உள்ளூர் திறமைகளை சிஎஸ்கே கண்டுகொள்வதில்லை! முன்னாள் வீரர் லட்சுமிபதி பாலாஜி ஆதங்கம்!

ஐபிஎல் தொடரின் வெற்றிகரமான அணிகளில் ஒன்றாகச் சென்னை சூப்பர் கிங்ஸ் (CSK) கருதப்பட்டாலும், அந்த அணி உள்ளூர் வீரர்களை அடையாளம் காண்பதில் மெத்தனமாக இருப்பதாக முன்னாள் வீரர் மற்றும் பயிற்சியாளர் லட்சுமிபதி பாலாஜி அதிருப்தி தெரிவித்துள்ளார். கடந்த 10-12 ஆண்டுகளில் சிஎஸ்கே பல உள்ளூர் திறமைகளைத் தவறவிட்டுவிட்டதாக அவர் குற்றம் சாட்டியுள்ளார்.

சிஎஸ்கே அணியின் ஆரம்பக் காலங்களில் உள்ளூர் வீரர்களுக்கு முன்னுரிமை அளிக்கப்பட்டதை பாலாஜி நினைவு கூர்ந்தார்: தொடக்கத்தில் விபி சந்திரசேகர் அவர்கள் என்னையும், பத்ரிநாத்தையும் தமிழ்நாட்டிலிருந்து முதன்மைத் தேர்வாக வைத்திருந்தார். சொந்த மண்ணில் இவ்வளவுதான் திறமையா? என்ற கேள்வி எழுந்தபோது, அடுத்த வீரர்களாக முரளி விஜய் மற்றும் ரவிச்சந்திரன் அஸ்வின் ஆகிய திறமையான வீரர்கள் அடையாளம் காணப்பட்டு எடுக்கப்பட்டனர்.

தற்போது அந்த நிலைமை முற்றிலுமாக மாறிவிட்டதாக அவர் வேதனை தெரிவித்தார். கடந்த 10 முதல் 12 ஆண்டுகளில் பல உள்ளூர் திறமைகளைச் சிஎஸ்கே நிர்வாகம் தவறவிட்டுவிட்டது. தற்போது முன்பு போல உள்ளூர் வீரர்களை வளர்த்தெடுக்கும் போக்கு அந்த அணியிடம் இல்லை. தமிழ்நாடு என்றில்லாமல் விதர்பா, பஞ்சாப் என எங்கிருந்து வேண்டுமானாலும் உள்ளூர் வீரர்களைத் தேடி எடுத்து அணியில் சேர்க்க வேண்டும். ஆனால் அது நடப்பதில்லை.

இதையும் படிங்க: போதும்டா சாமி...!! - தோல்வியில் ஹாட்ரிக் அடித்த சிஎஸ்கே.... அடித்து துவைத்த ஆர்சிபி...!

தொடர்ந்து ஒரே மாதிரியான பாணியில் (Template) செல்லாமல், சிஎஸ்கே தனது அணுகுமுறையை மாற்றிக்கொள்ள வேண்டும். உள்ளூர் திறமைகளைச் சரியாகப் பயன்படுத்தினால் மட்டுமே நீண்ட காலத்திற்கு அணியைத் தரமாக வைத்திருக்க முடியும்.

சிஎஸ்கே நிர்வாகம் மீண்டும் ஒரு வலுவான 'ஸ்கவுட்டிங்' (Scouting) முறையைக் கொண்டு வர வேண்டும் என்றும், அனுபவ வீரர்களுக்கு இணையாக வளர்ந்து வரும் இளம் திறமைகளுக்கும் வாய்ப்பளிக்க வேண்டும் என்றும் அவர் வலியுறுத்தியுள்ளார்.

ஐபிஎல் 2026 சீசன் விறுவிறுப்பாக நடைபெற்று வரும் நிலையில், சிஎஸ்கே அணியின் முன்னாள் வீரரே அந்த அணியின் தேர்வு முறையை விமர்சித்துள்ளது கிரிக்கெட் வட்டாரத்தில் பெரும் விவாதத்தைக் கிளப்பியுள்ளது.

இதையும் படிங்க: வெற்றியுடன் தொடங்குமா சிஎஸ்கே? இன்று ராஜஸ்தான் ராயல்ஸ் உடன் மோதல்!