பழனி பாணியில் திண்டுக்கல்லிலும் நிலம் மோசடி! கோவில் சொத்துக்களுக்கு குறி? புயலை கிளப்பிய விவகாரம்!

பழனி கோவில் நில விவகாரம் தமிழகத்தில் பரபரப்பை ஏற்படுத்தியுள்ள நிலையில், திண்டுக்கல் மாவட்டத்தில் உள்ள பிரசித்தி பெற்ற பெருமாள் கோவிலுக்கு சொந்தமான பல கோடி ரூபாய் மதிப்பிலான நிலங்கள் தொடர்பாகவும் புதிய புகார் எழுந்துள்ளது. தாடிக்கொம்பு சவுந்தரராஜ பெருமாள் கோவிலுக்கு சொந்தமான நிலங்கள் தனியார் அறக்கட்டளை பெயரில் மாற்றப்பட்டு, அதில் ஒரு பகுதி விற்பனை செய்யப்பட்டுள்ளதாக இந்து தமிழர் கட்சி சார்பில் குற்றச்சாட்டு முன்வைக்கப்பட்டுள்ளது.

இதுதொடர்பாக அக்கட்சியின் தலைவர் ராம ரவிகுமார் கூறுகையில், தாடிக்கொம்பு சவுந்தரராஜ பெருமாள் கோவிலுக்கு சுமார் 20.47 ஏக்கர் நிலம் இருப்பதாக தெரிவித்துள்ளார். இதன் தற்போதைய சந்தை மதிப்பு சுமார் ரூ.600 கோடி இருக்கும் என்றும் அவர் கூறியுள்ளார்.

கடந்த 1905 மற்றும் 1923-ம் ஆண்டுகளில், சித்ரா பவுர்ணமி மண்டகப்படி, திருமஞ்சனம், நிவேதனம், அன்னதானம் உள்ளிட்ட தர்ம காரியங்களை தொடர்ந்து நடத்துவதற்காக பாலுசாமி அய்யர் என்பவர் இந்த நிலங்களை கோவிலுக்கு வழங்கியதாக கூறப்படுகிறது. இந்த நிலங்கள் குறிப்பிட்ட சமய அறக்கட்டளை சொத்துக்கள் என்பதால், அவற்றை தனிநபர்கள் தங்களது விருப்பப்படி விற்பனை செய்ய முடியாது என்பது புகார் தரப்பின் வாதமாக உள்ளது.

இதையும் படிங்க: பழனி கோயில் நில மோசடி வழக்கு! நீதிமன்றத்தில் ஆஜர்படுத்த இருந்த நேரத்தில் திடீர் நெஞ்சுவலி! பரபரப்பு!

இந்த நிலையில், 2024-ம் ஆண்டு ‘பாலுசாமி அய்யர் அண்ட் பிரதர்ஸ் டிரஸ்ட்’ என்ற பெயரில் தனியார் அறக்கட்டளை உருவாக்கப்பட்டு, கோவில் சொத்துக்கள் அந்த அறக்கட்டளைக்கு சொந்தமானவை போன்று சித்தரிக்கப்பட்டதாக குற்றச்சாட்டு முன்வைக்கப்பட்டுள்ளது. மேலும், சொத்துக்களின் உண்மையான பயனாளியான கோவிலையும், இந்து சமய அறநிலையத்துறையையும் வழக்கில் முறையாக சேர்க்காமல் நீதிமன்றத்தில் வழக்கு நடத்தப்பட்டதாகவும் புகார் கூறப்பட்டுள்ளது.

இதையடுத்து, கடந்த 2025 டிசம்பர் 5-ம் தேதி இந்த சொத்துக்களை விற்பனை செய்வதற்கு சாதகமான தீர்ப்பு பெறப்பட்டதாகவும், தற்போது சுமார் 5.44 ஏக்கர் நிலம் மூன்றாம் நபர்களுக்கு விற்பனை செய்யப்பட்டுள்ளதாகவும் ராம ரவிகுமார் தெரிவித்துள்ளார். அந்த நிலத்துக்கான பத்திரப்பதிவு நடைபெற்றுள்ளதாகவும் அவர் குற்றம்சாட்டியுள்ளார்.

இந்த விவகாரத்தில் தொடர்புடையவர்கள் மற்றும் அவர்களுக்கு உடந்தையாக இருந்ததாக கூறப்படும் அதிகாரிகள் மீது நடவடிக்கை எடுக்க வேண்டும் எனவும் அவர் வலியுறுத்தியுள்ளார். இதுதொடர்பாக திண்டுக்கல் மாவட்ட ஆட்சியர், காவல் கண்காணிப்பாளர் மற்றும் இந்து சமய அறநிலையத்துறை அதிகாரிகளிடம் புகார் மனு அளிக்கப்பட்டுள்ளதாக தெரிவிக்கப்பட்டுள்ளது.

பழனி கோவில் நில விவகாரம் தொடர்பான விசாரணை நடைபெற்று வரும் சூழலில், திண்டுக்கல் பெருமாள் கோவில் சொத்துக்கள் தொடர்பாகவும் புகார் எழுந்திருப்பது கவனம் பெற்றுள்ளது. இந்த புகாரில் கூறப்பட்டுள்ள குற்றச்சாட்டுகள் குறித்து சம்பந்தப்பட்ட துறை அதிகாரிகளின் விசாரணை மற்றும் சட்ட நடவடிக்கைகளுக்குப் பிறகே உண்மை நிலை முழுமையாக தெரியவரும்.

இதையும் படிங்க: பழனி கோயில் நில மோசடி வழக்கு! நீதிமன்றத்தில் ஆஜர்படுத்த இருந்த நேரத்தில் திடீர் நெஞ்சுவலி! பரபரப்பு!