், அறிவு, செழிப்பு போன்ற கருத்துகளைத் திருக்குறள் எடுத்துரைக்கிறது. பல நூற்றாண்டுகளுக்கு முன்பு எழுதப்பட்ட நூலின் கருத்துகள் இன்றைய நாட்டின் வளர்ச்சி குறித்த விவாதத்திலும் இடம்பெற்றிருப்பது தமிழ் இலக்கியத்தின் நீடித்த பொருத்தத்தை வெளிப்படுத்துகிறது.

இதையும் படிங்க: போர் விமானத்தைத் தனியாக இயக்கிய தாய்லாந்து ராணி! உலகையே திரும்பிப் பார்க்க வைத்த சாதனை!