கோவையில் சினிமாவை மிஞ்சிய குட்கா வேட்டை! சிக்கிய கடத்தல்காரர்கள் 2 பேருக்கு கை முறிவு!

கோவையில் போலீஸாரின் வாகனச் சோதனையில் நிற்காமல் தப்பிச் சென்ற காரை, தலைமைக் காவலர் ஒருவர் மேற்கூரையைப் பற்றியபடி சுமார் 40 கிலோமீட்டர் தூரம் பின்தொடர்ந்து சென்ற சம்பவம் பரபரப்பை ஏற்படுத்தியுள்ளது. பின்னர் அந்த காரில் இருந்து 170 கிலோ தடை செய்யப்பட்ட குட்கா புகையிலைப் பொருட்கள் பறிமுதல் செய்யப்பட்டதுடன், ராஜஸ்தானைச் சேர்ந்த 3 பேர் கைது செய்யப்பட்டனர்.

கோவில்பாளையம் காவல் நிலைய போலீஸாருக்கு கர்நாடகாவில் இருந்து காரில் குட்கா கடத்தி வரப்படுவதாக தகவல் கிடைத்தது. இதையடுத்து உதவி ஆய்வாளர் விக்னேஷ் தலைமையிலான தனிப்படையினர் விளாங்குறிச்சி பகுதியில் வாகனச் சோதனையில் ஈடுபட்டிருந்தனர்.

அப்போது கர்நாடக பதிவு எண் கொண்ட கார் ஒன்று வந்தது. போலீஸார் அதை நிறுத்த முயன்றபோது, ஓட்டுநர் காரை நிறுத்தாமல் வேகமாக இயக்கியதாக கூறப்படுகிறது. இதையடுத்து காரைத் தடுக்க முயன்ற தலைமைக் காவலர் வேல்முருகன், காரின் மீது பாய்ந்து மேற்கூரையில் ஏறினார். கார் தொடர்ந்து வேகமாக சென்றதால், நிலைதடுமாறாமல் இருக்க மேற்கூரையை இறுகப் பற்றியபடி அவர் பயணம் செய்தார்.

இதையும் படிங்க: தவெக ஆட்சி சொன்ன வெளிப்படைத்தன்மை எங்கே? கோவை மாநகராட்சியில் மீண்டும் சர்ச்சை!

சுமார் 40 கிலோமீட்டர் தூரம் அவிநாசி தேசிய நெடுஞ்சாலையில் கார் சென்ற நிலையில், போலீஸ் அதிகாரிகளுக்கு உடனடியாக தகவல் தெரிவிக்கப்பட்டது. கோவை மாநகர போலீஸார், திருப்பூர் மாவட்ட போலீஸார் மற்றும் நெடுஞ்சாலை ரோந்து குழுவினருக்கும் தகவல் சென்றது.

இதையடுத்து போலீஸார் மற்றும் நெடுஞ்சாலை ரோந்து பணியாளர்கள் இணைந்து காரை தடுத்து நிறுத்த நடவடிக்கை மேற்கொண்டனர். அவிநாசி-மங்கலம் பிரிவு அருகே அன்னபூர்ணா ஓட்டல் பகுதியில் கார் தடுத்து நிறுத்தப்பட்டது. மேற்கூரையில் இருந்த தலைமைக் காவலர் வேல்முருகர் பாதுகாப்பாக மீட்கப்பட்டார்.

பின்னர் காரை சோதனை செய்தபோது, அதற்குள் பதுக்கி வைக்கப்பட்டிருந்த சுமார் 170 கிலோ குட்கா புகையிலைப் பொருட்கள் கண்டுபிடிக்கப்பட்டன. கடத்தலுக்குப் பயன்படுத்தப்பட்ட காரும் பறிமுதல் செய்யப்பட்டது.

காரில் இருந்த ராஜஸ்தானைச் சேர்ந்த பாபுதாரா, ரமேஷ் குமார், சுரேஷ் குமார் ஆகிய 3 பேரை போலீஸார் கைது செய்தனர். விசாரணையில், பெங்களூரு எலக்ட்ரானிக் சிட்டி பகுதியில் அடையாளம் தெரியாத நபரிடம் இருந்து குட்கா பொருட்களை வாங்கி வந்ததாக அவர்கள் தெரிவித்ததாக போலீஸார் கூறினர்.

இதற்கிடையே, கைது செய்யப்பட்டவர்களில் சிலரை விசாரணைக்காக அழைத்துச் சென்றபோது, போலீஸாரிடம் இருந்து தப்ப முயன்றதாக கூறப்படுகிறது. அப்போது சுரேஷ் மற்றும் ராஜேஷ் ஆகிய இருவர் பாலத்தில் இருந்து கீழே குதித்ததில் காயமடைந்தனர். இருவருக்கும் கை முறிவு ஏற்பட்டதாகவும், அவர்கள் கோவை அரசு மருத்துவமனையில் சிகிச்சை பெற்று வருவதாகவும் போலீஸார் தெரிவித்தனர்.

இந்த சம்பவத்தில் தன்னுடைய பாதுகாப்பைப் பொருட்படுத்தாமல் காரின் மேற்கூரையில் பயணித்து கடத்தல் கும்பலைப் பிடிக்க உதவிய தலைமைக் காவலர் வேல்முருகனின் துணிச்சலையும் கடமை உணர்வையும் உயர் போலீஸ் அதிகாரிகள் பாராட்டினர். குட்கா கடத்தலுக்குப் பின்னால் உள்ள மற்ற நபர்கள் குறித்து தொடர்ந்து விசாரணை நடைபெற்று வருகிறது.

இதையும் படிங்க: மோசமான வானிலை! வானில் வட்டமிட்ட விமானங்கள்! அமைச்சர் வன்னி அரசு விமானமும் தப்பவில்லை!