#BREAKING விடிந்ததுமே இடியை இறக்கிய விஜய் அரசு... 450 மருத்துவ பணியாளர்கள் மீது பாய்ந்தது வழக்கு...!

சென்னை எழும்பூர் ராஜரத்தினம் மைதானம் அருகே பணி நிரந்தரம் உள்ளிட்ட பல்வேறு கோரிக்கைகளை வலியுறுத்திப் போராட்டத்தில் ஈடுபட்ட பல்நோக்கு மருத்துவப் பணியாளர்களைக் காவல்துறையினர் குண்டுக்கட்டாகக் கைது செய்த நிலையில், தற்போது 450 பேர் மீது வழக்குப் பதிவு செய்யப்பட்டுள்ளது.

தமிழகத்தில் உள்ள அரசு மருத்துவமனைகள், ஆரம்ப சுகாதார நிலையங்கள் உள்ளிட்ட மருத்துவத் துறைகளில் பல்நோக்கு மருத்துவப் பணியாளர்கள் தினக்கூலி அடிப்படையில் பணியாற்றி வருகின்றனர். இவர்களில் 2013, 2014ஆம் ஆண்டுகளில் தற்காலிகப் பணி நியமனத்தின் அடிப்படையில் பணியில் சேர்ந்தவர்களும் உள்ளனர். ஐந்து ஆண்டுகள் பணியை நிறைவு செய்த பிறகும் தங்களைப் பணி நிரந்தரம் செய்யவில்லை எனக் கூறி, நீண்டகாலமாகப் பணியாளர்கள் கோரிக்கை விடுத்து வருகின்றனர்.

வீட்டுக்காவல்:

பணி நிரந்தரம், மாதந்தோறும் ஒரு நாள் ஊதியத்துடன் கூடிய விடுப்பு, அரசு விடுமுறை நாட்களில் விடுமுறை, பணி மாறுதல் கலந்தாய்வு உள்ளிட்ட பல்வேறு கோரிக்கைகளை வலியுறுத்தி, பல்நோக்கு மருத்துவமனைப் பணியாளர் மேம்பாட்டுச் சங்கத்தினர் சென்னை எழும்பூர் ராஜரத்தினம் மைதானம் அருகே உண்ணாவிரதப் போராட்டம் நடத்தத் திட்டமிட்டிருந்தனர்.

இதையும் படிங்க: டெல்லி போராட்டத்திற்கு செக்...! ஜந்தர் மந்திரில் போராட தடை..! காவல்துறை அறிவிப்பு..!

இதற்காகத் தமிழகத்தின் பல்வேறு மாவட்டங்களிலிருந்தும் மருத்துவப் பணியாளர்கள் சென்னைக்கு வந்தனர். ஆனால், போராட்டத்துக்குக் காவல்துறையினர் அனுமதி மறுத்ததாகக் கூறப்படுகிறது. மேலும், போராட்டத்தில் பங்கேற்கச் சென்னைக்குப் புறப்பட்ட சில நிர்வாகிகள் மற்றும் பணியாளர்களை அவரவர் பகுதிகளிலேயே தடுத்து நிறுத்தி, வீட்டுக்காவலில் வைத்ததாகவும் தகவல்கள் வெளியாகின.

குண்டுக்கட்டாகத் தூக்கிய போலீஸ்:

இந்நிலையில், சென்னை எழும்பூர் ராஜரத்தினம் மைதானம் அருகே திரண்ட மருத்துவப் பணியாளர்கள், தங்களது கோரிக்கைகளை வலியுறுத்திச் சாலையில் அமர்ந்து போராட்டத்தில் ஈடுபட்டனர். அப்போது, அனுமதியின்றிப் போராட்டத்தில் ஈடுபட்டதாகக் கூறி, அங்கு பாதுகாப்புப் பணியில் இருந்த காவல்துறையினர் அவர்களைத் தடுத்து நிறுத்தினர்.

தொடர்ந்து, போராட்டத்தில் ஈடுபட்டவர்களைக் காவல்துறையினர் குண்டுக்கட்டாகத் தூக்கிச் சென்று கைது செய்து, அரசு வாகனங்களில் ஏற்றினர். கைது செய்யப்பட்டவர்கள் அருகிலுள்ள சமூக நலக் கூடங்களில் தங்க வைக்கப்பட்டதாகத் தகவல்கள் தெரிவிக்கின்றன. இந்தக் கைது நடவடிக்கையின்போது, சில பெண் பணியாளர்கள் காவல்துறையினரின் நடவடிக்கை குறித்து அதிருப்தி தெரிவித்திருந்தனர். 

450 பேர் மீது வழக்குப் பதிவு:

இதற்கிடையே, போராட்டத்தில் ஈடுபட்டதாகக் கூறி 450 மருத்துவப் பணியாளர்கள் மீது எழும்பூர் காவல்துறையினர் மூன்று பிரிவுகளின் கீழ் வழக்குப் பதிவு செய்துள்ளனர். பொதுமக்களுக்கு இடையூறு ஏற்படுத்துதல், சட்டவிரோதமாகக் கூடுதல் உள்ளிட்ட பிரிவுகளின் கீழ் வழக்குப் பதிவு செய்யப்பட்டுள்ளதாகத் தெரிவிக்கப்பட்டுள்ளது.

பணி நிரந்தரம் உள்ளிட்ட நீண்டகாலக் கோரிக்கைகளை வலியுறுத்திப் போராட்டத்தில் ஈடுபட்ட மருத்துவப் பணியாளர்கள் கைது செய்யப்பட்டதுடன், தற்போது அவர்கள் மீது வழக்குப் பதிவு செய்யப்பட்டிருப்பதும் பரபரப்பை ஏற்படுத்தியுள்ளது. இந்தச் சம்பவம் தொடர்பாக எழும்பூர் காவல்துறையினர் தொடர்ந்து விசாரணை நடத்தி வருகின்றனர்.

இதையும் படிங்க: டெல்லியில் வெடிக்கும் போராட்டம்... மகாத்மா காந்தியின் கொள்ளு பேரன் கைது..!!