கோவை மாணவன் அகிலன் தற்கொலை வழக்கு: சிபிசிஐடி விசாரணைக்கு மாற்றி டிஜிபி அதிரடி உத்தரவு!

கோவை பீளமேடு பகுதியில் சக மாணவர்களின் சாதிய ரீதியான கேலி மற்றும் தீண்டாமைக் கொடுமைகளால் மன உளைச்சலுக்கு ஆளாகி 16 வயது பிளஸ் 1 பள்ளி மாணவன் அகிலன் தற்கொலை செய்து கொண்ட வழக்கை, சிபிசிஐடி (CB-CID) விசாரணைக்கு மாற்றி தமிழக சட்டம் ஒழுங்கு டிஜிபி மகேஷ்குமார் அதிரடியாக உத்தரவிட்டுள்ளார்.

நியாயமான விசாரணை கோரி மாணவனின் உடலை வாங்க மறுத்து உறவினர்கள் தொடர்ந்து போராடி வந்த நிலையில், இந்த அதிரடி உத்தரவைத் தொடர்ந்து மாணவனின் உடலைப் பெற்றுக்கொள்ளப் பெற்றோர் சம்மதம் தெரிவித்துள்ளனர்.

கோவை பீளமேடு பகுதியைச் சேர்ந்த அசோக் குமார் – கவுசல்யா தம்பதியினரின் 16 வயது மகன் அகிலன், அதே பகுதியில் உள்ள ஒரு பள்ளியில் பதினொன்றாம் வகுப்பு (பிளஸ் 1) படித்து வந்தான்.

இதையும் படிங்க: கோவை மாணவர் அகிலன் தற்கொலை: காவல் ஆணையர் ரம்யா பாரதிக்கு மாநில ஆணையம் நோட்டீஸ்!

அகிலன் தாழ்த்தப்பட்ட சமூகத்தைச் சேர்ந்தவன் என்பதால், பள்ளியில் சக மாணவர்கள் சிலர் அவனைக் குறிவைத்துத் தொடர்ந்து சாதி ரீதியாகக் கடுமையான வார்த்தைகளால் கேலி செய்து வந்ததாகவும், இழிவாகப் பேசி மனரீதியாகத் துன்புறுத்தி வந்ததாகவும் கூறப்படுகிறது.

இதனால் கடந்த சில நாட்களாகக் கடுமையான மன உளைச்சலுக்கு ஆளான மாணவன் அகிலன், கடந்த அக்டோபர் 21-ஆம் தேதியன்று தனது வீட்டில் யாரும் இல்லாத நேரத்தில் தூக்கிட்டுத் தற்கொலை செய்து கொண்டான்.

இச்சம்பவம் குறித்துத் தகவல் அறிந்த பீளமேடு போலீசார் மாணவனின் உடலைக் கைப்பற்றி பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர்.

தங்களது மகனின் தற்கொலைக்குக் காரணமான சாதிய வன்மம் மற்றும் பள்ளி நிர்வாகத்தின் அலட்சியம் மீது கடும் நடவடிக்கை எடுக்கக் கோரி மாணவனின் பெற்றோர் பீளமேடு காவல் நிலையத்தில் புகார் அளித்தனர்.

இப்புகாரின் அடிப்படையில் வழக்குப் பதிவு செய்த போலீசார் தீவிர விசாரணை மேற்கொண்டனர்.

அகிலனைத் தொடர்ச்சியாக மன உளைச்சலுக்கு ஆளாக்கியதாக அதே பள்ளியைச் சேர்ந்த 2 மாணவர்கள் கைது செய்யப்பட்டு, நீதிமன்ற உத்தரவின்படி சிறுவர் சீர்திருத்தப் பள்ளியில் அடைக்கப்பட்டனர்.

மேலும், மாணவனின் புகார்களை உரிய நேரத்தில் கவனிக்காமல் அலட்சியமாகச் செயல்பட்டதாகக் கூறி அப்பள்ளியின் தலைமை ஆசிரியர் அருண்குமார் மற்றும் ஆசிரியர் விஜயகுமார் ஆகிய இருவரையும் பள்ளிக் கல்வித்துறை அதிகாரிகள் உடனடியாகப் பணியிடை நீக்கம் (Suspend) செய்து உத்தரவிட்டனர்.

எனினும், இச்சம்பவத்தில் உரிய முறையில் நடுநிலையான விசாரணை நடைபெற வேண்டும் என்றும், பள்ளிகளில் படிக்கும் விளிம்புநிலை மாணவர்களின் பாதுகாப்பை உறுதி செய்ய வேண்டும் என்றும் வலியுறுத்தி, வழக்கை சிபிசிஐடி விசாரணைக்கு மாற்றும் வரை மாணவனின் உடலைப் பெற்றுக்கொள்ள மாட்டோம் என அகிலனின் பெற்றோர் மற்றும் உறவினர்கள் மருத்துவமனை வளாகத்தில் தொடர்ந்து உள்ளிருப்புப் போராட்டத்தில் ஈடுபட்டனர். இதனால் அப்பகுதியில் பெரும் பதற்றம் நிலவி வந்தது.

இந்நிலையில், வழக்கில் உள்ள தீவிரத் தன்மையைக் கருத்தில் கொண்டு, மாணவன் அகிலன் தற்கொலை வழக்கை உடனடியாக சிபிசிஐடி விசாரணைக்கு மாற்றித் தமிழ்நாடு காவல்துறை தலைமை இயக்குநர் (DGP) மகேஷ்குமார் அதிகாரப்பூர்வ உத்தரவைப் பிறப்பித்தார்.

டிஜிபியின் இந்த உத்தரவைத் தொடர்ந்து, போராட்டத்தைக் கைவிட்ட மாணவனின் பெற்றோர் மற்றும் உறவினர்கள் அகிலனின் உடலைப் பெற்றுக்கொண்டு இறுதிச் சடங்குகளைச் செய்ய ஒப்புக்கொண்டனர்.

இவ்வழக்கு தற்போது சிபிசிஐடி வசம் ஒப்படைக்கப்பட்டுள்ளதால், பள்ளியில் நடைபெற்ற சாதியப் பாகுபாடுகள் தொடர்பாக அடுத்தகட்ட கிடுக்கிப்பிடி விசாரணைகள் தீவிரமடையும் என எதிர்பார்க்கப்படுகிறது.

இதையும் படிங்க: எங்கே போனார் செந்தில் பாலாஜி..?? கோவையை மறந்துவிட்டாரா? திமுகவுக்குள் வெடிக்கும் அதிருப்தி!!