டிபென்ஸ் மோடு மட்டும் போதாது... இனி அட்டாக் மோடுதான்!  ஐடி அணிக்கு முதல்வர் மு.க.ஸ்டாலின் அதிரடி கட்டளை!

2026 சட்டமன்றத் தேர்தலை முன்னிட்டு, திமுக தகவல் தொழில்நுட்ப அணி (IT Wing) நிர்வாகிகளின் மாநில அளவிலான ஆலோசனைக் கூட்டம் இன்று நடைபெற்றது. இதில் கலந்துகொண்டு பேசிய அக்கட்சியின் தலைவரும், முதலமைச்சருமான மு.க.ஸ்டாலின், சமூக வலைதளங்களில் திமுகவிற்கு எதிராகப் பரப்பப்படும் அவதூறுகளை முறியடிக்கவும், தேர்தல் களத்தில் அதிரடியாகச் செயல்படவும் நிர்வாகிகளுக்குப் பல்வேறு வியூகங்களை வகுத்துக் கொடுத்தார்.

நமது நற்பெயருக்குக் களங்கம் விளைவித்து, தமிழகத்திற்குள் எப்படியாவது நுழைந்துவிடலாம் என எதிரிகள் நினைக்கின்றனர். அவதூறு பரப்புவோருக்குப் பதில் சொல்லிக்கொண்டே இருக்காமல், அவ்வப்போது அட்டாக் மோடு'க்கும் மாற வேண்டும். கிரிக்கெட் மொழியில் சொல்ல வேண்டுமானால், இனி அடித்து ஆட வேண்டும். தமிழகத்தில் கலவரத்தை உருவாக்கி அதில் குளிர்காயச் சில சக்திகள் நினைக்கின்றன. குறிப்பாக, பாஜக-வினர் ஏராளமான ரைட் விங் கணக்குகளை வைத்துப் பொய் செய்திகளைப் பரப்புகின்றனர். அத்தகைய செய்திகளைக் கண்டால், உரிய ஆதாரத்தோடு உடனே பதிலடி கொடுங்கள். நூற்றுக்கணக்கானோர் தரும் பதிலடியைக் கண்டு அவர்கள் அந்தப் பதிவையே நீக்கிவிட்டு ஓட வேண்டும்.

இதையும் படிங்க: வெங்காயம் போல தான் திமுக பட்ஜெட்! திருச்சியில் திண்டுக்கல் சீனிவாசன் பேட்டி!

இந்தியாவிலேயே பூத் அளவில் டிஜிட்டல் ஏஜென்ட்களைக் கொண்டிருக்கும் ஒரே இயக்கம் திமுகதான். ஆன்லைன் மட்டுமின்றி ஆஃப்லைனிலும் நாம் வலுவாக இருக்கிறோம். கன்டென்ட் உருவாக்குவதில் நாம் தான் ராஜா. கட்சிக்காகக் களத்தில் உழைப்போர் 'போர்வாள்' என்றால், இணையத்தில் உழைப்போர் ஃபையர்வால் போன்றவர்கள். நீங்கள் பயன்படுத்தும் ஒவ்வொரு சொல்லும், எழுத்தும் பொறுப்போடு இருக்க வேண்டும். அதிகாரப்பூர்வமான செய்திகளை மட்டுமே நம்பிச் செயல்படுங்கள். நமது இலக்கை அடையக் களத்திலும் இணையத்திலும் ஒருங்கிணைந்து செயல்படுவது அவசியம்.

எதிரிகளின் பொய் பரப்புரைகளை முறியடித்து, திராவிட மாடல் ஆட்சியின் சாதனைகளைச் சாமானிய மக்களிடம் கொண்டு சேர்ப்பதே ஐடி அணியின் முதன்மையான பணி என முதல்வர் வலியுறுத்தினார். தேர்தல் நெருங்கும் வேளையில் முதல்வரின் இந்த 'அட்டாக் மோடு' அறிவுறுத்தல், திமுக ஐடி அணியினரிடையே மிகப்பெரிய உற்சாகத்தை ஏற்படுத்தியுள்ளது.

இதையும் படிங்க: காங்கிரசுக்கு நன்றி இருக்கணும்... மாணிக்கம் தாகூர் ஒரு பொருட்டே இல்ல.!! - ஜெகத்ரட்சகன்