முதல்ல உங்க குடும்பத்தை பாருங்க விஜய்! முதல்வர் சொன்ன குட்டி ஸ்டோரி! சிவசங்கர் கொதிப்பு!

தமிழக சட்டசபை கூட்டத்தொடரின் கடைசி நாளில் முதலமைச்சர் விஜய் ஆளுநர் உரை மீதான விவாதத்துக்கு பதிலளித்து பேசியது அரசியல் வட்டாரங்களில் பெரும் விவாதத்தை ஏற்படுத்தியுள்ளது. குறிப்பாக டாஸ்மாக் மற்றும் “பார்ட்டி பண்ட்” தொடர்பாக முதலமைச்சர் கூறிய கருத்துகளுக்கு எதிர்ப்பு தெரிவித்து திமுக எம்எல்ஏக்கள் சட்டசபையில் இருந்து வெளிநடப்பு செய்த சம்பவம் பரபரப்பை ஏற்படுத்தியது.

இந்த நிலையில், முதலமைச்சர் விஜயின் சட்டசபை உரையை கடுமையாக விமர்சித்த முன்னாள் அமைச்சர் சிவசங்கர், பல்வேறு குற்றச்சாட்டுகளை முன்வைத்துள்ளார். அவர் கூறுகையில், தமிழகத்தின் கள நிலவரங்களையும் மக்களின் உண்மையான பிரச்சினைகளையும் புரிந்துகொள்ளாமல் எழுதிக் கொடுக்கப்பட்ட உரையை முதலமைச்சர் வாசிப்பதாக குற்றம்சாட்டினார்.

மேலும், திரைப்பட வசனங்களைப் போல சட்டமன்றத்தில் பேசுவது நீண்ட கால அரசியலுக்கு உதவாது என்றும், முதலமைச்சர் தனது அணுகுமுறையை மாற்றிக் கொள்ள வேண்டியது அவசியம் என்றும் அவர் தெரிவித்தார். தற்போது ஆட்சியில் இருக்கும் தமிழக வெற்றிக் கழகத்தைச் சேர்ந்த சிலர் மீது குற்றச்சாட்டுகள் எழுந்துள்ள நிலையில், அதுகுறித்து முதலமைச்சர் எந்த விளக்கமும் அளிக்கவில்லை என்றும் அவர் கூறினார்.

இதையும் படிங்க: உங்க அப்பா எங்க காணோம்?! முதல்வர் விஜய் குட்டி ஸ்டோரி! ரசித்து சிரித்த எடப்பாடி!

சட்டசபையில் விஜய் கூறிய குட்டிக்கதையையும் சிவசங்கர் விமர்சித்தார். “உங்கள் அப்பா எங்கே?” என்ற நையாண்டி கதையை கூறிய முதலமைச்சர், தனது குடும்பம் தொடர்பாக முன்பு வெளியான கருத்துக்களை மறந்துவிட்டாரா என்று கேள்வி எழுப்பினார். குடும்ப விவகாரங்களை அரசியலுடன் இணைத்து பேசாமல், முதலில் தனது குடும்பத்தை கவனிக்க வேண்டும் என்றும் அவர் விமர்சித்தார்.

அதேபோல், இதுவரை தமிழகத்தில் நடந்த ஆட்சிகள் அனைத்தும் ஊழல் ஆட்சிகள் என்ற தோற்றத்தை உருவாக்கி, தற்போதைய அரசு மட்டுமே ஊழலற்ற நிர்வாகம் நடத்துவதாக பொதுமக்களிடம் ஒரு பிம்பத்தை ஏற்படுத்த முதலமைச்சர் முயற்சி செய்கிறார் என்றும் சிவசங்கர் குற்றம்சாட்டினார்.

சட்டசபையில் தொடங்கிய வார்த்தைப் போர் தற்போது அரசியல் அரங்கிலும் சமூக வலைதளங்களிலும் தொடர்கிறது. முதலமைச்சர் விஜயின் பேச்சு, திமுகவின் வெளிநடப்பு மற்றும் அதனைத் தொடர்ந்து சிவசங்கர் வெளியிட்ட விமர்சனங்கள் ஆகியவை தமிழக அரசியலில் புதிய விவாதங்களுக்கு வழிவகுத்துள்ளன.

இதையும் படிங்க: பணியிட மாறுதலுக்கு லஞ்சம்? திராவிட கட்சிகளின் நடைமுறைக்கு வேட்டு! தவெக அதிரடி துவக்கம்!