ஜோதிடர் ரிக்கி ராதன் பண்டிட் நியமனம் ரத்து செய்.. முதலமைச்சர் விஜய்க்கு சிபிஐ கோரிக்கை!

தமிழக முதலமைச்சரின் அரசியல் பிரிவு சிறப்பு அலுவலராகப் பிரபல ஜோதிடர் ரிக்கி ராதன் பண்டிட் வெற்றிவேல் நியமிக்கப்பட்டிருப்பதற்கு இந்தியக் கம்யூனிஸ்ட் கட்சி (CPI) கடும் கண்டனம் தெரிவித்துள்ளதோடு, இந்த நியமனத்தை உடனடியாக மறுபரிசீலனை செய்து ரத்து செய்ய வேண்டும் என வலியுறுத்தியுள்ளது.

இந்தியக் கம்யூனிஸ்ட் கட்சியின் மாநிலச் செயலாளர் திரு. மு. வீரபாண்டியன் இன்று விடுத்துள்ள அறிக்கையில் குறிப்பிட்டுள்ளதாவது, தமிழக வெற்றிக் கழகம் தனது கொள்கையாக மதச்சார்பின்மை மற்றும் சமூக நீதியைப் பிரகடனப்படுத்தியுள்ளது. 'பிறப்பொக்கும் எல்லா உயிர்க்கும்' என்ற குறளை முன்னிறுத்தும் ஒரு அரசு, ஜோதிடர் ஒருவரை அதிகாரப்பூர்வப் பொறுப்பில் அமர்த்துவது வியப்பளிக்கிறது."

முதலமைச்சர் தனிப்பட்ட முறையில் ஆன்மீக நம்பிக்கை கொண்டவராக இருக்கலாம், அது அவரது உரிமை. ஆனால், அரசியலமைப்புச் சட்டத்தின்படி செயல்படும் ஒரு அரசு, எந்தவிதமான மதச்சார்பு அடையாளங்களையும் கொண்டிருக்கக் கூடாது என்பதே நாட்டின் மரபாகும். அறிவியல் கண்ணோட்டத்தையும், பகுத்தறிவு சிந்தனையையும் வளர்க்க வேண்டிய கடமை அரசுக்கு உள்ளது. ஆனால், ஜோதிடர் ஒருவரை அரசு அலுவலராக நியமிப்பது பொதுமக்களிடையே தவறான நம்பிக்கைகளை ஊக்கப்படுத்தும் செயலாக அமையும்."
 
முதலமைச்சர் விஜய் அவர்கள் தற்போதைய அரசியல் சூழலில் ஒரு புதிய மாற்றத்தை நோக்கி நகர்ந்து வரும் வேளையில், இத்தகைய நியமனங்கள் அவரது மதச்சார்பற்ற பிம்பத்திற்கு ஊறு விளைவிக்கும் என இடதுசாரி தலைவர்கள் கருதுகின்றனர். எனவே, ஜோதிடர் ரிக்கி ராதன் பண்டிட் வெற்றிவேலின் நியமனத்தை உடனடியாக ரத்து செய்ய வேண்டும் என இந்தியக் கம்யூனிஸ்ட் கட்சியின் மாநில செயற்குழு சார்பில் கேட்டுக்கொள்ளப்பட்டுள்ளது.

இதையும் படிங்க: நீட் தேர்வு வினாத்தாள் கசிவு: சிபிஐ அதிகாரப்பூர்வமாக வழக்குப்பதிவு - விசாரணை தீவிரம்!

ஏற்கனவே தவெக-வின் செய்தித் தொடர்பாளர் பொறுப்பிலும் இருக்கும் ரிக்கி ராதன் பண்டிட் குறித்துத் திருமாவளவன் உள்ளிட்ட தலைவர்கள் கருத்து தெரிவித்துள்ள நிலையில், கம்யூனிஸ்ட் கட்சியின் இந்த அறிக்கை தவெக அரசுக்குப் புதிய தார்மீக அழுத்தத்தை ஏற்படுத்தியுள்ளது. நாளை நடைபெறவுள்ள நம்பிக்கை வாக்கெடுப்பிற்கு முன்னதாக, கூட்டணிக் கட்சிகள் மற்றும் இடதுசாரிகளின் இத்தகைய கோரிக்கைகள் முதல்வர் விஜய்யின் கவனத்திற்குச் சென்றுள்ளதாகக் கூறப்படுகிறது.

இதையும் படிங்க: விஜய் கொடுத்த ஆஃபர்... அதிமுகவை சல்லி, சல்லியாய் உடைத்த சி.வி.சண்முகம்... கடைசி டீல் என்ன தெரியுமா?