துரைமுருகனை சந்தித்த துணை முதல்வர் உதயநிதி..!! இனி அமைச்சர் பதவி கிடையாதா? திமுகவில் நடப்பது என்ன..??

திமுகவின் மூத்த தலைவரும், பொதுச் செயலாளரும், நீர்வளத் துறை அமைச்சருமான துரைமுருகன் (87) அவர்களின் அரசியல் எதிர்காலம் தொடர்பாக கட்சி வட்டாரங்களில் பரபரப்பான விவாதங்கள் எழுந்துள்ளன. சமீப காலமாக உடல்நலக் குறைவால் பாதிக்கப்பட்டு வந்த அவர், வீட்டில் விழுந்து முதுகெலும்பில் ஏற்பட்ட காயத்தால் மருத்துவமனையில் சிகிச்சை பெற்று, பின்னர் நீண்ட காலம் ஓய்வில் இருந்தார்.

இந்நிலையில், அண்மையில் நடைபெற்ற திமுக மாவட்டச் செயலாளர்கள் கூட்டத்தில் கலந்துகொண்டு தனது ஆரோக்கியம் மீண்டு வருவதை வெளிப்படுத்தினார். துரைமுருகன் அவர்கள் 1996ஆம் ஆண்டு முதல் தொடர்ந்து காட்பாடி (முன்பு ராணிப்பேட்டை) தொகுதியில் 10 முறை சட்டமன்ற உறுப்பினராகத் தேர்ந்தெடுக்கப்பட்டுள்ளார். திமுக ஆட்சிக் காலங்களில் பல்வேறு துறைகளில் அமைச்சராகப் பொறுப்பு வகித்து, கட்சியின் நிர்வாக அமைப்பிலும் முக்கியப் பங்காற்றி வருபவர். 

இதையும் படிங்க: விறுவிறு தேர்தல்... திமுக சார்பில் விருப்ப மனு விநியோகம்... தொண்டர்கள் ஆர்வம்..!!

ஆனால், கடந்த 2021 சட்டமன்றத் தேர்தலில் காட்பாடி தொகுதியில் வெறும் 1,000க்கும் குறைவான வாக்கு வித்தியாசத்தில் மட்டுமே வெற்றி பெற்றது குறிப்பிடத்தக்கது. இந்நிலையில், அவரது வயது முதிர்ச்சி மற்றும் சுகாதார நிலைமையை காரணமாகக் காட்டி, வரும் சட்டமன்றத் தேர்தலில் (2026) அவருக்கு வேட்பாளர் வாய்ப்பு மறுக்கப்படலாம் என்ற தகவல் கட்சி உள்ளே பரவியது. ஏற்கெனவே 4 அமைச்சர்களுக்கு சீட் கிடைக்காது என்ற பேச்சு நிலவும் சூழலில், இது மேலும் பரபரப்பை ஏற்படுத்தியது.

இதனிடையே, துணை முதலமைச்சர் உதயநிதி ஸ்டாலின் அவரைச் சந்தித்துப் பேசியுள்ளார். அப்போது, தேர்தலில் போட்டியிட விரும்புவதாக துரைமுருகன் தனது விருப்பத்தைத் தெரிவித்ததாகத் தெரிகிறது. இதையடுத்து, கடைசி முறையாக இந்தத் தேர்தலில் மட்டும் காட்பாடி தொகுதியில் அவருக்கு வாய்ப்பு வழங்கப்படும் என்று கட்சி வட்டாரங்கள் தெரிவிக்கின்றன. 

எனினும், திமுக வெற்றி பெற்று ஆட்சி அமைத்தாலும், அமைச்சர் பதவி எதுவும் அவருக்கு வழங்கப்படாது என்றும், அரசியல் ஓய்வு நிலையை நோக்கி நகர்வு ஏற்படலாம் என்றும் தகவல்கள் வெளியாகியுள்ளன. இது குறித்து துரைமுருகனிடம் நேரடியாகக் கேட்டபோது, அவர் எவ்வித அதிகாரப்பூர்வ பதிலும் அளிக்கவில்லை என்று கூறப்படுகிறது. திமுகவின் நீண்டகால தூணாக விளங்கும் துரைமுருகனின் இந்த முடிவு, கட்சியின் தலைமுறை மாற்றம் மற்றும் அடுத்தகட்ட தலைவர்களைத் தயார்படுத்தும் முயற்சிகளுடன் தொடர்புடையதாக அரசியல் விமர்சகர்கள் பார்க்கின்றனர். 

இதையும் படிங்க: நாளை மாலை திமுக மாவட்ட செயலாளர்கள் கூட்டம்.... முதல்வர் ஸ்டாலின் அவசர ஆலோசனை!