அமைச்சர் ஆனந்தை சந்தித்தது ஏன்? பரபரப்புக்கு முற்றுப்புள்ளி வைத்த சி.வி.சண்முகம்!

அதிமுகவில் தொடரும் உள்கட்சி அதிருப்தி நிலையில், முன்னாள் அமைச்சர்களான எஸ்.பி.வேலுமணி, சி.வி.சண்முகம் மற்றும் கே.பி.அன்பழகன் ஆகியோர் இன்று சட்டப்பேரவை வளாகத்தில் தமிழக வெற்றிக் கழகப் பொதுச் செயலாளரும் நீர்வளத்துறை அமைச்சருமான என்.ஆனந்தை திடீரென சந்தித்து நீண்டநேரம் பேசினர். இந்த சந்திப்பு ஒரு மணி நேரத்திற்கும் மேல் நீடித்தது. எடப்பாடி பழனிசாமியை இன்று சந்திக்காத நிலையில், ஆளும் கட்சி அமைச்சரை அணுகியது அரசியல் வட்டாரங்களில் பரபரப்பை ஏற்படுத்தியுள்ளது.

சட்டமன்றத் தேர்தலுக்குப் பின்னர் அதிமுகவில் ஏற்பட்ட பிளவு இன்னும் முழுமையாக ஆறவில்லை. எஸ்.பி.வேலுமணி-சி.வி.சண்முகம் தரப்பு, பொதுச் செயலாளர் எடப்பாடி பழனிசாமிக்கு எதிராகத் தொடர்ந்து அதிருப்தி போக்கைக் கடைப்பிடித்து வருகிறது. கட்சித் தலைமை அவர்களுக்குப் புதிய பொறுப்புகளை வழங்கிய போதிலும், அவை ஏற்றுக்கொள்ளப்படவில்லை.

சட்டமன்ற நம்பிக்கைத் தீர்மான வாக்கெடுப்பின்போது தவெக அரசுக்கு ஆதரவாக வாக்களித்த பின்னர் வருத்தக் கடிதம் அளித்தும், இரு தரப்புக்கும் இடையிலான இடைவெளி நீண்டுகொண்டே செல்கிறது. ஏற்கனவே ஆறு எம்.எல்.ஏ.க்கள் ராஜினாமா செய்து தவெகவில் இணைந்ததால் தொகுதிகள் காலியாகி இடைத்தேர்தல் நடைபெற உள்ள நிலையில், மேலும் சிலர் ஆளும் கட்சிப் பக்கம் சாய்கிறார்களா என்ற ஊகங்கள் எழுந்துள்ளன.

இதையும் படிங்க: எஸ்.பி. வேலுமணிக்கு மீண்டும் முக்கியத்துவம்..! துணைப் பொதுச் செயலாளர் பதவியை வழங்கிய EPS..!!

இந்தச் சந்திப்பு குறித்து எஸ்.பி.வேலுமணி கூறியதாவது: “அத்திக்கடவு-அவினாசி திட்டம் உள்ளிட்ட தொகுதி வளர்ச்சிப் பிரச்சினைகள் குறித்து அமைச்சரிடம் பேசினோம். தவெகவில் இணைவோம் என்ற தகவல்கள் முற்றிலும் தவறானவை. அதிமுகதான் எங்கள் கட்சி.” சி.வி.சண்முகம் செய்தியாளர்களிடம், “தொகுதி மக்களின் நலன் தொடர்பான கோரிக்கைகளுடன் அமைச்சரைச் சந்தித்தோம். நான் ஏன் எடப்பாடியைச் சந்திக்க வேண்டும்? தேவையற்ற கேள்விகளுக்குப் பதில் சொல்ல முடியாது” என்று உறுதியாகப் பதிலளித்தார்.

கடந்த சில நாட்களுக்கு முன் எஸ்.பி.வேலுமணி, சசிகலா மற்றும் டி.டி.வி.தினகரனையும் கட்சியில் சேர்க்க வேண்டும் என்று கோரியிருந்தார். தலைமைக்கு எதிரான தொடர் நடவடிக்கைகள் இருந்தபோதிலும், எடப்பாடி பழனிசாமி கடுமையான நடவடிக்கை எடுக்காமல் பொறுமை காத்து வருவது குறிப்பிடத்தக்கது. இந்தத் திடீர் சந்திப்பு அதிமுகவில் மீண்டும் புகைச்சலை ஏற்படுத்தியுள்ளது. அரசியல் பார்வையாளர்கள், தொகுதிப் பிரச்சினைகளுக்கப்பால் கட்சி உள்கட்சிப் போக்கில் என்ன மாற்றங்கள் ஏற்படும் என்பதைக் கவனித்து வருகின்றனர்.

இதையும் படிங்க: எஸ்.பி.வேலுமணி டிக் அடித்த 21 பேர்... அதிமுக தோல்விக்கு காரணம் இதுவே... உண்மையை போட்டுடைத்த முக்கிய பிரமுகர்...!