நேர்ல போய் பாக்கமாட்டாரா..? CM விஜயை துரத்திய கேள்விகள்... ஒருவழியாக கரூர் செல்ல திட்டம்..!

தமிழ்நாட்டின் முதலமைச்சராகப் பொறுப்பேற்ற பிறகு முதன்முறையாக கரூர் மாவட்டத்திற்கு சுற்றுப்பயணம் மேற்கொள்ளவிருக்கிறார் சி. ஜோசப் விஜய். ஜூலை 10 மற்றும் 11 ஆகிய தேதிகளில் இந்த வருகை நடைபெற உள்ளதாக தகவல்கள் வெளியாகியுள்ளன. அரசு விழாவில் பங்கேற்று பல்வேறு நலத்திட்ட உதவிகளை வழங்குவதோடு, கடந்த ஆண்டு ஏற்பட்ட கூட்ட நெரிசல் சம்பவத்தில் உயிரிழந்தவர்களின் குடும்பத்தினரை நேரில் சந்தித்து ஆறுதல் தெரிவிக்கவும் முதலமைச்சர் திட்டமிட்டுள்ளார். 

2025 செப்டம்பர் 27 அன்று கரூர் மாவட்டத்தில் தமிழக வெற்றிக் கழகத்தின் பிரச்சார பொதுக்கூட்டத்தின்போது ஏற்பட்ட கூட்ட நெரிசலில் 41 பேர் உயிரிழந்த சோக சம்பவம் தமிழக அரசியல் களத்தில் பெரும் பாதிப்பை ஏற்படுத்தியது. அந்த சம்பவத்திற்குப் பிறகு முதலமைச்சராகப் பதவியேற்ற விஜய், இப்போது கரூருக்கு வருகை தருவது அவரது அரசியல் பயணத்தில் முக்கியமான கட்டமாகப் பார்க்கப்படுகிறது. இந்த வருகை மூலம் பாதிக்கப்பட்ட குடும்பங்களுக்கு ஆறுதல் அளிப்பதோடு, அவர்களுக்கான உதவிகளையும் உறுதி செய்ய இருப்பதாகவும் தகவல் வெளியானது.

முதலமைச்சரின் இந்த சுற்றுப்பயணம் தமிழகம் முழுவதும் ஒவ்வொரு மாவட்டமாக மேற்கொள்ளப்படும் முதல் கட்ட நடவடிக்கையாகவும் அமையும் என தெரிவிக்கப்படுகிறது. கரூரில் அரசு சார்பில் ஏற்பாடு செய்யப்படும் விழாவில் பங்கேற்று, பல்வேறு திட்டங்களின் கீழ் நலத்திட்ட உதவிகளை பயனாளிகளுக்கு வழங்குவார்.

இதையும் படிங்க: அதானியின் அல்லேரி திட்டம்..! ஜவ்வாது மலையை விற்பதா..? வெளுத்து வாங்கிய வேல்முருகன்..!

மேலும், கூட்ட நெரிசல் சம்பவத்தில் பாதிக்கப்பட்ட 41 குடும்பங்களுடன் தனிப்பட்ட முறையில் சந்தித்து உரையாடவும், அவர்களின் கோரிக்கைகளை கேட்டறியவும் திட்டமிடப்பட்டுள்ளதாக கூறப்பட்டுள்ளது. இந்த வருகைக்கான ஏற்பாடுகள் தீவிரமாக நடைபெற்று வருவதாக அதிகாரிகள் தரப்பில் தெரிவிக்கப்படுகிறது. பாதுகாப்பு ஏற்பாடுகள், போக்குவரத்து ஒழுங்கு உள்ளிட்டவை குறித்து மாவட்ட நிர்வாகம் தயாரிப்புகளை முடுக்கிவிட்டுள்ளது. 

இதையும் படிங்க: எக்ஸ்பிரஸ் வேகம் காட்டும் CM விஜய்! பரபரக்கும் தலைமைச் செயலகம்! காலையில் செல்லும் கோப்புக்கு மாலைக்குள் கையெழுத்து!