59 ஆண்டுகளுக்குப் பின் காங்கிரஸ் அமைச்சர்கள்: தொண்டர்களின் கண்ணீருக்குக் கிடைத்த வெற்றி - அமைச்சர் ராஜேஷ்குமார்!

தமிழ்நாட்டில் சுமார் 59 ஆண்டுகளுக்குப் பிறகு காங்கிரஸ் கட்சியின் மூவர்ணக் கொடியினைத் தோளில் சுமந்துள்ள விசுவாசமிக்கத் தொண்டர்களின் நீண்ட காலக் கனவும், கண்ணீரும் தற்பொழுது நனவாகியுள்ளது என்று மாநிலச் சுற்றுலாத்துறை அமைச்சர் ராஜேஷ்குமார் அவர்கள் மிகவும் நெகிழ்ச்சியுடன் தெரிவித்துள்ளார்.

தமிழ்நாடு காங்கிரஸ் கட்சியின் புதிய உள்கட்டமைப்பு மற்றும் தற்போதைய தவெக தலைமையிலான அரசில் கட்சியின் பங்களிப்பு குறித்துப் பேசிய அமைச்சர் ராஜேஷ்குமார், தற்போதைய அரசியல் நகர்வுகள் மற்றும் புதிய தலைமை நியமனம் குறித்துத் தொண்டர்கள் மத்தியில் நிலவும் எழுச்சியைச் செய்தியாளர்களிடம் விவரித்தார்.

அவர் தனது மேடைப் பேச்சில், "தமிழ்நாடு காங்கிரஸ் கட்சியைப் பற்றியும், அதன் அடிமட்ட உள்கட்டமைப்பைப் பற்றியும் முழுமையாகத் தெரிந்த, தகுதியான ஒரு ஆளுமையைத்தான் காங்கிரஸ் மேலிடம் தற்பொழுது புதிய தலைவராக நியமனம் செய்துள்ளது. இதற்கு முன்னதாகத் தலைவராக இருந்த திரு. செல்வப்பெருந்தகை அவர்கள், தங்களுக்குக் கொடுக்கப்பட்ட தலைவர் பதவியைச் சமரசம் இன்றி மிகவும் சிறப்பான முறையில் செய்து முடித்துள்ளார் என்பதில் எவ்வித மாற்றுக்கருத்தும் இல்லை" என்று பாராட்டினார்.

இதையும் படிங்க: வளர்ந்த தமிழகத்தின் மூலமே வளர்ந்த இந்தியா சாத்தியமாகும்: ஆளுநர் அர்லேகர் பேச்சு!

தொடர்ந்து கட்சியின் வரலாற்றுச் சாதனை குறித்து நெகிழ்ந்த அமைச்சர், "கடைக்கோடி காங்கிரஸ் கட்சியினர் பல தசாப்தங்களாக என்ன விரும்பினார்களோ, ஒரு நாளாவது தமிழ்நாட்டில் ஆட்சி அமைக்கும் அரசுடன் அதிகாரப் பங்கீட்டில் பங்கேற்க வேண்டும் என்று தவம் கிடந்தார்களோ, அது இன்று தவெக அரசில் நினைவாகியுள்ளது. கடந்த 1967-ஆம் ஆண்டினைத் தொடர்ந்து, சுமார் 59 ஆண்டுகளுக்குப் பிறகு காங்கிரஸ் கட்சியின் விசுவாசத் தொண்டர்கள் தங்களது மூவர்ணக் கொடியைக் கம்பீரமாகத் தோளில் சுமந்து அமைச்சர்களாகப் பொறுப்பேற்றுள்ளனர். கட்சித் தொண்டர்களின் இத்தனை காலக் கண்ணீருக்கும், தியாகத்திற்கும் கிடைத்த இந்த வரலாற்று அடையாளத்திற்குக் மிக முக்கியக் காரணம் நமது அகில இந்தியப் பொறுப்பாளர் திரு. கிரீஸ் சோடங்கர் அவர்கள் தான் என்பதை இந்த மேடையில் நான் அழுத்தமாகப் பதிவு செய்ய விரும்புகிறேன்" என்று மிகவும் தீர்க்கமாகக் குறிப்பிட்டார்.

 தமிழகக் காங்கிரஸின் 59 ஆண்டு கால அரசியல் உள்கட்டமைப்பு ஏக்கம் மற்றும் புதிய அமைச்சரவைப் பங்கீடு குறித்துச் சுற்றுலாத்துறை அமைச்சர் ராஜேஷ்குமார் வெளியிட்டுள்ள இந்த உணர்ச்சிப்பூர்வமான மேடைப் பேச்சு, கோட்டை வட்டாரத்திலும் தமிழக டிஜிட்டல் அரசியல் தளங்களிலும் தற்பொழுது மாபெரும் கவனத்தையும் அசுர வேகப் பரபரப்பையும் பெற்றுள்ளது.

இதையும் படிங்க: ஒரே நாளில் 51.86 லட்சம் குழந்தைகளுக்குப் போலியோ சொட்டு மருந்து: சுகாதாரத்துறை தகவல்!