சென்னை மக்களே அலர்ட்! புறநகர் பகுதியில் கொட்டித் தீர்க்கப்போகும் மழை! வந்தாச்சு வானிலை அறிக்கை!

சென்னை: நேற்று மாலை சென்னை மற்றும் புறநகர் பகுதிகளில் பெய்த மழை நகரவாசிகளுக்கு பெரும் நிம்மதியை அளித்தது. ஒரு மணி நேரம் நீடித்த இந்த மழையால் நீண்ட நாட்களாக வெயிலின் கொடுமையால் அவதிப்பட்ட மக்களுக்கு குளிர்ச்சி ஏற்பட்டது. தெருக்களில் நடமாட்டம் அதிகரித்தது. குழந்தைகள் மழையில் நனைந்து விளையாடினர். வெப்பத்தால் அலைமோதிய சென்னை இப்போது சற்று இதமான சூழலில் உள்ளது.

வானிலை ஆய்வு மையம் இன்று முக்கிய அறிவிப்பு ஒன்றை வெளியிட்டுள்ளது. சென்னை மற்றும் அதன் சுற்றுவட்டாரப் பகுதிகளில் இன்று மாலை அல்லது இரவு நேரங்களில் இடி மின்னலுடன் கூடிய மழை பெய்ய வாய்ப்பு இருப்பதாகத் தெரிவித்துள்ளது. சில இடங்களில் திடீர் பலத்த காற்றும் வீசக்கூடும் என எச்சரிக்கை விடுக்கப்பட்டுள்ளது.

சாதகமான வெப்ப சலனம் காரணமாக மேகமூட்டங்கள் அதிகரித்துள்ளன. கிழக்கு-மேற்கு திசையில் மேகப் பரவல் தென்படுகிறது. வட கடலோர தமிழகத்தில் கீழ்மட்ட காற்று குவியும் நிலை உருவாகியுள்ளது. வங்காள விரிகுடாவில் இருந்து வரும் ஈரப்பதமான தென்கிழக்கு காற்றும், தமிழ்நாட்டின் உள்பகுதிகளில் இருந்து வரும் தென்மேற்கு காற்றும் இணைவதால் மழைக்கு சாதகமான சூழல் உருவாகியுள்ளது.

இதையும் படிங்க: வலுவடைந்தது காற்றழுத்த தாழ்வு!! ஜூலை 10 வரும் கொட்டப்போகும் கனமழை! சென்னையும் தப்பவில்லை!

நேற்றைய மழைக்குப் பிறகு சென்னையில் வெப்பநிலை கணிசமாகக் குறைந்துள்ளது. அதிகபட்ச வெப்பநிலை 36 டிகிரிக்கு மேல் இருந்த நிலையில், மழைக்குப் பிறகு மக்கள் சற்று நிம்மதி அடைந்துள்ளனர். பள்ளி மற்றும் அலுவலகத்துக்கு செல்லும் மக்கள் மழை எச்சரிக்கையுடன் பயணிக்குமாறு அறிவுறுத்தப்பட்டுள்ளனர். சாலைப் போக்குவரத்து பாதிப்பு ஏற்படலாம் என்பதால் மக்கள் முன்னெச்சரிக்கை நடவடிக்கைகளை மேற்கொள்ள வேண்டும்.

வானிலை ஆய்வு மையம் அடுத்த சில நாட்களுக்கு தமிழகத்தில் பல இடங்களில் மழை பெய்யக்கூடும் என கணித்துள்ளது. குறிப்பாக வட மற்றும் தென் கடலோர மாவட்டங்களில் மழை வாய்ப்பு அதிகம் உள்ளது. மக்கள் வானிலை அறிவிப்புகளை தொடர்ந்து கவனித்து, தேவையில்லாத பயணங்களை தவிர்க்குமாறு வானிலை நிபுணர்கள் அறிவுறுத்தியுள்ளனர்.

சென்னை மக்கள் நேற்றைய மழையை ரசித்த அதேவேளையில், இன்று எதிர்பார்க்கப்படும் மழையும் வரவேற்கத்தக்கதாக உள்ளது. வெப்பத்தால் பாதிக்கப்பட்ட விவசாயிகள், தொழிலாளர்கள் உள்ளிட்ட அனைவரும் இந்த மழையை ஆசையுடன் எதிர்பார்த்துள்ளனர். மழை பெய்தாலும், இடி மின்னல் அபாயத்தை கருத்தில் கொண்டு பாதுகாப்பாக இருக்குமாறு மக்களுக்கு அறிவுறுத்தப்பட்டுள்ளது.

இதையும் படிங்க: ஜூன் 19 வரை கொட்டித் தீர்க்க காத்திருக்கும் மழை! நாளை 14 மாவட்டங்களுக்கு அலர்ட்! உஷார் மக்களே!